دیل سئچین

تانینمیش هنرمند فاطمه قنادی ایله ستارخانین نوه سی دونیالارین دگیشدیلر

اویان نیوز:  دوام ائدیر آیریلیق

  آیریلیق دردینی چکمه ین بیلمز

ائلدن آیری دوشن گؤزیاشین سیلمز

دئیرلر اینتظار خسته سی اؤلمز

آیریلیق آیریلیق آمان آیریلیق

هر بیر درد دن اولار یامان آیریلیق

… درمان سیز بیر درد دیر اینان آیریلیق

۱-  بهروز سردار ملی

سون گونلر تاسف له تبریزده ایکی ایتگییه شاهید اولموشوق . میللت وریندن “میللی سردار” لقبین کسب ائدن ستارخانین نوه سی بهروز سردار ملی بیر نئچه گون بوندان اول اوزون بیر خسته لیک سوردوکدن سونرا ؛ دوغولدوغو شهرده دونیاسین دگیشمیشدیر . او ستارخانین اوغلو یدالله خانین اوغلو ایدی کی ۱۳۲۴ ینجی ایل تبریزده دونیایا گلیب ائله چوخ سئودییی تبریزده ده تورپاغا گئتمیشدیر . رحمتلی بهروز سردار ملی بویوک آتاسینین آدین دیری ساخلاماقدا یاخشی رولو اولموشدور . تانری دان ستارخانین بو یادیگارینا بول – بول رحمت لر دیله ییریک .

۲-  فاطمه قنادی ( وارتوش )

بویوک هنرمند رحمتلی فاطمه خانیم قنادی ” وارتوش” دونیا شهرتلی موزسین اوستاد علی سلیمی نین حایات یولداشی دا نئچه گون بوندان اول تبریزده دونیاسین دگیشمیشدیر . او رحمتلی ۱۹۲۰ ینجی تفلیس شهرینده آقا مهدی قنادی عائله سینده دونیایا گلمیشدیر . اونون آتاسی شبسترلی بیریسی ایدی کی ایش آردی جا تفلیس شهرینه گئتمیشدیر . اورادا حالوا بیشیرمک له گون گئچیریرمیش . نهایت او هامان شهرده بیر ائرمنی ایله حایات قورور. همین ائولنمه یین ثمره لرینین بیریسی ده ائله فاطمه خانیم قنادی اولور . اونون عائله سی ایکینجی بین الملل ساواشیندن اونجه ایرانا قایدیب ؛ تهراندا اوتوراق ائدیرلر . فاطمه خانیم قنادی سونرالار موسیقی کیلاسلاریندا اوستاد علی سلیمی ایله تانیش اولوب ؛ یئنی حایات قورورلار . بو هنرمند ار- آروادین دا یاشایش مئیوه لری یاشار ایله سئویل آدلانیرلار . فاطمه خانیم بیرینجی دونه آیریلیق ماهنی سین اوز گوزل سسی ایله اوخویوب ؛ بیر داها آذربایجانین زنگین موسیقی سین دیله دیشه سالیر . سونرالار بو گوزل تشبث دوام تاپیر . البیته بو بویوک هنرمند گویا عومرونون سون آیلارین آلزایمیز خسته لیی ایله آل بایاخا اولوب اونا گوره ده بیر سیرا ماجرالا اوز اوزه گلیر . یازیق لار اولسون کی فاطمه خانیم قنادی ۹۳ ایل آجیلی – شیرین لی عومور سوردوکده تبریزین وادی رحمت قبرستانینین هنرمندلر بویومونده چوخ سئودیی حایات یولداشی اوستاد سلیمی نین کناریندا تورپاغا گئدیر . روحو شا اولسون .

 

سالار سولماز بلوگفا

یوروم یازین

Back to Top