دیل سئچین

"اوّل من اؤلدوم، سونرا سیگارام سؤندو..." / سهند افشاری

sehen-efshari202

اویان نیوز: بو گون گونئی آذربایجانلی شاعیر و میللی فعال سهند افشارینین اؤلومونون یئددینجی ایلدؤنومودور.  

آشاغیداکی شعرلر مرحوم سهند افشاری یه عاییددیر.

حسرت

منی آنادان اولما میشدان اونجه

یول اوسته قویدولار

اونداندی کی یوللار یولچوسویام

یوللار یورقونویام

یوللار وورغونویام

هله . آنا سوتون دادین آنمامیش

سوتو کسدیلر منه

اونداندی کی حسرتله دولغونام

آنا یوزونه حسرت

آنا دیلینه حسرت

آنا وطنیمه حسرت

صبریم بیتمه دن

ایللردی کی بو حسرتی اوزومله داشیییرام

 

 

 

 

 

بیز اوچ یولداش ایدیق

بیز اوچ یولداش ایدیق،

من، تانری، بیرده سیگارام

اول من یاناردیم،

سونرا سیگارام یاناردی،

تانریم باخاردی

یولون سونوندا،

اول من اؤلدوم،

سونرا سیگارام سؤندو

اوچوموزدن بیریمیز قالدی،

تانری کیمسه ­سیز قالدی

او زامان،

او زامان تانری آنلادی،

آنلادی،

آغلادی

مزاریم اوسته یاش تؤکوب قورتاردی.

یوروم یازین

Back to Top