اویان نیوز: بئجه‌رمه (تربیت)هر یاشدا وار، ۷-ده، ۷۰-ده ده. باشقاسینی تربییه ائتمک، اؤزونو تربییه ائتمک‌دن باشلاییر. اؤزونو تربییه ائده بیلمه‌یه‌نین وئردیگی تربییه چوخلو زامانلاردا اوغورسوز اولور. تربییه یالنیش دان قاچماق‌دیر، دوغرویا یؤنلمک‌دیر، اؤزو ایله موباریزه‌دیر ،تمیزلنمک‌دیر، آرینماق‌دیر، صاف‌لاشماق‌دیر،گؤزل‌لشمک دیر…عالیم‌لر دئییرلر کی، اوشاغین دونیاگؤروشو آغ ورق کیمی‌دیر، اورا ایستدیگین سؤزلری یازا بیلرسن، آنجاق بیر مسئله ده وار کی، هر اوشاغین ایمکان‌لاری و پوتانسیال‌لاری بیر اولمور.تمیزلیک ایکی جوره اولور: مادی و معنوی. هر بیری ده جدی تربییه طلب ائدیر. ال-اوزوموزو، اوست-باشیمیزی سو ایله، صابونلا تمیز یودوغوموز کیمی، معنوی دونیامیزی دا صمیمی اعترافلا، عذرخواه‌لیقلا ،توبه ایله تمیزله‌یه بیلریک. اؤزوموزدن باشلامالیییق کی، باشقا‌لارینی دا تربییه ائده بیلک.باشلایاق معنوی تمیزلیک‌دن. اگر بیر عائله‌ده والدئیین‌لر اوشاق‌لاری ائشیده-ائشیده قونشونون آرخاسینجا دانیشیرلارسا، سونرا دا ائله قونشو ایله اؤزلشنده، اوزلرینه صمیمیت ماسکاسی تاخا‌راق شیرین-شیرین صحبت ائدیرلرسه، اونلارا وئریلدیگی تربییه‌نین هئچ بیر تأثیری اولمایا‌جاق. هله بلکه همین اوشاق والدئینین او قدر ده صمیمی اولمادیغینی دوشونه‌جک.
اصیل تربییه سؤزله اولمور، گؤزله اولور. یعنی، اوشاق ائتدیگینه یوخ، گؤردوگونه اینانیر. ائشیتدیگین‌دن داها چوخ گؤردوگون‌دن درس آلیر. اعتراف عذرخواه‌لیق مدنیتی تربییه‌ده چوخ موهوم‌دور. صمیمی اینسان اؤز یالنیشی اوچون اوشاغین‌دان عذر ایستمک‌دن چکینمز. بو قارشی طرفی تربییه ائتمیین ان گؤزل یولودور. عذر ایستمک اسکیک‌لیک دئییل، تمیزلنمک‌دیر، دوروستلوک‌دور، بؤیوکلوک‌دور.معنوی تمیزلیک صحبتینی ایستدیگیمیز قدر اوزاتماق اولار، آنجاق بیرجه اونو قئید ائدیم کی، باشقاسینی تربییه اؤزونو تربییه‌دن باشلاییر.ایندی ده مادی تمیزلیک و بو ایستیقامتده تربییه‌دن دانیشاق. مادی تمیزلیک والدئیین‌لردن باشلاییر و مرحله‌لرله داوام ائدیر. کؤرپه‌نین یاخاسین‌دان آسیلمیش تمیز دسمال‌دان توتموش، اونون یاتاغین‌داکی تمیز ملفه‌یه قدر هر شئیین تربییه‌یه بیر بیر تاثیری وار.
تمیزلیک تربییه‌سی کومپلئکس بیر ایشدیر و گون بویو داوام ائتدیریلمه‌لی‌دیر. اوشاق یوخودان دوران همین، دوشوندوگو ایلک ایش تمیزلیک اولما‌لی‌دیر. یاتاغین ییغیشدیریلماسی، اوتاغین سلیقه‌یه سالینماسی، ال-اوزون یویولماسی، دیش‌لرین فیرچالانماسی، ساچ‌لاری داراماق، دیرناق‌لاری توتماق، پالتارلاری اوتولمک، آیاققابی‌لاری تمیزلمک تربییه‌نین معین چالارلارینی ایفاده ائدیر.بعضن آنا جانی یانان‌لیق ائده‌رک اوشاغین گؤرمه‌لی اولدوغو ایشلری اؤز بوینونا آلیر. اوشاغین یاتاغینی ییغیشدیریر، پالتارلارینی یئرینه آسیر، ماساسی‌نین اوستونو سلیقه‌یه سالیر، آیاققابی‌سینی تمیزلییر و….. اعتراف ائدک کی، فداکارلیغی ایله اولونان آذربایجان آناسی‌نین بو جور داورانیش‌لاری چوخلو زامانلاردا اوشاغین تمیزلیک تربییه‌سینه پیس تأثیر گؤستریر. آنا‌لار اونا نایل اولما‌لی‌دیرلار کی، اوشاق هئچ کیم‌دن کؤمک گؤزلمه‌دن سوپورگنی، یا دا توزسورانی گؤتوروب یاتاغی‌نین یانینی تمیزلمیی عادت ائتسین، پالتارلارینی اوتولومه‌یی اؤیرنسین، تمیزلیگی اؤزونون حیات ایستاندارتینا چئویرسین.
تکجه ال اوزون، اوست باشین دئییل، اطراف موحیطین ده تمیزلیگینه چالیشماق هر بیریمیزین اینسانلیق بورجودور. تمیزلیک گؤزل‌لیک‌دیر ،اینسانلیغین ان موهوم شرط لرین‌دن بیری‌دیر. تمیز اولماق و تمیزلیگی یاراتماق بیزیم ان موهوم اینسانلیق بورجوموزدور. اوجا پیغمبریمیز حضرت محمد (ص) هئچ سئومدیگی ۴ خصوصیت‌دن بیری‌نین پینتیلک اولدوغونو بیلدیریر. بو بیلگی بیزه تمیزلیگین دینیمیزده نئجه حسساس مسئله اولدوغونو اورتایا قویور. بوتون عبادت‌لر اینسانین روحن، جیسمن تمیزلیگی اوچون‌دور. آللاه بیزی تمیز اولا‌راق یارا‌دیر و تمیز قالماغی اؤیره‌دیر.تمیز اولاق، تمیز اولماغی تبلیغ ائدک کی، الله دا بیزه تمیز اولماغی نسیب ائتسین…!
کؤچوره‌ن: مارال اورمولو
قایناق: بیلیم سسی
