دیل سئچین

تهران‌دا "دده شمشیر" اولوسلار آراسی آشیق فستیوا‌لی

57457b41b33c7

اویان نیوز: تهراندا ایران آشیق‌لار بیرلیگی‌نین ائتدیگی «دده شمشیر» اولوسلار آراسی آشیق فستیوا‌لی کئچیریلیب.

۴ خرداد-دا باش‌لانان فستیوال آشیق‌لار بیرلیگی صدری آشیق سلجوق شاهبازی، ایرانین – گونئی آذربایجانین بوتون شهرلرین‌دن اولان آشیق و آشیق قروپ‌لاری، آشیق شمشیر یارادیجی‌لیغی‌نین آراشدیریلماسی ایله مشغول اولان، او جمله‌دن آذربایجان جمهوریتین‌دن گلن عالیم و آشیق‌لار قاتیلیب.

فستیوال قاتیلیمچی‌لاری یاراتدیغی ۷۵ ساز هاواسی ایله نوار قید‌لرینده یاشایان آشیق شمشیر خاطره‌سینی یاد ائده‌رک حاقیندا چیخیش‌لار ائتمیش، اونون ایفالاریندان‌ پارچا‌لار سسلندیرمیش‌لر.

بو گون دونیانین ارثی ساییلان و آذربایجان جمهورتی حیدر علیئو فوندونون تشببوسو ایله یونسکو طرفین‌دن قورونان آشیق صنعتی‌نین اوستادلاری داها چوخ گونئی آذربایجان تورپاق‌لاریندا دونیایا گلمیش، یاشاییب-یاراتمیش، قوزئی آذربایجان اراضی‌سینده چوخلو شاگیردلر یئتیشدیرمیش و بورادا دا بؤیوک بیر آشیق مکتبی یاراتمیش‌لار.

خاطیرلاداق کی، آشیق شمشیر ۱۸۹۳-جو میلادی ایلده کلبجر دمیرچیدام کندینده گؤرکم‌لی ائل صنعتکاری، شاعر قوربانین عائله‌سینده دونیایا گلیب. سؤز -صنعت تاریخیمیزده آغدابان‌لی قوربان آدی ایله قالان بو اوستاد آشیق و تانینمیش ائل شاعری آشیق علی عسگرین معاصری اولوب، اونلارین یاخین اونسییتین‌دن، دوستلوق علاقه‌لرین‌دن بیر سیرا دئییشمه‌لری یادیگار قالیب. آشیق علی عسگر و آغدابان‌لی قوربان دؤورونده کلبجر-گؤیچه ادبی اورتامی‌‌نین عینی عنعنه‌لر اوزرینده فورمالاشماسی، ساز و سؤز صنعتی‌نین جوغرافی حدودسوزلوغو اراضی اعتباری ایله یاخین اولان بو قونشو ائللرین منن ده یاخین اولماسینا طبیعی شرایط یارادیب. بئله بیر موحیطده ایچ دونیاسینی تاپان دده شمشیر بو اوستادلارین و اولولاری تأثیری ایله جیلالانیب، چوخ کئچمه‌دن ائل توپلانتی‌لاریندا موستقیل مجلیس‌لر آپاران ایستعدادلی ساز شاعرینه چئوریلیب و دده‌لیک مرتبه‌سینه قدر اوجالیب (عادیل جمیل، آر فیلولوژی علیم‌لری عذره فلسفه دوکتورو). پروفسور شاه‌لار عسگرووون سؤزلریله ده دئسک، “دده شمشیر قلمه آلدیغی قوشما، گرای‌لی، تجنیس، دیوانی، بایاتی، روباعی، غزل و مخمّس‌لرله کلبجر ادبی اورتامینی، ائله‌جه ده یازیلی و شیفاهی پوئزیامیزین ان اؤنم‌لی یؤنلرینی اوستا‌لیقلا منیمسه‌ین سؤز صنعتکاری کیمی اؤز مکتبینی یارادیب”.

ایران آشیق‌لار بیرلیگی‌نین خرداد‌ین ۴-ده ایرانین باشکندی تهران شهرینده تشکیل ائتدیگی دده شمشیر اولوسلار آراسی آشیق موسیقی فستیوا‌لی‌نین سونوندا ۶ اوستاد آذربایجان عاشیغینا “دده شمشیر دیپلومو” وئریله‌جک.

 قایناق: TRT تورکی

یوروم یازین

Back to Top