دیل سئچین

تورپاق آلتیندا قالان دیلیمیز/ شلاله جوانشیر

اویان نیوز:

تورپاق آلتیندا قالان دیلیمیز

شلاله جوانشیر

آنا دیلیم

سن باسقی آلتیندا قالدین

ازیلدیکچه دیره‌نیش گوجون آرتدی

سن اؤلکه‌میزده اوبا- اوبا، کند- کند، شهر- شهر سیخیشدیریلدین

سیخیشدیریلدیقجا

باغریمیزا تپیلدین، کؤکسوموزده یووالاندین

سنی، فوضولی‌نین غزللرینده سئودیک، قورقود دده نین قوپوزوندا

سن بیزیم سویوموزون، کیملیگیمیزین جانلی تابلووسو اولدون

یوخ اولمادین، یوخ اولمایاجاقسان

یوردوموز داغیلدی، داغیدیلدی

تورپاق آلتیندا قالدی تورکچه هایقیران آنالاریمیز

تورپاق آلتیندا قالدی تورکچه هایقیران دده لریمیز

تورپاق آلتیندا قالدی تورکچه هایقیران گلینلریمیز

تورپاق آلتیندا قالدی تورکچه هایقیران گنج ایگیدلریمیز

یاردیملارینا گلن اولمادی، اولماز اولدو.

بوغولدولار، تورپاق آلتیندا قالیب بوغولدولار

چونکو تورکچه هایقیردیلار

تورکچه هایقیردیلار سون نفسلری ایله آنالاریمیز

تورکچه هایقیردیلار سون نفسلرینده اوشاقلاریمیز

تورکچه باغیردیلار گنج ایگیدلر

تورکچه هایقیردیقلاری اوچون اؤلدولر

تورکچه باغیردیقلاری اؤچون اؤلدولر

اوچوخلار آلتیندا قالدین دیلیم

اوچوخلار آلتیندا قالدین تورکچه م

اوچوخلار آلتیندا قالدین اؤلکه م

اوچوخلار آلتیندا قالدین آنا دیلیم

یوردوم اوچوق-اوچوق خرابه لره دؤنوشدو

دؤنوشدورولدو

یارالار آچیلدی یوردومون باغریندا

اوره یی پارام- پارچا اولدو اؤلکه‌مین

باغری دلیک- دئشیک اولدو فوضولی غزللری نین

کؤنلونه آتش قویولدو کاشقارلی دیلی‌نین

قارانلیغین دالغالاندیغی اؤلکه‌مده-

بئشیکلرینده اؤلدولر بالاجا اوشاقلار

آغزینا داش تپیلدی تورکچه دیل آچان بالاجا اوشاقلارین

هئریسدن، ورزیقاندان، اهردن، قاراداغدان

قارا خبر یاییلدی

قاراباغین قارا خبرلرینه قارالار قاتیلدی

تورکچه آغولار سؤیله‌دی آغ‌بیرچک آنالار

تورکچه آغلادی انالار

سن اؤلمه‌دین، منیم تورکچه م

سن یاشاییرسان باغریمیزدا

سن یاشایاجاقسان عآغلیمیزدا

سنین اوچون، یالنیز سنین اوچون یاشایانلار وار آنا دیلیم

سن بیزیم گئرچک قورتولوش بایراغیمیزسان تورکچه م

قلبیمیزده دالغالانان بایراغیمیزسان.

بایراغیمیزسان .

 

ایشیق نت

 

یوروم یازین

Back to Top