دیل سئچین

ایسفندین 8-اینه گوره بیر یازی

اویان نیوز : یولداشلارینان ۱۰گون قاباغدان قرارلاشمیشدیق اویونا گئده جاییق،حاضیرلیقلاردا اولموشدو.بیز بیر مینی بوسلوق تیراختورچو و البته بونو آرتیرمالیام کی آزربایجانچی ایسفندین ۸-ایزی صوبح تئزدن ساعات ۷ده هامی میز ماراغانین آنا میدانیندان بیر یوخاری شوقونان یولا دوشدوق … ائله ماراغادان چئخاندا گوزوموز نیروی اینتیظامی امک داشلارینا ایشیقلاندی …ماراغانین بسیج میدانیندا ایکی دنه پیکاپ بئش التی نفر سرباز و کادر اسلحه اللرینده دایانمیشدیلار ..اوشاقلار باشادیلار ملوانان شارکیسین اوخوماقا و بیلدیلر کی ایش آیری دیر…گئد گئده بینابدا دا گوردوک … بینابین نیرولاری لاب زیرپی(zırpı) بیر زادیردیلار ،اوشاقلار قورخموشدولار و دئیردیلر بیزی قویمایاجاقلار اویونا چاتاق…

هرنه ایسه اورداندا کئچه بیلدیک و میللت بیر راحات نفس چکدی… عجب شئرده ده ماشینین مداریکینی آلدیلار سونرا ایزن وئردیلر کی گئده بیلر سیز…توفارقانین گیریشینده بیزی دایاندیردیلار و شوفرین مداریکین ایسته دیلر، میلی کارتین و موبایل نومره سی آلدیلار ، بیر ستوان ۲ درجه سی اولان چئخدی مینی بوسو آختاردی و آدلاریمیزی سوروشدو و عکس لریمیزی سالدی ، داها میللت ایسترسدن اولوردو ،آخ نیه بیزیم شکیلیمیزی چکیرلر ،آدلاریمیزی نیه سوروشور،شوفری نیه اوُ طرفده آپاریبلار دانیشدیریرلار. نه ایسه اوردان چئخاندان سونرا بیرآز دانیشدیم و میللته دئدیم کی ساکین اولون ،هئچ زاد اولماییب و بیز مطلق اویونا گئدمه لیک و گئده جییک .شوفریمیزینده آراباسینین سس سیستمی دووزگونودور … باشلادیق چال اویناسنا ودیلخوشلوق ائله دیق … یولدا بیر نئچه دنه ایست بازرسی گوردوق و شوکور آللاها کی اونلاردان دا کئچه بیلدیق …
یولدا چوخ گوزل صحنه لر گوردوق و دویونجا لذت آپاردیق،من بارماقلاریمی چسبله میشدیم و بوذ قوورد ایشارتین هر آن یولدان کئچن تیراختورچولارا گوسته ریردیم …ان چوخ گوردوغوم آرابالار کی تیراختور اویونونا گئدیردیلر ۲۵ب و ۲۷ ط ایدی یعنی ماراغا و قوشاچا،اینصافا قوشاچای آرابالاری چوخودور…
بیز ساعات اون یاریمدا قوورد دره سنده یدیق و بونا گوره چوخ سئوینیردیق کی آنجاق یئتیشدیق و بیر نئچه ساعات بوردا یاشیاجاییق….
ایستادیوما میللت سئل کیمی گئلیردیلر،ساعات ۱۱ده تقریبا آشاقی طبقه دولموشدو و بالا بالا میللت یوخاری طبقه ده یئر آختارماغا چئخیردیلار…
بیر چوخ یولداشلاریمی اوردا گوره بیلدیم و بونا گوره تیراختورا مینت دارام…دوغرودان بیر نئچه ساعات قوورد دره سینده یاشادیم…
یاریشن باشلاماغینا بیر نئچه دقیقه قالیردیر کی اویونچولار میدانا گیردیلر و میللت آلقیشلاماقدان یورولمادان اونلاری القیشلاییردیرلار…الجزیره اویونچولار محو اولموشدولار بوو تیراختورچولارین آلقیشلاریندا و اونلاردان ویدیو چکمه غا باشلامیشدیلار …بوو آرادا میللت معروف شعاریمیزی سسلندیردیلر ****یاشاسین****آزربایجان**** و عرب لر بوو قدر وطن سئورلیکده قالمئشدیلار و فقط آغزیلاری آچیلمیشدی و یوما بیلمه ییردیرلر…
هر بیر نئچه دقیقه ده بیر میللی شوعارلاریمیز سسلنیردی :
اوُرنک اوچون : یاشاسین / آزربایجان
تورک دیلینده مدرسه / اولمالدیر هر کسه
اوروم زنجان اردبیل / بوو سس تبریزدن گئلیر
تیراختورو ائل ایسته ر / شرفلی میللت ایسته ر
تورکلرین ایفتیخاری / تیراختور تیراختور
بیز ماراغا میلی فعاللاری اولاراق بیر پارچا حاضیرلامیشدیق و ۴۰اینجی دقیقه پارچامیزی چئخارتدیق و شکیللرین سالاندان سونرا یئندیردیق و یئریمیزی دئگیشدیردیق نیه کی ساتقین و مانقورد چوخودور و قاتیلدیق میلته و ایزیمیزی تاپا بیلمه دیلر…
۴۵اینجی دقیقه بیر گوزل پارچا چئخدی و میلت بوذقوورد ایشارتیله اونلاردان تشککور ائله دیلر و دوغروداندا گوزل یازیلمیشدی ..یاشاسن لار واللاه من کی چوخ سئویندیم،تیراختورون اویونوندان چوخ بوو ایکی پارچایا سئویندیم…گئنه یاشاسین میلی فعاللاریمیز…
میللی تیمیمیزین ده اووزو آغ اولسون دوغرودان بیزلرین گوجویله گوزل اویناییردی ونهایت یاریشمانی اووچ بیره اوتدو و داورین چرت قیضاوتی و الجزیره نین آفساید گولو یاددان چئخدی…
بیز توپلاندیق مینی بوسوموزون یانینا و چال اویناسینلارینان یولا دوشدوق … بیر بیر اوینادیق و ال چالدیق و شادلیق ائله دیق هر کس تبریز ماراغا یولوندا چال اویناسینا مشغولویدو و آیری دردلر یاددان چئخمئشدی …باهالیق،ایش سیزلیک و هر نه درد اولورسادا یاددان چئخدی و تیراختورون اوتماقی و البته آزربایجانیمیزین اوتماقی بیزی داها ماراقلاندیریردی…
ساعات گئجه ۱۱ده ماراغایا چاتدیق و بیر نئچه دقیقه ده ماراغا خیاوانلاریندا شادلیق ائله دیق و بو سئوگی ایله اوُ گئجه میزی صوبحه چاتدیردیق…

یاشاسین آزربایجان
یاشاسین ماراغا
یاشاسین تیراختور

xx2

یوروم یازین

Back to Top