دیل سئچین

آرتوم دینج: ایران حکومتینین فارسلاشدیرما سیاستی تورکجه‌نی قاداغان ائدیر

اویان نیوز: تبریزلی آراش‌دیرماچی و آنکارا اونیوئرسیتئتین‌ده سوسیولوگییا بؤلومونون دوکتورلوق درجه‌سی اوزرین‌ده چالیشان آرتوم دینج بئینلخالق آنا دیلی گونون‌ده آمریکانین سسینه وردیی موصاحیبه‌ده میللی حرکاتدا آنا دیلی فاکتورونون رولو و اؤنمینی شرح ائدیب. «بو گون ایران‌دا فارس اولمایان ائتنیک قروپلارا قارشی، سیستملی، پلانلی و پروقراملی شکیلده فارسلاشدیرما و کولتورقیریمی  سیاستی آپاریلیر. بئله کی، غیری-فارس خالقلارین دیل، کولتور و تاریخلرینی سیلیب و ایران‌لیلیق کیملیگی آدی آلتیندا، فارس دیلی، تاریخی و کیملیینی یئرینه اوتورتماغا چالیشیرلار،»دئیه آرتوم دینج خامنئیی حکومتینین یوروتدیو سیاستی دیرلندیریب.

تبریزلی آراشدیرماچی حساب ائدیر کی، باشقا تورکدیللی جمعیتلر، او جمله‌دن آذربایجان رسپوبلیکاسی ایله موقاییسه‌ده گونئی‌ده‌کی میللی حرکاتدا آنا دیلی داها اهمیتلی رول اویناییر. او کئچمیش‌ده آذربایجان رسپوبلیکاسین‌دا یاشایانلارا قارشی آپاریلان روسلاش‌دیرما سیاستینین بو گون گونئی‌ده‌کی فارسلاش‌دیرما سیاستین‌دن کسکین فرقلندیینی وورغولاییر. «سووئت حکومتینین آسسیمیلیاسییا سیاستی آنا دیلینی قاداغا ائتمیردی، غیری-روس میللتلره نیسبی اولاراق تحصیل ایمکانلاری وئریردی، آنجاق ایران‌داکی فارسلاش‌دیرما سیاستی تورکجه‌نی قاداغا ائدیر و بوتونلوکله کولتور-قیریمی ایستیقامتینده‌دیر.»دئیه جناب دینج موشاهیده ائدیر.

آراش‌دیرماچی علاوه ائدیر کی، سووئتلر دؤنه‌مین‌ده، آذربایجان‌لیلاری روسلاردان فرقله‌ن‌دیردن ساده‌جه دیل دئییل‌دی، دین و عادتلر کیمی باشقا فاکتورلار دا وار ایدی. گونئی‌ده ایسه بو تزادلار دیل فرقی اوزرین‌ده جملشیب.

آرتوم دینجین سؤزلرینه گؤره، ایران ایسلام رئسپوبلیکاسی کیمی توتالیتار بیر سیستئم‌ده غیری-حکومت تشکیلاتلاری واسطه‌سیله قاداغالارا رئاکسییا وئرمک ایمکانلاری سون درجه محدود اولدوغو اوچون ایران‌دا آنا دیلین‌ده تحصیل حاقین‌دان محروم اولان خالقلارین اورتایا قویا بیله‌جکلری تشببوسلردن بیری «مد‌نی اطاعت‌سیزلیک»دیر. او، بو ایستیقامت‌ده بیر ایل اؤنجه ایلده بیر گون فارسجا اوروجو کامپانیاسی حاقدا تکلیف ایر‌لی سوردویونو بیلدیریب.

آمریکا سسی

یوروم یازین

Back to Top