دیل سئچین

تهراندا دؤرد ميللي فعال حبس ائديليب

Tehran

اویان نیوز: آذربایجان سایتلاری دونیا آنا دیلی گونوندن اعتیبارن تهراندا یاشایان تورک فعاللارا قارشی باشلادیلان حبسلرین داوامی اولاراق داها دؤرد میللی فعالین نظارت آلتینا آلیندیغینی بیلدیریر.

یاییلان معلوماتا گؤره، مارت آیینین ۵-ده بهنام شئیخی، مارتین ۸-ده حمید منافی نادارلی، بیر گون سونرا ایسه بلوگر محمود اوجاقلی و میللی فعال رستم کاظمپور ایرانین تهلوکه‌سیزلیک مأمورلاری طرفیندن حبس ائدیلیبلر.

“تهلوکه‌سیزلیک مأمورلاری مارتین ۹-دا محمود اوجاقلی و رستم کاظمپورو تهرانداکی ایش یئرلرینده نظارت آلتینا آلیبلار. فعاللارین هارایا آپاریلدیغی بللی دئییل. مأمورلار همچنین کاظمپورون ائوینه گئدیب، اونون کومپوتئر و دیگر شخصی اشیاسینی موصادیره ائدیبلر،” دئیه اویان نیوز وئب صحیفه سی بیلدیریر.

گوناذ تی وی وئب صحیفه سی ایسه مارتین ۸-ده حبس ائدیلن حمید منافی نادارلی ایله باغلی معلومات یاییب. نادارلی همچنین فئورالین ۲۱-ده ایران پولیسی و تهلوکه‌سیزلیک قووه‌لرینین آنا دیلی گونو ایله باغلی کئچیریلن توپلانتییا هوجوم ائتدیکلری زامان مأمورلار طرفیندن دؤیولوب.

سون گونلرده حبس ائدیلن فعاللارین بعضیسی فئورالین ۲۱-ی دونیا آنا دیلی گونونده ده نظارت آلتینا آلینیب، آنجاق بیر نئچه ساعاتدان سونرا سربست بوراخیلیب. گونئیلی ژورنالیست و اویان نیوز سایتینین باش رئداکتورو مجید خوش اختر آمئریکانین سسینه آچیقلاماسیندا فئورالین ۲۱-ده حبس ائدیلمیش فعاللاردان اکبر آزاد، علیرضا فرشی و منصور فتحی نین هله ده حبسده ساخلانیلدیغینی قئید ائدیب. میللی فعال ایسرافیل سولطانییان ایسه مووققتی اولاراق آزادلیغا بوراخیلیب.
آمئریکانین سسی- غلیرضا قولونجو

یوروم یازین

Back to Top