دیل سئچین

تبریز زیندانیندا 5 آذربایجانلی مدنی فعالین آجلیق اعتیراضی

5 feal

اویان نیوزا اؤزل: بو گون آذربایجانلی ۵ مدنی فعال تبریز زیندانیندا آجلیق اعتیراضینا باشلادیلار.

اویان نیوز موخبیرینین راپورونا گؤره، ۱۳۹۲ تیر آینین ۲۲- سی آذربایجانلی مدنی فعاللار محمود فضلی، شهرام رادمهر، آیت(یوروش) مهرعلی بیگلو، لطیف حسنی و بهبود قلیزاده تبریز اینقیلاب محکمه سینین وئردیقی حؤکومه گؤره آجلیق اعتیراضینا باشلادیلار.

بو مدنی فعاللار بو گون تبریز زیندانینین ۸ اینجی بندین مسئوللارینا آجلیق اعتیراض لاری ایله ایرتیباط دا بیر مکتوب وئره رک اعتیراضلارینا باشلادیلار.

کئچن گونلرده شهرام رادمهر و بهبود قلیزاده نین جیسمی دوروملاری آغیر راپور ائدیلمیشدی و زیندان مسئوللاری شهرام رادمهر ین موتخصیص دوقتورا گؤتورولمه سینه مانع اولموشدولار. بو مدنی فعاللارین آجلیق اعتیراضینا باشلامالاری اونلارین جیسمی دوروملارینین داها چوخ ریسک آلتیندا اولاجاغی قورخوسونو یارادیبدی.

دئیلمه لیدیر محمود فضلی، شهرام رادمهر، آیت مهرعلی بیگلو(یوروش)، لطیف حسنی و بهبود قلیزاده ۱۳۹۲ اوردیبهشتین ۹_و تبریزین اینقیلاب محکمه سینین ۳ اینجی شعبه باشقانی قاضی باقرپور طرفیندن قانون سوز تشکیلات یاراتما ایتیهامی ایله ۸ ایل تعزیری زیندان و نیظاما قارشی تبلیغات آپارما ایتیهام ایدعالاری ایله ده ۱ ایل تعزیری زیندان توپلام ۹ ایل تعزیری زینداما ماحکوم ائدیلمیشدی.

بو حؤکوم دوغو آذربایجان ولایتینین تمییز محکمه سینین ۶ اینجی شعبه باشقانی طرفیندن تایید اولدو. بو حؤکوم بازار گونو ۱۳۹۲ خوردادین ۲۶- سیندا اوستانین تمییز محکمه سینین ۶ اینجی شعبه سی طرفیندن بو مدنی فعاللارا ایبلاغ اولدو.

دئیلمه لیدیر کی ۱۳۹۲ خورداد آینین ۲۲- سی میللت لر آراسی عفو تشکیلاتی آذربایجانلی مدنی فعاللارا وئریلن بو حؤکمه ایشاره ائده رک ایران دا سئچگی لرعرفه سینده میللی آکتیویست لره، موخالیف لره، سندیکا جی لارا، ایجتماعی و سیاسی فعال لارا اولان باسقی نین آرتماسینا گؤره اؤز نیگران چیلیغینی بیلدیرمیشدی.

آذربایجانلی مدنی فعال لارا وئریلن بو حؤکمه قارشی دونیا اؤلکه لرینین بیر چوخ یئرینده کی اینسان حاققی تشکیلاتلاری و آذربایجان فعال لاری طرفیندن اعتیراض میتینگی کئچیریله رک محکوم ائدیلدی.

“اویان نیوز”و قایناق گؤستره رک بو خبر پایلاشیمیندا بیر معذرت یوخدور.

یوروم یازین

Back to Top