اورمودا ایکینجی تحکییه ادبیاتی آخشامی کئچیریلدی

999942_488447744597139_1875928812_n

اویان نیوز: اورمو شهرینده تحکییه ادبییاتی ایله باغلی توپلانتی کئچیریلمشدیر.

نوید آذربایجان هفته لیگی نین وئردیگی خبره گؤره دی آیینین دوققوزو اورمونون «مجتمع فرهنگی هنری» سالونوندا تحکییه آدلی حئکایه آخشامی کئچیریلمیش. بو ادبی اوتورومدا تحکییه یازیچیلاریندان باشقا اوبیری شهرلردن گلن یازارلار و ادبیاتیمیزا ماراقلی اولان چوخلو گنجلر ایشتیراک ائتمیش. بزرگ امین جنابلاری و خانیم نسرین شیرمحمدزاده ده تحکییه آخشامینین ادبییاتچی قوناقلاریندان ایمیش لر.
تحکییه آدلی ادبی درنک بیر ایل اؤنجه دن اورمونون «ایرشاد ایسلامی فرهنگسرا»سیندا ایشه باشلامیش و بو درنگین هر هفته نین شنبه گونو اوتوروم لاری اولور. حئکایه، ناغیل، اؤیکو، ترجمه و دیگر ادبی ساحه لرده فعالیت گؤستریرلر.

ایکینجی تحکییه آخشامی آدلی اوتورومون باشلانیشیندا پرویز فروهر “برف” آدلی حئکایه سی ایله چیخیش ائدیب اوشاق فولکلورونا عایید دانیشمیش. دولاشیق، آغاج هر درده علاج و گؤیدن جئویز یاغیر فروهرین اثرلریندن ساییلیر.  پرویز فروهرین آردیجا خانیم حکیمه رسولی نوستالژیک بیر یازی ایله چیخیب ائتمیش.
اوتورومون نوبتی ایشتیراکچی سی ناصر ساجدی، رئالیسم سبکینده روح آدلی اثرینی اوخودوقدان سونرا، تحکییه ترجومه گروهونون باشچیسی “راضیه افتخاری” تریبون آرخاسینا کئچدی، خانیم افتخاری «گیله نار یارپاغی» آدلی یازدیغی حئکایه نی اوخومادان اؤنجه تحکییه ترجومه گروهوندان سؤز آچیب و ادبییاتیمیزین دونیا ادبیاتی ایله آیاقلاشماسینین گرکلی اولدوغوندان دانیشدی. یازار، قادین و قادین حاقلاری اوزره اجتماعی یازیسینی اوخوموشدور. راضیه افتخاری نین “اشتیاق” آدلی کتابی یایینلانمشدیر.
تحکییه نین داوامیندا «آذربایجان اینجه صنعتی» کتابینین یازاری خانیم “فاطمه میرحسن پور” فرانسیز یازار «شارل پرو»دان سؤز آچیب دانیشیب. او اوشاق ادبییاتینین نه قدر اؤنملی اولدوغونو خاطیرلادیب بو قونویا داها آرتیق فیکیر وئرمه یی اؤنملی حئساب ائتمیش. فاطمه میرحسن پورون ترجومه و رسیمله دیگی اثرلر، پیشیک داستانی، مترجمین وئردیگی ایضاحلار ایله پرده اوزره ادبیاتچی لارا نمایش وئریلدی. اسلاید نمایشین آردیجا تحکییه درنه ینین مدیری محمد صبحدل جنابلاری چیخیش ائتمیش. صبحدل میللتلر آراسی اورتاق فولکلور قایناقلارینا ایشاره ائده رک، آذربایجانین «جمشیدخان» آدلی فولکلور اثرینی قونوسوندا دانیشیق آپارمیش: ندن غنی بیر فولکلورا مالیک اولدوغوموز حالدا اونون اوغروندا ثمره لی ایشلر آپارمامیشیق. بو ندن آسیلی دیر!؟  سوروسو ایله دینله ییجی لری دوشوندورموش.
اوتورومدا ادبیاتچی وحید فائزپور «وبا آداسینا یاخین بیر آدا» آدلی حئکایه سینی ده اوخوموشدور. اؤیکو یازاری وحید فائزپور حئکایه دن سونرا چیخیشیندا نثریمیزین گلیشمه سیندن و اونون توپلوما باغیشلادیغی ائتکیدن دانیشمیش. او تحکییه آدلی درنه یین آپاردیغی ایشلری غربی آذربایجان اوستانیندا ایلک دفعه اولاراق باش وئردیینی موثبت آددیم اولاراق دیرلندیریب بوتون یازارلارا اوغور آرزیلامیش.
باشقا گنج یازارلاردان، میر رضا ساجدی “حقیقت گیریشی” آدلی حئکایه سی ایله، یاسین حاجی زاده ایسه “ویصال پارکی” آدلی حئکایه سی ایله سونونجو چیخیشچی لار اولموشلار. اوتورومون آپاریجیسی “رضا حقی” اولموشدور.

1554398_664243136945688_358161006_n1 2 3 4

یوروم یازین

Back to Top