دیل سئچین

اؤز مالیندان اؤزونه پای وئرمه سم نئلرسن ؟! - شریفه جعفری

 تابناک … (محسن رضایی )

————

او قدره ر یارامیز وار کی !؛ بیرینی اوخشاییریق ،یاغلاماغا -باغلاماغا باشلاییریق ، او بیریسی چاتلاییر ، قانی سوزور اوره ییمیزدن .هله بیز هئچ،   بو درد داشیان سایتلار ، بو یازیق فیس بوکدا جانا گلیب دی دای!،

آنا دیلیم آغرییر دئییرم ، اورمو گولوم دوداقلارین ایچیر،سوسوزام دئییر!،

قارا داغیم دونور دئییرم ، حبس ده کس آصلانلاریمین اوره یی  اوشویور ،سیخیلیر ،قیریلان قانادلاریندان اوتانیرام اونلارین ،

 قویمایین بو اوغرولاری تالادیلار معدن لریمیزی باغیریرام ،یاغی دئییر منه ، اولدورون بونو دئییر بو ملت خایینی دی ، میللتین امنیتین خطره سالدین دئییر! یازیرام آی رهبر ، آی فلانی میللت اؤلدو آجیندان ،پاتلادی آجیغیندان ، ممنوع القلم اؤلدون دئییرلر ! چوخ دانیشدین یازماغا دا حاققین یوخ داها!.

میللت دسته دسته باغیریر من آتا بابالی تورکم ، دئییر دئنه آزری یم اؤلدوره رم  یوخسا  !!!

 خئرینه اولاندا غیرتیمی اوخشاییر ، اولمایاندا جوک قوشور ، لاغا قویور غیرتیمی !

دین مینمه لی بیر شئی دئییل دئییرم ، آی جاماعات بو کافردی ، آللاهسیزدی بونو یاخینا قویمایین دئییر ،جامعه نی بوش وئر هله  ائولریمیزده مین هاوا یارانیب بیری دینچی ، بیری لاییک ، ائولرین امنیتی مین یئردن پارچالانیب  باجی قارداشلا ،ار -آروادلا ، دده- بالایلا آنلاشا بیلمیرداها !!!

شیعه -سنی  دئیه دئیه تورکیه لی باجی قارداشلاریمیزی بیزه دوشمان قاییریر، آما  شمالی آذربایجاندا گوناهسیز همیده شیعه سوی داشلاریمیزی ان پیس جینایتله اؤلدورن و آللاهین ائوینده کؤپک -دوموز ساخلایان ، میندار ارمنی نی باغرینا باسیر ، مالیمیزی اونا یئدیردیر بیزی ویرسین.

آخی دونیانین هاراسیندا ، آللاهین هانسی دینینده ، هانسی مملکتین قانونوندا اؤز تیکه لنمیش پارچاسینا ، ظولمونن اورتادان ایکی یئره بؤلونموش اؤره یین بیر بیرین ایسته مه سینه تجریه طلب آدی قویولسون یازیلیب دیر؟؟؟

شاد اولوروق یاسا باتیر،گولوروک ،آغلاییر  ، مصیبت گؤروروک تلویزیونوندا چال اویناسین ، دیم دارام یولا سالیر ،

جانی چیخیر ترختور اوتاندا ، پاخیللیغی اوزونه چیخیر دیلینه گتیریر ایچینده کی زیغین ، سئل گوجونه دؤنموش ائل گؤجوندن راحات باش یاسدیغا قویا بیلمیر ، قارنی سانجیلانیر ، اوره یی آغرییر ، ننه من قریبم چیخادیر بیزه ، اوره ییم  سیندی دئییر ، بو دفعه ده آیری اویون ،

 دئین یوخدو اوره یین ده واری می سنین  هئچ ؟ گول کیمین جاوانلاری گونلرجه  باشی اوسته  ساللایاندا ، بوغوب چوله آتاندا، تجاوز ائله ییب یازیق قیزی اولدوروب  مزارلیغا آتاندا ، دیل اوسته دیل کسنده  اوره یین یوخویدو مو؟؟!!

هله لاپ گولمه لی سی  مادر عروسدان چیخان سؤزدی !، محسن رضایی دئییر ایران سیزه (جنوبی آذربایجانا) بودجه وئرمه سه نئیلرسیز؟؟

واللاه بو سؤزو منیم ساوادسیز بی بیم دئسه ایدی دئیردیم  قوجا آرواددی ساوادی دا یوخدو دای ،

ائله بیر کی بی بیم ایشله ییب اونو دولاندیران اوغلانلارینی تهدید ائله یه من سیزین خرجینیزی کسم نئجه دولانارسیز ؟ آخی بی بیمین ده عاغلی کسیر، بیلیر کی  بو سؤزو دئسه گوله رلر اونا !!

آخی دئین یوخدو آی عاغیل سیز هله آذربایجان هئچ ، ائله او تهرانداکی گؤنئیلی لرین یاریسی  بیر گون ایشله مه سه آجیندان اؤلرسن آخی ، بازارداکی لار ، فابریقاچی لار ، اداره ده کی لر ، کارگرلر ،رئیس لر ،  آخی بو مملکتین چرخین دولاندیرانلار کیمدی کی ، تورکلر دئییل می ؟،

او گوندن قورخ کی …

آغزیمیزی آشدیریرسان روسوای اولارسان ها !

  حقیقت آجی اولار آما آخی آدینی سیاستمدار قویوبسان آدام  ، سران مملکتین دن حسابلانیسان آخی !!!

ایللر بویودو آذربایجانین ثروتین گئجه – گوندوز داشییرسیز هله آج سینیز! بیزی قورخودورسان  شعورلو؟؟

بو دفعه  او دفعه لردن  دئییل ، رنگی یوخدو خینانیزین . بو اویانان قوردلارین  اوولاماسیندان  نه سن نه ده قوهوم – قارداشین  راحات اولانمایاجاقسینیز کی چوره ییمیزی ده کسه بیله سیز .

شریفه جعفری

یوروم یازین

Back to Top