اویان نیوز: 
تورکون دیلی تک سئوگیلی ایستکلی دیل اولماز
اؤزگه دیله قاتسان بو اصیل دیل اصیل اولماز.
اؤز شعرینی فارسا عربه قاتماسا شاعیر
شعری اوخویانلار، ائشیدنلر کسیل اولماز.
فارس شاعیری چوخ سؤزلرینی بیزدن آپارمیش
صابر کیمی بیر سوفره‌لی شاعیر پخیل اولماز
تورکون مثلی، فولکولوری دونیادا تکدیر
خان یورقانی کند ایچره مثلدیر میتیل اولماز.
آذر قوشونو قیصر رومی اسیر ائتمیش
کسرا سؤزودور، بیر بئله تاریخ ناغیل اولماز.
پیشمیش کیمی شعرین ده گرک داد.دوزو اولسون
کند اهلی بیلرلر کی، دوشابسیز خشیل اولماز.
سؤزلرده جواهیر کیمی دیر، اصلی بدلدن
تشخیص وئرن اولسا بو قده ر زیر زیبیل اولماز.
شاعیر اولا بیلمزسن آنان دوغماسا شاعیر
میس‌سن آ بالام، هر ساری کؤینک قیزیل اولماز.
چوق قیسا بوی اولسان اولاسان جین کیمی شئیطان
چوخ دا اوزون اولما کى، اوزوندا آغیل اولماز.
مندن ده نه ظالیم چیخار اوغلوم، نه قیصاص‌چی
بیر دفعه بونو قان کی، ایپکدن قزیل اولماز.
آزاد قوی اوغول عشقی، طبیعتده بولونسون
داغ داشدا دوغولموش دلی جئیران حمیل اولماز.
اینسان او دی دوتسون بو ذلیل خالقین الیندن
آلاهی سئورسن بئله اینسان ذلیل اولماز.
چوخ دا کی سرابین سویی وار یاغ بالی واردیر
باش عرشه ده چاتدیرسا سراب اردبیل اولماز.
میلت غمی اولسا بو جوجوقلار چوپه دؤنمز،
اربابلاریمیزدان دا قارینلار طبیل اولماز.
دوز واختا دولار تاختا تاباق ادویه ایله
اوندا کی ننه‌م سانجیلانار زنجفیل اولماز.
بو شهریارین طبعی کیمی چیممه‌لی چشمه
کوثر اولا بیلسه دئمیرم، سلسبیل اولماز.
