دیل سئچین

آذربایجان لی فعال لارینین آجلیق اعتیراضلارینین 8 اینجی گونو/ شهرام رادمهرین معده قاناماسی

5 feal

اویان نیوز: تبریز زیندانیندا توپلو اولاراق آجلیق اعتیراضینا باشلایان آذربایجانلی فعاللارینین ۸ اینجی گونونده، زیندان مسئوللاری شهرام رادمهری معده قاناماسیندان اؤترو تبریز زیندانینین سالیق مرکرینه اینتیقال وئردیلر.

اویان نیوزا چاتان خبره گؤره، ۱۳۹۲ تیر آینین ۲۹-و آذربایجانلی میللی – مدنی فعال شهرام رادمهر ۸ اینجی آجلیق اعتیراضی گونو معده قاناماسی نا گؤره تبریز زیندانینین سالیق مرکزینه قالدیریلدی.

لطیف حسنی، محمود فضلی، بهبود قلیزاده و آیت مهرعلی بیگلو نوندا جیسمی دوروملااری چوخ پیس گزاریش ائدیلیر. دئیلیشلره گؤره بو نئچه گون آجلیق اعتیراضی نتیجه سینده جیسمی ضعیف لمه دن اؤترو بو فعاللاردا قالیجی باش آغریسی واردیر.

خویلو آذربایجانلی میللی – مدنی فعال مخمود فضلی ایران – عیراق ساواشینین یارالی لاریندان دیر.

بهبود قلیزاده نین باجی سی ژیلا قلیزاده، آیت مهر علی بیگلونون قارداشی تایماز مهر علی بیگلو و محمود فضلی نین حایات یولداشی فاطمه حیدری کئچن گون رادیو آزادلیقا وئردیقلری موصاحیبه ده تبریز اینقیلاب محکمه سینین وئردیقی بو حؤکمون عدالت سیز اولدوغونو دییه رک بو فعاللارین سون دوروملارینی آنلاتدیلار.

کئچن بیر هفته ایچینده بو فعاللارین عایله لری دفه لرجه اونلارین ایستکلری ایله ارتیباط دا عدالت ائوی و تبریز زیندانینا باش ووروبلار. تبریز دادیستانی بو فعاللارین عایله لرینی قورخوداراق دئییب دیر کی؛ آجلیق اعتیراضلارینا سون وئرمه سه لر اوزاق بیر شهره سورگون ائدیله جکلر.

“گادپ” و “آذوح” تمثیل چی لری بیر نئچه گون قاباق بروکسل ده کی آوروپا پارلمانیندا لونته چازی(اینسان حاقلار کومیسیونون سئکرئتر مودورو، خاریجی سیاست سئکرئترلیغینین گنل مودورو و سیاسی دانیشمان و آوروپا پارلمانینین کئچمیش باشقانی ) جنابلاری ایله گؤروشه رک آذربایجانلی فعاللارین سون دورومونو آنلاتدیلار.

۱۳۹۲ تیر آینین ۲۲- سی آذربایجانلی مدنی فعاللار محمود فضلی، شهرام رادمهر، آیت(یوروش) مهرعلی بیگلو، لطیف حسنی و بهبود قلیزاده تبریز اینقیلاب محکمه سینین وئردیقی حؤکومه گؤره آجلیق اعتیراضینا باشلایب لار.

دئیلمه لیدیر محمود فضلی، شهرام رادمهر، آیت مهرعلی بیگلو(یوروش)، لطیف حسنی و بهبود قلیزاده ۱۳۹۲ اوردیبهشتین ۹_و تبریزین اینقیلاب محکمه سینین ۳ اینجی شعبه باشقانی قاضی باقرپور طرفیندن قانون سوز تشکیلات یاراتما ایتیهامی ایله ۸ ایل تعزیری زیندان و نیظاما قارشی تبلیغات آپارما ایتیهام ایدعالاری ایله ده ۱ ایل تعزیری زیندان توپلام ۹ ایل تعزیری زینداما ماحکوم ائدیلمیشدی. بو حؤکوم دوغو آذربایجان ایالت دادیگاهینین ۶ اینجی شعبه سیینین قاضی سی اولان ایمانی طرفیندن تایید ائدیلمیشدیر.

آذربایجانلی بو ۵ فعال کئچن ایلین قیشیندا آذربایجانین فرقلی شهرینده مامورلار طرفیندن توتوقلانمیشدیلار و بیر نئچه آی ایطیلاعاتین تک هوجره لی زیندانلاریندا گؤز آلتیندا قالدیقدان سونرا تبریزین مرکزی زیندانینا اینتیقال وئریلمیشدیلر.

دئیلمه لیدیر کی ۱۳۹۲ خورداد آینین ۲۲-سی میللت لر آراسی عفو تشکیلاتی آذربایجانلی مدنی فعاللارا وئریلن بو حؤکمه ایشاره ائده رک ایران دا سئچگی لرعرفه سینده میللی آکتیویست لره، موخالیف لره، سندیکا جی لارا، ایجتماعی و سیاسی فعال لارا اولان باسقی نین آرتماسینا گؤره اؤز نیگران چیلیغینی بیلدیرمیشدی.

اویان نیوزو قایناق گؤستره رک بو خبر پایلاشیمیندا بیر معذرت یوخدور.

یوروم یازین

Back to Top