اویان نیوز اختصاصی سی: ایران‌دا تورکجه سربست وزن‌ده یازیلمیش «شعرین آتاسی» کیمی تانینان آذربایجان‌لی شاعر حبیب ساهیرین (اولکر) تبریزده آنیم مراسی‌می کئچیریلیب. آذربایجان‌لی شاعرلر، یازی‌چیلار و مده‌نی فعاللارین ایشتیراکی ایله کئچیریله‌ن بو تدبیرده آذربایجان موسیقی‌سی سسلندیریلیب و شاعرین حیاتی و ادبی یارادیجی‌لیغی ایله باغلی چیخیشلار اولوب.
«اویان News» وئب صحیفه‌سینین یازدیغینا گؤره، مراسیم‌ده حبیب ساهیردن علاوه آذربایجان میللی حکومتی دؤورون‌ده «شاعرلر مجلیسی»نه داخیل اولان باشقا شاعرلرین ده خاطره‌سی آنیلیب. مراسیمه قاتیلانلاردان میللی-مده‌نی فعال علی پاکباز حبیب ساهیر کیمی شاعرلرین جمعیت‌ده یاخشی تانیدیلمادیغینی دئییب. «حبیب ساهیرین اثرلری تورکییه اونیوئرسیتئتلرین‌ده اوخونور و آراشدیریلیر، آنجاق بیزلر هله اونو یاخشی تانیمیریق»-دئیه او علاوه ائدیب.
شاعر و یازی‌چی روزبئه سادتی ایسه ۱۹۴۵-۴۶ ایللرده قورولان آذربایجان میللی حکومتینی ساهیرین حیاتین‌دا بیر دؤنوش نقطه‌سی حساب ائدیلدیینی بیلدیریب. جناب سادتی علاوه ائدیب کی، ساهیرین شعرلری میللتین نئجه یاغمالانیب، سویقیریما معروض قالدیغینین هئساباتی‌دیر.
حبیب ساهیر ۱۹۰۳-ده میانا شهرین‌دن تبریزه کؤچموش بیر کندلی عائله‌ده دونیایا گلیب. او، تبریزده کاتولیکلر مکتبین‌ده فران‌سیز دیلینی اؤیرنیب و دؤولت اورتا مکتبینی بیتیردیک‌دن سونرا معلم‌لییه باشلاییب. حبیب ساهیر ۲۴ یاشین‌دا ایک‌ن تورکییه‌یه گئدیب، لاکین ایستانبول اونیوئرسیتئتین‌ده تحصیلینی بیتیردیک‌دن سونرا اؤلکه‌یه دؤنوب معلم اولاراق ایشله‌مه‌یه داوام ائدیب.
اولکر آذربایجان یوردو و تورک دیلینه وورغون بیر شاعر کیمی تانینیر.
گؤروم کؤنول گولزارینا
سحرله‌دن ایشیق دولسون.
او وطنین باخچاسین‌دان
نه قوش اوچسون، نه گول سولسون.
تورکجه یازان هر شاعره
آلقیش اولسون، آلقیش اولسون.
آذربایجان‌لی آراش‌دیرماچی الیرزا میانالینین یازدیقلارینا گؤره، میللی حکومت دؤورون‌ده ساهیرین تورپاغا، یوردا، ائله و اوبایا جانی دیل‌دن وورغون اولدوغونو گؤره‌ن بعضی سول دوشونجه‌یه منسوب اولانلار اونون بو فیکیرلرینه قارشی منفی موناسیبت بسلییردی.
حیاتی بویو معلم اولان شاعر اؤز شعرلرین‌ده آذربایجان‌لی مکتب اوشاقلارینا دا توخونوب:
آنلات‌دیلار
گئت مکتبه، اوشاق اوخوت،
درس‌دن سونرا، دؤن ائوینه
خوش‌دور داخما،
قارانلیغا قرق اولوبان،
پارلاق قیزیل گونه باخما
یادا قول اول،
درده آلیش،
فارسجا دانیش،
اسیرلیگی، درویش‌لیگی تلقین ائیله اوشاقلارا!
بعضی ادبیات‌چیلار حبیب ساهیری ایران‌دا ساده‌جه سربست تورک شعرینین آتاسی دئییل، اونو تبریزلی تاغی رفت ایله بیرلیک‌ده، اساساً ایران‌دا سربست شعرین تانینمیش نومایه‌نلرین‌دن بیری حساب ائدیرلر. حبیب ساهیرین ۲۰-ا یاخین شعر و باشقا مؤوضولاردا کیتابی چاپ اولوب. او، ۱۹۸۵-جی ایلین دئکابر آیین‌دا تئهران‌دا وفات ائدیب.
خبر تورکجه کوچورن : آمریکا سسی
http://oyannews.com/%D9%85%D8%B1%D8%A7%D8%B3%D9%85-%D8%A8%D8%B2%D8%B1%DA%AF%D8%AF%D8%A7%D8%B4%D8%AA-%D8%AD%D8%A8%DB%8C%D8%A8-%D8%B3%D8%A7%D9%87%D8%B1-%D9%88-%D9%85%D8%AC%D9%84%D8%B3-%D8%B4%D8%B9%D8%B1%D8%A7%DB%8C-%D8%AD/
