دیل سئچین

تاپ بو نه دی تاپماجا !!

اویان نیوز: نیچون قاطار گئدنده داش آتارلار دایاناندا یوخ ؟

ان آزی اوتوز ایل اونجه راهنمایی کیلاسیندا علوم معلیمیمیز بیر سوال وئریب دئدی : هر کیمسه بو نا دوز جواب وئرسه جایزه وئریله جک – برقی قاطارین توستوسو هانسی طرفه گئدر ؟ اوشاقلار تئز بارماقلارین قووزادیلار ؛ یوخاری گئدر ؛ آشاغی گئدر ؛ اوسته گئدر ؛ نه بیلیم هانسی سمته گئدر و … بونلاری ائشیدن معلیم ده تومموشدو ! الله بونلار نه دئییرلر . چوخ چکمه دن اوزو جواب وئردی . آی اوشاقلار برقی قاطارین کی توستوسو اولماز ! او گون بیز او سورغونو اویرنسک ده بیر نئچه ایل سونرا قاطارا گوره باشقا بیر سوال اورتایا گلدی . اما تاسف له بو گونه کیمی بو سوالا جواب تاپا بیلمه میشم . بئله لیک له ایسته ردیم کی وئبلاقیمیزین سایین اوخوجولاریندان بو سورغویا قاتیلسین لار نییه کی گله جک نسیل لر بیزی رصد ائده جک لر بونا گوره کی ماراغا رصد خانا سی بیزیم کنده یاخین دیر ( البته کند بویوک شهر دئمک دیر ! ) بیرده بیزیم وئبلاقین اوخوجوسو چوخدور من ؛ عیال ؛ اوشاقلار بیرده یئنی مطلب یازاندا اونا – بونا یالوار یاخار ائدنده اوچ دورد نفر ده آرتار ایندی سیز حسابلایین گونده یئتدی سگیز نفر ( البته کنده گئدن گونلری چیخین کی کنده باخا بیلمیریک ) ایندی سیز بو آماری بیر ایلده حسابلایین گورون نئچه نفره چیخا بیلر ! بیلیرم کی آمار الیزه چاتار من کی ذره بین عینیمی ویراندا یاخشی گورورم ؛ یوخسا عینک اولمایاندا آیاغیمین التی ایله بورنومون اوجوندان باشقا بیر یئری گوره بیلمیرم . البته عینک له بورنومو آپپاش باشی گورنده آز قالیر باغریم چاتداسین ! ائله ایسته ییرم گوزلریمی عمل ائله دیرم بلکه یاخشی گورم . بیرده دئییرم بونومو عمل ائله دیرم کی بو گون ارتیق مد اولوب ! اما قونشوموز دئییر گوزلریوی هابئله بونووو  بوراخ سنینکی گوزلریندن دئییل ؛ بئینیندن دیر ! ایگیرمی – اوتوز ایل ده دوز بلکه بیر بئیین عملینه گئتدین اوندا دوزه له سن ؛  نه بیلیم هره بیر سوز دئییر . منده قالمیشام آوارا – سفیل . آخی اوزومده کی فیکیر یوخدو هئچ ؛ هره ده چکیر بیر طرفه … بیر گون بونا طفیلی اولورام ؛ صاباحیسی گون او بیرینه . اما داریخمیرام. اومودسوزلوق شیطانا گلیب . بیرگون اولار منیمده هیکلیمی کندیمیزده توکرلر . اوندا گوره سیز کی من کیمم … دده لر نه اکیب ؛ ننه لر نه دوغوب . او گون آینا کیمی گوز اونومده دیر .

هه گوردوز دئییردیم ؛ سوزلر تئز یادیمدان چیخیر . قینامایین … قاطاردان دانیشیردیق . ایندی بیزیم بو وئبلاقیمیزدا هر کیمسه بو سوالا جواب وئرسه اونو سلام – صلوات لا کندیمیزین کند خداسینین قوللوغونا آپاریب ؛ اونون الی ایله کندیمیزه گوره یازدیغیم کیتابدان بیر جلد وئره جه ییک . سوال بو دور :

نیچون قاطار گئدنده داش آتارلار دایاناندا یوخ ؟

بیرده کونلوم ایسته ییردی بو سوالا جواب وئره سیز کی نیچون قورو آغاجا داش آتمازلار ! اما سونرا گوردوم کی بیزیم کندده بئلنچی آغاج لاری کوکوندن چیخاردیب ؛ دده سن یاندیریب ؛ ایشله درلر !! اونا گوره بو سورغودان واز گئچدیم . اولویت اوز هم کند لی لریمیز ایله دیر . باشقالاری دا بو جشنواره !! یه قاتیلسالار داها یاخشی اولار !! دئدییمیز کیمی بیرینجی نفره بیر جلد تیکاب !! کند خدانین الی ایله ؛ ایکینجی نفره بیر فرش پیچاغی ؛ اوچونجو نفره ایسه مانقالدا پیشن یالما ( یئر آلما ) وئریله جک !

عزیز اوخوجولار گئجیشمه دن تئز قاتیلین کی گله جک نسیل لربیزی ذره بین گوتوروب ایش لریمیزی اسد!! ( رصد ) ائیلی یه جک لر . قارداشیم سیز تئز اولون ! کی بیزیم ایشیمیز وار . آخی قرار دی گله جک ده بویوک بیر عالیمه گوره کندمیزده بیر قورولتای کئچیرک !! البته بیر عده قارنی زیغلی لار دئییرلر آی بالا آخ او سیزین دی ؟ دئییرم بلی نظامی تفرشین اولاندا باشقا سی باشقا سینین اولاندا اودا بیزیمکی اولا بیلر … بیرده بیر ایش گورونکی بوگونکو لر گولسه لر ده گله جک ده کی لر گولمه سین لر . البته موللا سلطانعلی دئییر دی ؛ مومنی گولدورمک ثواب دی . کولسه لر ده کی لاپ یاخشی ! بیرده کیم کیمه دی !

چال قاوالی ایندی توی ایامیدی

کیم کیمه دی سوی ها سوی ایامی دی

قایناق سالار سولماز بلوگفا

یوروم یازین

Back to Top