دیل سئچین

تبریز اینقیلاب محکمه‌سینین حاکمی آوروپا بیرلیینین سانکسییالاری ایله اوزلشه‌ن ۹ ایران‌لی آراسین‌دادیر

اویان نیوز: آذربایجان فعاللاری آراسیندا سیاسی محبوسلارا قارشی آغیر حؤکملر و اونلارین اوزون مدت ایشگه‌نجه‌لرله نظارت آلتیندا ساخلانمالاریندا ایران تهلوکه‌سیزلیک ناظیرلیینین البیری کیمی تانینان تبریز اینقیلاب محکمه‌سینین حاکمی رحیم حملبر آوروپا بیرلیینین ایرانا قارشی تطبیق ائتدیی یئنی سانکسییا سیاهیسین‌دا یئر آلان ۹ ایران‌لی آراسین‌دادیر. آذربایجان سایتلاری ایراندا یاشایان آذربایجان تورکلرینه قارشی باسقیلار و تضییقلر اوزوندن معین بیر ایرانلینین آوروپا بیرلیگی سوییه‌سین‌ده بیر اورقان طرفیندن جزالاندیریلماسینی اؤنملی بیر حادثه کیمی قیمتلندیریر. آوروپا بیرلیینین ایران‌داکی وضعیتی نظره آلاراق، معین شخص، موسسیسه و اورقانلارا قارشی محدودلاشدیریجی تدبیرلر ایله باغلی قانونونون حیاتا کئچیریلمه‌سی ایستیقامتین‌ده مارتین ۱۲-ده یایدیغی بیاناتیندا حاکم رحیم حملبر آشاغیداکی کیمی تقدیم ائدیلیب:

 تبریز اینقیلاب محکمسی ۱-جی شعبه‌سینین حاکمی، ژورنالیستلر، آذربایجان فعاللاری و ایشچی فعاللارینی «جاسوسلوق»، «میللی تهلوکه‌سیزلییه قارشی فعالیت»، «ایران رژیمینه قارشی تبلیغات» و «ایران رهبرینی آلچالتماق» کیمی اتهاملارلا گوناهلاندیراراق اونلارا وئریله‌ن آغیر حکوملرین مسولو، بیر چوخ حاللاردا قرارلاریندا محکمه پروسئسینین ایزلنیلمه‌مه‌سی و محبوسلارین ساختا اعترافلارا مجبور ائدیلمه‌سی بیلدیریلیب. او، زلزه‌له بؤلگه‌سینه گئدن ۲۰ کؤنوللو فعاللا زلزه‌له قوربانلارینا کؤمک ائتدیکلری اوچون حبس حؤکمو وئریب. محکمه بو فعاللاری «میللی تهوکه‌سیزلییه قارشی فعالیت اوچون توپلاشماق و امکداش‌لیق»دا گوناهلاندیریب.» سیاهی‌دا اهوازلی عرب فعاللارا اعدام حؤکمو وئره‌ن ایکی حاکم-سییید محمد باغیر موسوی و مرتضی کیاستینین ده آدی قئید ائدیلیب. «تبریزده توتولان میللی فعاللارین اکثریتی، او جمله‌دن اورمییه گؤلونون قورودولماسی ایله باغلی اعتراضلاردا حبس ائدیله‌نلر، هابئله ایندی موهاکیمه پروسئسین‌ده اولان محبوسلارین بیر چوخو حاکم حملبر طرفیندن موحاکیمه ائدیلیر. او، محبوسلارین عائله‌لری ایله گؤروشمه‌ییب، وکیلله تامین ائدیلمه‌دن اوزون مدت اطلاعات حبسخانالارین‌دا ایشگه‌نجه وئریله‌رک سورگو-سوالا چکیلمه‌لرینه شرایط یاراداراق تهلوکه‌سیزلیک ناظرلیگی ایله امکداش‌لیق ائدیر،»- دئیه آذربایجان وئب صحیفه‌لری یازیر. ۲۰۱۱-جی ایلین اوکتیابرین‌دا «بیر قروپ آذربایجان میللی حرکاتی فعاللاری» طرفین‌دن یاییلان بیانات‌دا بئینلخالق ایجتیمایت‌دن حاکم حملبره قارشی محدودلاشدیریجی تدبیرلرین حیاتا کئچیریلمه‌سی ایستنیلمیشدی. بیاناتلا بیرلیک‌ده حاکمین ۲۰-ا یاخین میللی فعالا قارشی چیخاردیغی حؤکملر ده یاییلمیش‌دی.

آمریکا سسی

یوروم یازین

Back to Top