دیل سئچین

اسماعیل جمیلی بئی “انجمن قلم آذربایجان جنوبی”دن آیریلدی

اویان نیوز : اسماعیل-جمیلی-150x150سایقیلی قلم انجومنی نین عوضولری و سوروملولاری

نه یازیق کی  چوخلو اومودلار و آرزولارلا یاراتدیغیمیز، قلم انجومنی­نین سیرالارینی ترک ائتمک قراریمی بیلدیرمک ایسته ییرم. بو آجیناجاقلی قراره من بیر گونده گلمه­ میشم.

من اوولدن  بو انجومن­ین، بوتون گونئی آذربایجانلی قلم صاحیبلری­نین وطن دیشیندا یاشایانلاری اوچون بیر دموکراتیک، آچیق و صینفی-سیاسی قوروم کیمی فورمالاشماسی اومودیله­  بو انجومنه قوشولدوم ،  نه یازیق کی انجومن­ین رهبرلی­یینده هئچ بیر عوضوه جاوابده اولمایان مرکزین عمله گلمه­ سی، بو انجومنی، بیر قاپالی، غیری دموکراتیک وسیاسی ایدئولوژیک محفیل حالینا گتیریب چیخارتمیشدیر.

انجومنی بیر محفیله چئوریمکده اولان بو مرکز، بیر اورتا عصیرلره منسوب اولان فئودال ایقتیداریلا، ایسته­ دی­یینی ائدیب، عوضولرین نئچه­ سی­نین استعفاسینا و اوولدن انجومنه ماراخلی اولانلارین انجومن­دن ایلگی­لرینی قیرماسینا لاقید قالیب، عوضولوکلرینه دوام ائدنلرین حتی سوآل­لارینی جاوابلاندیرماق ایسته­ میر. خوشلارینا گلمه ­ین سوآل­لاری قورولتایا حواله ائدیب، و قورولتایدا بو سوآل­لارین آلتیندان قاچماق اوچون، ایندیدن هم مسلکلرینی انجومنه دولدورور. بیر سٶزله، اینقیلابدان سونرا تهراندا دوقتور هیئت و دوستلاری­نین قوردوغو “انجومن آذربایجان” کیمی، بیر ایدئولوژی­نین ایشغالینا گتیرمک آددیم آددیم و دوشونولموش شکیلده قاباغا گئدیر. بیرطرفدن غیری دموکراتیک داورانیش، اساسنامه ­نی پوزماق، انجومنی ایدئولوژی وورغونلاریلا اٶز “حق” اولمالارینا بیر قارانت تشکیل ائتمک و بیر طرفدن ده بوتون بونلار حاقیندا بیر سس اوجالدیغی یا بیر سوآل وئریلدی­یی حالدا، فئودال ایقتیدارینه بنزر بیر نخوت­ایله، جاواب وئرمکدن آچیق آیدین ایمتیناع ائتمک. بو مرکزین باخیمیندا “عوضو” بیر رعیت­دیر، سوآل وئرمه­ سی­نین قاباغینی آلا بیلمه ­سه ده، جاواب وئرمک، قیامته (قورولتایا) حواله اولونور. انجومنه حاکیم اولموش بو مرکزین، یالنیز مجازی فضادا بیر ایکی ایش گٶرموش اولسادا، پرده آرخاسیندا اصلینده فاجیعه حئساب اولمالی اولان، بیر سیرا مضحکه­یه بنزر ایشلریده  آز اولمامیشلار. بو مرکز اٶز مسلکداشلارینی انجومنه داخیل ائمک عملیاتی­نی سپتامبر آییندا باشلادی. ایک کاندیدین عوضولویو ۲۰۱۲  دوققوز سپتامبر تاریخینده کئچیریلن ایجلاسدا تارتیشیلدی. بو شخصین انجومنه عوضو اولماسینی موناسیب حئساب ائتمه ­ین بیر عوضو، دبیرلر هئتینه بو ایشه باخمادان اٶنجه بو “ایلک کاندید” حاقدا اولان سندلرله تانیش اولمانی تکلیف ائتدی. چوخ ایلگینج بیر رفتار کیمی، بو مرکز بئله بیر سندلرله حتی تانیش اولماغی لازیم گٶرمه­ دی!

 آیلار اٶتدوکجه،  اٶز مسلکداشلاریندان اولمایان عوضولرین سوآل­لاری جاوابسیز قالدی، بیر محفیل کیمی ییغیشیب پالتاکدا تکراری سٶزلر دانیشماغا چوخ هوسلی اولسالاردا، اونلارا تنقیدی یاناشماسینی ظن ائتدیکلری مئدیا   طرفیندن مصاحیبه دعوتینی جاوابسیز قویدولار و سون زامانلار منیم ده یازیلی  ایسته ییمه بئله جاواب وئرمه ­دیلر. چوخ تاماشالی­دیر کی بو مرکزدن سوروشدوغو سوآلینا، آیلارلا جاواب آلا بیلمه ­ین انجومن عوضوی، چوخ قیسا بیر زاماندا یاشادیغی اٶلکه ­نین ناظیرلر کابینتیندن، اٶلکه رهبری­نین سفری حاقدا معلومات آلماقدا هئج بیر چتینلیک اولمادان موفق اولموشدور!

 دیرلی دوستلار!

ایشاره ائتدی­ییم انجمونده ایکی گئدیشات  بیرلیکده دوام ائتمه ده دیر

بیر طرفدن انجومنین ایلک یارانماسیندا اونا اومود بسله­ ینلرین بیر چوخو یا یازیلی استعفا وئریرلر یا عملده انجمنله موناسیبتلرینی قیرماقلا، بو قورومدان اوزاقلاشیرلار. بونلاردان ۱۱ نفری­نین آدلاری منه معلومدور و سیزلر یقین کی، دوکتور هادی بی خسروشاهی، دوکتور محمد رضا  بی هیئت، علی رضا  بی جوانبخت و ناصر بی مرقاتی­نین استعفاسیندان خبریز واردیر.

یوخاریداکی گئدیشاتلا  موازی اولاراق، انجومنه، میللی حرکاتلا دوشمنلیکده “آد” قازانمیش معیین ایدئولوژی منسوبلاری دوشونولموش بیر پلان اساسیندا جذب اولورلار. بو شخصلرین سایینا آرخایین اولان “مرکز”، هر منتقد سسین صاحیبنی، ایندی­دن قورولتایدا میدانا چیخماغا حواله وئریر.

مسئله ­نین باشقا فاجیعه ­لی یٶنلری چوخ اولسادا، دئییلنلرین هر بیری بو غیری ساغلام، غیری دموکراتیک، جاوابده اولمایان سیاسی ایدئولوژیک محفلی ترک ائتمه ­یه یئتری قدر آغیر بیر سبب­دیر.

سون سٶز اولاراق  دئمه لییم کی ، بیز قلم انجومنی قورارکن، بو انجومنی باغیلی محفیله چئویرمک چابالارینا  تانیش ایدیق. او زامان،  بو انجومنی بیر ایدئولوژیک تشکیلاتی محفیل حالینده اله آلماغا آچیق-آیدین پلانلار واریدی. او زامان بو پلانلارین قاباغیندا دورانلار، انجومن­ین ایداره­ سیندن کناردا قالمالاریلا، همان پلانلار ایندی بیر آز گئجیشسه ­ده حیاته کئچیر.

چوخ آرزولالا یاراتدیغیمیز انجومن­ین سیرالراینی ترک ائتمک آجیناجاقلی اولسادا، یارانمیش دوروم دا ، یالنیز  ساغلام آددیم کیمی گٶرونور.

قوروجولار هیئتینین عوضوو

دبیرلر هیئتینین  عوضوو

 اسماعیل جمیلی

۲۸ دسامبر ۲۰۱۲

کالیفرنیا

آذربایجان ایشچیلری

یوروم یازین

Back to Top