اویان نیوز: آفینادا جومعه نامازی اوچون موسلمانلار آغزینا قدر دولو، یئرالتی ناماز اوتاقلارین‌دا توپ‌لانیرلار.
بو قئیری-رس‌می عبادت یئرلری قانون‌سوز اولسالار دا، بو نهنگ ایجمانین دیگر سئچی‌می یوخ‌دور. موسلمان دونیاسین‌دان کناردا یئرلشه‌ن پایتاخت آفینا – آوروپانین سون مسجیدسیز پایتاختلارین‌دان بیری‌دیر.
عثمانلی ایمپئرییاسین‌دان ۱۸۳۲-جی ایلده موستقیل‌لیک قازانان‌دان سونرا، یونانیستان‌دا هئچ بیر حکومت بو شهرده مسجیدین تیکیلمه‌سینه ایجازه وئرمه‌ییب. ۹۰ فایزی اورتودوکسال خریستیان اولان اؤلکه‌ده بیر چوخو بونو اؤلکه‌یه موناسیب اولمایان، “قئیری-یونان” آدلاندیریب.
لاکین یونانیستان آوروپا بیرلیینه میقراسییا ائد‌نلر اوچون اساس گیریش منطقه‌سینه چئویریلدیینه گؤره اونون موسلمان اهالی‌سی آرتیب.
بعضی حسابلامالارا گؤره اهالی‌سی ۵ میلیون اولان آفینادا موسلمانلارین سایی تخمیناً ۳۰۰ ۰۰۰-دیر و ناماز اوچون رس‌می مکان حاقین‌دا طلبلر بؤیویور.
“بیز موسلمانلار اوچون بورادا مسجیدین اولماماسی بؤیوک فلاکت‌دیر”، پاکیستان-یونان جمعیتین‌دن اولان سید محمد جمیل دئییر.
“یونانیستان دئموکراتییانی، سیویلیزاسییانی و دینه حؤرمتی یارادیب – اما اونلار بیزیم موسلمانلارا عادی، رس‌می مسجیدله تعمین ائتمک قدر حؤرمت ائتمیرلر.”
جومعه عابدلرین‌دن بیری اولان آشیفاق احمد دئییر: “من اؤزومو جمعیت‌دن کنارلاشدیریلمیش هیسس ائدیره‌م.
“بیزیم بایرامیمیز اولان‌دا، توپلانماق اوچون هئچ بیر مکان یوخ‌دور. جمعیت بیزی قبول ائتمیر.”
کازارما پلانی
نئو-فاشیست قیزیل شفق پارتییاسی بؤیودوکجه حکومته تهلوکه‌سیز، قورونان مسجید تعمین ائتمک حاقین‌دا تضییق آرتیب.
پارتییانین عضولری ایممیقرانتلاری دؤیمک‌ده و یئرالتی ناماز اوتاقلارینی داغیتماق‌دا سوچ‌لانیر. پارتییا موعاوینی ایلیاس پاناگیوتاروس ایسه اؤت‌ن ایل منه دئمیش‌دی کی، تورکییه ایله سرحدده یئروستو مینالار یئرلشدیریلمه‌لی‌دیر: “ایممیقرانتلار اؤلکه‌میزه گیرمه‌یه جهد ائد‌رک اؤلسه، اؤز پروبلئملری‌دی”.
اولا بیل‌سین کی، ایبادتخانانین یارادیلماسی اوچون چاغیریشلار تئزلیکله جاوابلاندیریل‌دی.
شهر مرکزینین یاخینلیغین‌دا یئرلشه‌ن، ایستیفاده‌دن چیخمیش کازارما – پایتاختین بیرینجی مسجیدینین مکانی کیمی سئچیلیب.
آغیر داروازالارین آرخاسین‌دا کؤهنه بینالار، یئرده ایسه شوشه قیرینتیلاری و چینقیل سپلنیب. حاضردا آشماق‌دا اولان بونؤوره‌لر سؤکولوب یئنی، ۵۰۰ آدام یئرلش‌دیره‌ن مسجید اوچون یئر ائده بیلر.
بو مسجید تیکیل‌سه اورا داخیل اولان موسلمانلار قونشو خریستیان کیل‌سه‌سینی گؤره‌جکلر و ایکی دین نهایت کی، رس‌می اولاراق چیین-چیینه فعالیت گؤستره‌جکلر.
حکومت ایسرارلی‌دیر کی، لاییحه باش توتاجاق، لاکین کئچمیش‌ده اوخشار پلانلار ود ائدیله‌ن‌دن سونرا سیاسی موباریزه‌یه گؤره یئرینه یئتیریلمه‌ییب.
مالییه بحرانی همچینین بو لاییحه‌نی پوزا بیلر. درس‌لیکلر و سهییه‌یه پولو چاتمایان حکومت دؤولت طرفین‌دن مالیلشه‌ن مسجی‌ده ۱ میلیون آورو پول آییرماسینی بیان ائتمه‌یه چتین‌لیک چکه بیلر.
“کئچمیش‌ده یونان جمعیتینین بعضی حیسه‌لرین‌ده مسجیدین تیکیلمه‌سی حاقین‌دا قورخو وار ایدی، لاکین بیز بو قورخویا اوستون گلملیگیک”، اینکیشاف نازیرلیینین باش کاتیبی ایستراتوس سیموپوولوس دئییر.
“مالییه بحرانی – پروبلئم‌دیر. حکومتین حاضردا دیگر پریوریتئتلری وار، اما بو مسجید تیکیلمه‌لی‌دیر و بیر نئچه آی عرضین‌ده بیزیم بو پروسئ‌سی باشلاماغا فورصتیمیز اولا بیلر.”
اؤلکه داخیلین‌ده ایسه هله ده مقاومت وار.
“ایسلام‌چی تیرانییا”
یونان کیل‌سه‌سی مسجیدین تیکیلمه‌سی فیکریله رازیلاشماغا باشلاییب، لاکین بعضی یوکسک روتبه‌لی دینی شخصلر هله کی، بونا قارشیدیرلار.
“یونانیستان تورک رهبرلیگی آلتین‌دا بئش عصر ایسلام‌چی تیرانییایا دوچار اولوب”، پیرئی‌ده‌کی مقدس نیکولاس کیل‌سه‌سینین باش کئشیشی سئراپهیم دئییر.
او علاوه ائدیر کی، یونانیستان “هئچ کیمه نیفرت ائتمیر” لاکین موسلمانلارین اکثریتی بورا قئیری-قانونی شکیل‌ده”، اونون سؤزلرینجه، “آوروپانی ایسلاملاش‌دیرماق اوچون” گلیب – او، بئله دوشونور.
من اونا دئدیم کی، اونون مؤوقئیی ایسلاموفوبیک و آوروپا بیرلیینین موختلیف مدنیتلره عایید اولماسی دیرینه ضد گؤرونور.
“بیز چوخمدنیت‌لی اؤلکه دئیی‌لیک”، یونان باش کئشیش دئییر. “بیز، بیر یونان میللتیگیک و قالان هر شئی “یئنی امر”این و سیونیزمین سیفاریشلری‌دیر. اونلار بیزیم شخصیتیمیزی کورلاماق ایستییرلر”.
“ایکیوزلوک”
آفینانین کوچه‌لرین‌ده ریلر قاریشیق‌دیر.
“موسلمانلارین اؤز مبه‌دی اولمالی‌دیر”، بانکیر کالی پاتوونیا دئییر.
“دیگر اؤلکه‌لرده یاشایان یونان ایممیقرانتلار اؤز کیل‌سه‌له‌لرینی تیکیرلر و دینلری ایله مشغول اولا بیلیرلر – بو ایکیوزلوک‌دور.”
“بو خریستیان اؤلکه‌دیر و اونلار مسجید ایستییرلرسه، قاییت‌سینلار اؤز اؤلکه‌لرینه”، طلبه ماریوس دئییر.
آفینادا ۳۰۰۰۰۰ یاخین موسلمانین یاشادیغی دئییلیر.
بی بی سی
