اویان نیوز: ایران‌دا آذربایجان میللی کیملیگی اوغرون‌دا دینج موباریزه آپاران بهبود قلیزاده توتولوب. فعال دؤرد گون اول توتولسا دا، بو حاقدا خبر فئورالین ۲۰-ده یاییلیب. دیگر فعال ایسه میللتچیلیکده و اجتماعی آساییشی پوزماق‌دا گوناهلاندیریلاراق ۳ آی شرطی حبس و ۳۰ شاللاق ضربه‌سی جزاسی آلیب
«مدیا فوروم» سایتینین معلوماتینا گؤره، اطلاعات-این قوشاچای (میانداب) شعبه‌سینین امکداشلاری بهبود قلیزاده نی فئورالین ۱۶-دا ماغازاسین‌دا توتوب آپاریبلار. ماغازادا و ائوده آختاریش آپاریلیب، فعالا مخصوص کامپوتر، سی‌دی-لر، ال یازمالار، کیتابلار، فوتوالبوم و بیر سیرا دیگر اشیالار گؤتورولوب.
بهبود قلیزاده نین حاضردا هارادا ساخلاندیغی، کونکرت نده گوناهلاندیریلدیغی بیلینمیر.
بهبود قلیزاده میللی زمینه ده آپاردیغی دینج فعالیتینه گؤره بون‌دان اول ده دفعه‌لرله توتولوب، آز مدت ساخلاندیق‌دان سونرا مولک گیرووو قارشیلیغین‌دا آزادلیغا بوراخیلیب.
آذربایجان میللی کیملیگی اوغرون‌دا دینج موباریز یاشار پیری ایسه شرطی حبس و شاللاق ضربه‌سی جزاسینا محکوم ائدیلیب.
«مدیا فوروم» سایتینین معلوماتینا گؤره، جزانی تبریز محکمه‌سی وئریب. یاشار پیری میللتچیلیکده و اجتماعی آساییشی پوزماق‌دا گوناهلاندیریلاراق ۳ آی شرطی حبس و ۳۰ شاللاق ضربه‌سی جزاسی آلیب.
فعال اورمییه گؤلونون قورودولماسینا اعتراض اولاراق تبریزده کئچیریلمیش آکسییالارا قاتیلدیغینا گؤره توتولموش، ۲۰ گون اطلاعات-این تجریدخاناسین‌دا ساخلاندیق‌دان سونرا مولک گیرووو قارشیلیغین‌دا آزادلیغا بوراخیلمیش‌دی.
آمریکا سسی
