دیل سئچین

ابراهیم رشیدی(ساوالان) اطیلاعاتا کؤچورولوب/ ساغلیق دورومو آغیرلاشیب

Savalannn

 اویان نیوز-ا اؤزل: گونئی آذربایجانلی سیاسی آکتیویست ابراهیم رشیدی(ساوالان) تبریز حبسخاناسیندان تبریز اطلاعاتینا آپاریلمیشدیر. 

اویان نیوزون آلدیغی بیلگی‌لره گؤره، هفته‌نین ایکینجی گونو، ۸ آپرئل ۲۰۱۴ تاریخینده گونئی آذربایجانلی محبوس، ابراهیم رشیدی تبریزین مرکزی حبسخاناسیندان تبریز اطلاعات ایداره‌سینه کؤچورولموش و ائله او گونون آخشام اوستوسونده ساغلیق دورومو آغیر اولدوغو اوچون یئنیدن تبریز مرکزی حبسخاناسینا قایتاریلمیشدیر.
گلن خبره گؤره، بو اینسان حاقلاری آکتیویستینین دورومو او قدر آغیردیر کی، اطلاعات ایداره‌سینین مسئوللاری، میللی فعالی ساخلاماغینین مسئولیتینی قبول ائتمه‌دیکلری اوچون تبریزین مرکزی حبسخاناسینا قایتارمیشلار.
سون گونلرده ابراهیم رشیدی‌نین قارداشی آمئریکانین سسینه وئردیگی موصاحیبه‌ده قارداشی‌نین فیزیکی دورومونون اولدوقجا آغیر اولدوغونو سؤیله‌میشدیر. اونون سؤیله‌دیگینه گؤره: حبسخانانین هاواسی سویوقدور و حبسخانا مسئوللاری اونا تکجه بیر پتو وئرمیشلر.بو دا اونون بؤیرکلرینین اینفئکسییاسینا(عفونت) سبب اولموشدور.
ابراهیم رشیدینین قارداشی جلال رشیدی هم ده دئمیشدیر: اونلار ساغالتماق یئرینه ساده‌جه آغری کسیجی درمانلار وئریرلر.
کئچن گون ابراهیم رشیدی‌نین عاییله‌سی، ایبراهیملا گؤروشمک اوچون تبریز حبسخاناسینا گئتسه ده،حبسخانا مسئوللاری گؤروشمک اوچون ایذن وئرمه‌میشلر.
۸  مارت ۲۰۱۴ تاریخینده ابراهیم رشیدی اوچون ۱۰۰ میلیون تومنلیک مولکی گیروو قویولدوقدان سونرا، اهر حبسخاناسیندان تبریز حبسخاناسینا کؤچورولدو.
بو میللی فعال، بیر ایللیک محکوملوق دؤنه‌مینی تاماملاماق اوچون تبریز مرکزی حبسخاناسینا کؤچورولموشدور.
ابراهیم ساوالان، ۲۰ فئورال، دونیا آنا دیلی گونو عرفه‌سینده یوزه یاخین میللی فعاللا بیرلیکده اهر شهرینده بو گونو بیر ائوده قوتلادیقلاری زامان حبس ائدیلمیشدیر.
ابراهیم رشیدی، ۲۶ مای ۲۰۱۲ تاریخینده، اینقیلاب محکمه‌سینین بیرینجی شؤعبه‌سی طرفیندن ۴ اؤیرنجی(طلبه) آکتیویستی ایله بیرگه موحاکیمه ائدیلیب، حؤکومته قارشی تبلیغاتی اتهامی ایله بیر ایل حبسه محکوم ائدیلدی.
بو حؤکم، آپئلیاسییا(تجدید نظر) محکمه‌سینین دؤردونجو شؤعبه‌سینین رئیسی، ایمانی آدلی حاکیم طرفیندن تصدیق ائدیلدی.
ابراهیم رشیدی اؤتن ایللرده دفعه لرله مولکی گئییملی‌لر طرفیندن حبس ائدیلیب و اینقیلاب محکمه‌سی طرفیندن محکوم ائدیلمیشدیر.
داها اؤنجه ابراهیم رشیدی، ۲۰۰۸-ین قیشیندا اورمییه حبسخاناسیندا بئش آیلیق حبسینی کئچیرمیشدی.
بین الخالق عفو تشکیلاتی،۱ آپرئل و ۱ مای ۲۰۰۶ تاریخلرینده بیانات وئرمکله ابراهیم رشیدی‌نین(ساوالان) حبسی و اونا قارشی اولان تضییق‌لری قینامیشدیر.
سرحدسیز رئپورتئرلر تشکیلاتی دا ۲۲ اییون ۲۰۱۰ تاریخینده وئردیگی بیاناتلا بو ژورنالیستین حبسیندن خبر وئرمیشدیر.

یوروم یازین

Back to Top