دیل سئچین

آتانین ایستکلی قیزی آکینا

gun

اویان نیوز :

سلام. بونا گؤره کی نئچه آیدیر سنی قولومون اوستونه آلیب لای‌لای چالاراق، یاتماقدان اؤنجه ناغیل دئیه بیلمیرم ،اوزگونم و سندن عوذر ایستیرم. اما قیزیم یالنیز سن دئیلسن کی بو حاقدان محروم اولوبسان، محمود فضلی‌نین اوغلو آتیلا، یوروشون اوغلو تاتار ،شاهروخون قیزی یسنا و بهبودون قیزی و نئچه-نئچه اوشاق سنین کیمی. یالنیز بونا گؤره کی آتالاری اؤلکه‌لرینده اولان حاقسیزلیغا لاقید دئییل‌لر و وطن‌لرین و وطنداش‌لارین سئویرلر بو ظولمه معروض قالیب‌لار. وطنی سئومک و دردینی چکمک گؤره‌و دیر وهر کس بو گؤره‌وی یئرینه یئتیرمه‌سه وطن قارغیسینا گلیب و آلدیغی سو و اکمک اونا قنیم اولار. قیزیم اینسانلار اؤزگور یارانیب‌لار و اؤزگور یاشام ان دوغال و ایلکین حاقلاریدیر. قاندالدا یاشاماق عیب اولماسادا اونا بویون اه‌یمک و اعتیراض ائلمه‌مک بیلگی‌سیزلیک و عاغیل‌سیزلیق دیر. اوسلو باشلی اینسانلار قاندالدان قورتولماق ایچین اللریندن گلنی اسیرگه‌مزلر، زوراکیلیقدان ایطاعت ائتمک سوچ اولماسادا وظیفه و گؤره‌و کیمی باخماق تمام ایله سوچ ساییلیر. تاتارین و آتیلانین آتالاری و بئش نفر یولداشلاری یوردوموزون سیاسی قولوندا موباریزه آپاران اینسانلاردیلار. اولوسوموزون حاقلاریندان مدافیعه ائتمک ایچین توتوقلانیب و دوققوز ایل زیندانا محکوم اولوب‌لار و بونا گؤره کی موحاکیمه غیر‌قانونی شکیلده قورولوب و اطلاعاتین سیفاریشی اساسیندا بو جزایا محکوم اولوب‌لار و قاضی‌لر ۴۰۰ صفحه‌لیک پرونده‌نی بیر گونده اوخویوب و اؤزونون دئدییینه گؤره من بئله حکم‌لری پیلله‌لری یئنه-یئنه قول قویارام ایفاده‌لریله بو حؤکمون قانون‌سیزلیقیندان آسیلی دیر. آدلارین چکدیییم یولداشلاریمیز بو حاقسیزلیغا اعتیراض ائتمک اوچون هر نه قانونی یول وارسا دنه‌دیلر و سونوج آلمادان سونرا آجلیق آکسیاسینا کئچیب‌لر و ۲۰ گوندن چوخدور کی یاشاملاری تهلوکه‌ده دیر. اونلارین بیر نئچه‌سینین آغیر خسته‌لیکلری اولدوغو اوچون نیگرانام. بیزه خالقیمیزین هر تک-تکینه بو اینسانلاری بو دورومدان قورتارماق گؤره‌و سایلیر . حاکیمیت اولان وطنداشلاریمیز – اوستاندارلار- فرماندارلار، میللت وکیل‌لری ،قلم و مئدیا صاحیب‌لری بو گون اونلاری قورتارماق اوچون بیر ایش گؤرمه‌سه‌لر یارین وجدان دانلاغیندان قورتولمایاجاقلار. منیم مهربان قیزیم حاق یولو آخان چای کیمی دیر ، چایین قاباغین بیر گون ایکی گون و یا نئچه ایل آلماق اولار آما بیر گون اؤزونه یول آچیب و مانعلری سیندیریب کئچر. بیزیم ایستک‌لریمیز ده تمام ایله حاق دیر و بیر گون گرچکله‌شه‌جک .اینان کی بیر گون خالقیمیز آلین یازیسین اؤز اللر ایله چؤزه‌جک و بو قارا گون‌لردن اوزو آغ چیخاجاق . بالاجا بالالاریمیز اؤز دیللرینده یازی یازاجاقلار. شعر، فلسفه، هونر و بیلگی یاراداجاقلار. سن و باشقا جوجوخلاریمیزین آنا دیللرینده شارکی‌لاری و ماهنی‌لاری وطنیمیزین نه قدر قوتلو اولدوغوندان سؤز آچاجاق. و بو گونکو حاکیمییت‌ده اولان دیلداشلاریمیز بو سونوجا یئتیشه‌جکلر کی بیزدن اونلارا دوشمان چیخماز و بیز آرزو ائتدیییمیز گؤزل وطن، راحات یاشام، ایقتیصادیات، امنییت یالنیز بیزه یوخ اونلارادا گره‌کیر. آنجاق بو آماجا یئتیشمک سیزین کیمی بالالاریمیزین بیلگی ساحه‌سینده اوخوماغیندان و چاپلاریندان آسیلی دیر و اینانیرام کی منیم قیزیم‌دا آتاسی‌نین اؤیرتدیکلرین دینله‌یه‌رک یاخشی-یاخشی اوخویوب و آتاسینی سئویندیره‌جک دیر. سونوندا گؤزل بالامی یوجه تانرییا امانت تاپیشیریب وتانریدان وطنه لاییق بیر قیز اولماسین دیله ییرم.

gun

یوروم یازین

Back to Top