دیل سئچین

آذربایجان دئموکرات فیرقه‌سینین گؤرکه‌م‌لی عضوو ۸۷ یاشین‌دا وفات ائتدی

اویان نیوز:  من او واخت تهران شهرین‌ده ایدیم. آذربایجانا هوجوم ائتدیکلری و خالقی قیریب اؤلدوردوکلرین‌ده گیزله‌نمه‌یه مجبور قالدیم. آنجاق سونرا توتولاراق ۱۹۴۷-جی ایلین فئورالین‌دا ایکی آیلیق اوشاغیم قارنیم‌دا ایک‌ن زین‌دانا گؤندریلدیم.

۱۹۴۵-۴۶-جی ایللرده آذربایجان دئموکرات فیرقه‌سینین عضوو اولموش راضییه شعبانی ایبراهیم‌زاده یانوارین ۲۸-ده موهاجیرت‌ده یاشادیغی آلمانیادا ۸۷ یاشین‌دا وفات ائدیب. ۲۰-جی عصرین طلاتوملری سیاسی فعالی ایران‌دان سابیق سووئت اتفاقینا، داها سونرا ایسه آلمانییایا اوز توتماغا وادار ائتمیش‌دی.

راضیه شعبانی آذربایجان میللی حکومتینین ییخیلماسین‌دان تقریباً ایکی آی سونرا ۱۹۴۷-جی ایلین فئورالین‌دا تئهران‌دا پهلوی رئژیمینین مأمورلاری طرفین‌دن حبس ائدیلمیش‌دی. او، خاطره‌لرین‌ده حبس ائدیلمه‌سی ایله باغلی یازیردی: «من او واخت تئهران شهرین‌ده ایدیم. آذربایجانا هوجوم ائتدیکلری و خالقی قیریب اؤلدوردوکلرین‌ده گیزله‌نمه‌یه مجبور قالدیم. آنجاق سونرا توتولاراق ۱۹۴۷ فئورالین‌دا ایکی آیلیق اوشاغیم قارنیم‌دا ایک‌ن زین‌دانا گؤندریلدیم. او زامانلار، قادینلارا مخصوص زین‌دان یوخ ایدی. گئنئرال رزمارانین بینالارین‌دان بیرینی ایجاره ائدیب، زین‌دانا چئویرمیش‌دیلر. داها سونرالار، منی تئهران‌دان آذربایجان‌داکی اوردو پروکورورلوغونا تسلیم ائتدیلر. بیرینجی حربی محکمه‌یه آپاریلدیغیم زامان اوغلوم ۱۲ گونلوک ایدی.»

 حربی محکمه طرفین‌دن ایکی ایل حبسه محکوم ائدیله‌ن آذربایجان‌لی سیاسی فعال حبس جزاسینی تبریز و تئهران شهرلرین‌ده چکمیش‌دی.

بیر چوخ وئب صحیفه‌لری مرهوم شبانینین ایران‌دا بیرینجی قادین سیاسی مهبوس اولدوغونو یازیبلار. او، آذربایجان دئموکرات فیرقه‌سینه عضو اولمادان اؤنجه، حیات یولداشی رضا ایبراهیمزادنین تأثیری آلتین‌دا سیاسی فعالیته باشلاییب، توده پارتییاسینین عضوو اولموش‌دو. اؤز یازدیقلارینا گؤره، او توده پارتییاسی و اونون رهبرلیگی ایله پروبلئملر یاشاییردی و آذربایجان خالقینین قیامینا شاهید اولونجا، اونلارا قاتیلمیش‌دی. او گونلرده، ۲۰ یاشین‌دا گنج بیر قیز اولان رازییه خانیم اینینه حربی فورما گئیه‌رک بئلین‌ده کولت تاپانچاسی گزدیریردی.

۱۹۵۵-جی ایلده سووئت اتفاقین‌دا موهاجیرت‌ده یاشایان حیات یولداشینین یانینا گئدن رازییه خانیم، تقریباً ۲۵ ایل سسری-ده یاشادیق‌دان سونرا وطنه گئری دؤن‌سه ده، ۸ ایل سونرا اؤلکه‌نی یئنی‌دن ترک ائتمک قراری وئردی. بو سفر آذربایجان واسطه‌سیله ایله آلمانیایا موهاجیرت ائد‌ن سابیق ساییاسی فعال اؤمرونون سونونا قدر همین اؤلکه‌ده یاشادی.

قایناق آمریکا سسی

یوروم یازین

Back to Top