دیل سئچین

آذربایجان ملی حکومتینین اعلامیه سی

stterxan bayragi

اویان نیوز: اؤنه گلن یازی آذربایجان ملی حکومتینین اعلامیه سینین عینی متنی دیر :

آذربایجان ملی حکومتینین اعلامیه سی

” آذربایجان مجلس ملیسینین انتخاب ائتدیگی آذربایجان ملی دولتی ایرانین استقلال و تمامیتینی حفظ ئتمکله برابر، ایشه شروع ئتدیگینی بو واسطه ایله بوتون خلقه اعلام ئدیر.
بو اعلامیه منتشر اولان گوندن اعتبارا مالکیت خصوصی محفوظ اولماق شرطیله بوتون آذربایجاندا اولان دولت اداره لری تا زا حکومتین تحت اختیارینه کئچدیگیندن، عموم دولت مامورلارینا ئوز وظیفه لرینی دوزگونلوک و صداقتله انجام وئرمه لری تاپشیریلیر٠
تا زا دولتین امرلرینه اطاعت ائدیب، اونون دستوریله رفتار ئده ن کارمندلر ایچون مناسب ایش شرایطی وجوده گتیریله جک، ایشله مکدن امتناع ئده نلر ایسه کمال احترام ایله ایسته دیکلری یئره گؤندریله جکلر٠
آذربایجان ملی حکومتی خلقین سعادت و خوشبخت لیگیندن ئوتری قورولدوغو ایچون عموم خلقی فعالیته، دوزلوگه، آسایش و امنیتی حفظ ئتمگه، بیربیریله قـارداشواری یاشـاماغا دعـوت ئدیر٠
امینتی اخلال ئده ن و خلقین مال، جان، ناموس و حیثیتینه تجاوز ئله ینلر؛ همچنین دولت مالینا خیانت الی اوزادیب دولت اداره لریندن سوء استفاده ئده نلر و یا دولت اداره لرینده خرابکارلیق، مسامحه و ئوز وظیفه سینده کوتاهلیق ئتمک کیمی خائنانه تشبثلر بروزه وئرنلر ایسه خلقین دشمنی حساب اولونوب، ملت و دولت یانیندا نفرت و انزجار قازانماقدان علاوه، قانونی محکمه واسطه سیله مجازات ئدیله جکلر٠
هامیدان خلقه و ئولکه یه خدمت و آذربایجانین گلجگی  یولوندا جدیت گؤزله نیر؛ دولت ایسه اونون شرایطینی وجوده گتیرمگه چالیشاجاقدیر٠
آذربایجان ملی وزیرلر هیئتی عین زاماندا آذربایجاندا ماموریتلری اولان خارجی دولتلرین دیپلوماسی نماینده لرینه اطلاع وئریر که، کما فی السابق اونلارین بین الملل قانونلار شرایطینده اولان حق و اختیارلاری کمال دقت و احترام ایله مراعات اولوناجاقدیر. همچنین دموکراتیک دولتلرین اتباعینین آسایش و امنیتینی حفظ ئتمک یولوندا ملی دولت هئچ بیر فداکارلیقدان خوددارلیق ئتمیه جکدیر. بوگوندن اعتبارا دولته متعلق اولان منقول، غیر منقول اموال، همچنین نقد و جنس و اعتبار ملی، دولت اختیارینا کئچدیگیندن اونلارین ساخلاماغینا موظف اولان دولت مامورلاری، کئچمیشده وئردیکلری تعهد و قبول ئتدیکلری مسئولیت اوزره، اونلاری حفظ و حراست ئتمگه مجبوردورلار. بو اموالی حیف و میل ئده نلر آغیر جزالارلا مجازات گؤره جکلر٠
آرتیق آذربایجان ملی حکومتی تحقق تاپمیش، خلقین اراده سیله داخلی ملی دولتیمیز وجوده گلیب، رسمی صورتده خلقیمیزین آرزو و آمالینی اجرا ئتمگه باشلامیشدیر. خالق ایسه ئوز ملی حکومتینه  وار قوه سیله مساعدت گؤستریب اونون فعالیتی ایچون مناسب شرایط وجوده گتیرمه لیدیر٠
یوخاریدا قید ئدیلدیگی کیمی دولت وار قوه سیله امنیتی حفظ ئتمگه چالیشیر. اونا گؤره خلق ایچون نگران اولماغا هئچ بیر دلیل یوخدور. هر کس ئوز ایشینه مشغول اولمالی، ئوز ایسته دیگی کیمی یاشامالیدیر. بازار باغلاماق، مدرسه لری تعطیل ئدیب، وحشت و اضطراب یاراتماغین معناسی یوخدور. حکومت ئوز برنامه سینی خلقین احتیاجاتی اوزرینده قورموشدور. اونا گؤره خلقی ناراحت ئده ن حادثه لره یول وئرمییه جکدیر. تصادفی حادثه لره ایسه چوخ تئز بیر زاماندا خاتمه وئریله جک. ماجراجولار، آسایشی اخلال ئده نلر صالح محکمه طرفیندن محاکمه و شدید بیر صورتده مجازات اولوناجاقلار. هئچ بیر پیس اتفاق دوشمیه جک. هئچ کسین حقوقونا تعرض اولمیاجاقدیر. ملی حکومت نظمییه اداره سینی تا زا قوه لر، وسیع اختیارات ایله گوجلندیرمیشدیر. هرج و مرج و نا امنلیگه آرتیق میدان وئریلمییه جکدیر. مخصوصا مدرسه لریمیز همان سابق پروگرام لارینی تعقیب ئتمه لی محصللریمیز وار قوه لریله امتحانلارا حاضرلاشمالیدیرلار٠
کندلرده و شهرستانلاردا ایسه جدی صورتده ایشه باشلانیب عادی حال وجوده گلجک و دولت مامورلاری، فدائیلرین و یا غیر مسئول اشخاصین دخالتی اولمادان ئوز وظیفه لرینی انجام وئرمگه قادر اولاجاقلار. فدائی دسته لری انتظام آلتینا آلینیب معین مرکزه تابع اولاجاق، بو واسطه ایله هر بیر سوء حادثه احتمالینین قاباغی آلیناجاقدیر٠
گئدین چالیشین، آسوده اولون ملتیمیزین گلجگی و سعادتینی تامین ئتمک ایچون قبول ئتدیگیمیز وظیفه نی صداقت و ایمانلا انجام وئرین. دولت عموم هموطنلردن بونو طلب ئدیر. “

یوروم یازین

Back to Top