دیل سئچین

بؤیوک اینسان حاققیندا کیچیک بیر نوت - حیدر بیات

zehtabi

اویان نیوز : پروفسور زهتابی‌دن بیر شکیل وار الده. اورادا قوجا یئتمیش- سکسن یاشلی بیر کیشی اوتوروب ایکی گنجین یانیندا، موبل اوزرینده دئییل، یئرده فرش اوستونده اوتوروبلار. اونلارا دیل درسی دئییر. کسینلیکله چوخ دا تخصصی بیر شئی‌لر دئمه‌ییر، دیلین ایلکین نسنه‌‌لرینی، سس‌لی، سس‌سیزلرین نئجه یازیلماسینی اؤیره‌دیر اونلارا.
بو شکیله باخاندا ساده‌جه بیر شکیل دئییل، بؤیوک بیر اسطوره، بیر فلسفه جانلانار گؤزومون اؤنونده. بیلیرسیز نییه؟ او یئر اوسته اه‌یله‌شیب الیفبا، سسلی- سس‌سیز اؤیره‌دن بو قوجا کیشی، دیلین و تاریخین اَن بؤیوک اوزمانلاریندان بیریسی‌دیر. او موسکوادا، باغداددا یونیوریسته اوستادی اولوبدور. بو قونودا اؤنملی کیتابلار یازیب‌دیر. دونیانین جانلی دیل‌لریندن نئچه‌سینه تسلطی واردیر، نئچه‌سیله تانیش‌دیر. روسجا،‌ عربجه، انگلیسجه، آلمانجا، فیرانسیزجا، استانبول تورکجه‌سی، فارسجا…
او باتی‌نین هر بیر اؤلکه‌سینه گئتسه، سورغو سؤالسیز یئر وئررلر بیله‌سینه. آما او قوجا کیشی او یاشدا شبستردن مینیر تبریز آوتوبوسونا، تبریزدن تهران، تهراندان شیراز و اورادا گئدیب بیر موعلمین ائوینده قالیر نئچه گئجه، اونا اؤز دیلینده یازماق اؤیره‌دیر، اونا یاردیمچی اولور. او موعلم سونرا ایران تورکلرینه عایید اولان اؤنملی کیتابلاردان بیریسینی یازیر. قاشقایی سؤزلوگو و اونون یازاری اوستاد اسدالله مردانی‌دن سؤز گئدیر بورادا.
قوجا پروفسور تهرانین حاشیه شهرجیک‌لری‌نین بیریسینده، گنج بیر شاعیره قوناق اولور. دؤنه‌لرجه اونون ائوینه گئدیر، گلیر. سن یاز من اصلاح ائدرم دئییر. «ایکی دفتر یازدیم، پروفسور زهتابی اصلاح ائله‌دی، اوچونجو دفترده دئدی سن دای یولا دوشوبسن، دوز یازیرسان» ( حسین محمدخانی، گونئیلی‌نین بیزه سؤیله‌دییی خاطیره‌لردن)
اینسان باشقا میللت‌لرین تاریخلرینی اوخویاندا بئله بیر سیمالارا چوخ راست گلیر بلکه. قاییدیب اؤز میللتینه باخاندا بئله سیمالارین یوخ سوییه‌سینده اولدوغونو گؤرنده ایسه، اؤزونه قوشقولانیر. گئرچکدن بیز میللت اولسایدیق، آخی بیزیم ده میللی ساحه‌ده اسطوره‌لریمیز اولاردی. پارادان، مقام‌دان، راحاتلیقدان، پوز وئرمه‌لردن کئچن بیر اینسان. قورو یئری یوموشاق موبل‌لارا ترجیح ائدن، اوچاغی قویوب کؤهنه آوتوبوسلارلا مین‌لر کیلومئتر یول گئدن بیر گنج، بیر اورتا یاشلی، بیر قوجا.
اؤز آرامیزدیر، زهتابی اولماسایدی من کسینلیکله اؤز میللت اولدوغوموزا اینانا بیلمزدیم.
پروفسور زهتابی دیل و اؤزلجه تاریخ ساحه‌سینده ده بؤیوک، بلکه تایسیز ایشلر گؤروبدور. منجه اما اونون اسطوره‌وی یؤنو، اؤیرتمنلیک یؤنودور. شهر- شهر قاپی- قاپی گزیب، یاساق بیر دیله قوجا یاشلاریندا اؤیرتمن اولان اسطوره زهتابی.

حیدر بیات

یوروم یازین

Back to Top