دیل سئچین

خوجاوند و فوضولي ايستيقامتلرينده 10 ائرمني حربچيسي اؤلدورولوب

Azer

اویان نیوز: خوجاوند و فوضولی ایستیقامتلرینده ۱۰ ائرمنی حربچیسی اؤلدورولوب. بو حاقدا آنس پرس آشاغیداکی راپورو وئرمیشدیر.
سون ۱ هفته‌ده ائرمنیلر جبهه خطینده یئنیدن فعاللاشیب. خوصوصیله گئجه ساعاتلاریندا میللی اوردوموزون مؤوقئعلری ایله یاناشی تماس خطینده یئرلشن یاشاییش منطقه لری آتشه معروض قالیر. بونا گؤره ده جبهه خطینده باش وئرنلری لئنته آلماق مقصدییله آغدامین اورتا قروند کندینه قارانلیق دوشندن سونرا گلدیک. ساکینلر ائولرینه چکیلیب. جبهه ده ایسه تک تک آتش سسلری ائشیدیلیر.
ایشغال آلتینداکی شیخلار کندیندن اورتا قروند آرا سیرا آتشه توتولور. قارشی طرف هدفی آیدین موشاهیده ائتمک اوچون اوزون مسافه‌نی ایشیقلاندیران خوصوصی قورغولاردان ایستیفاده ائدیر. کامئرامیزین ایشیغینی گؤرن ائرمنی عسگرلری دوردوغوموز اراضینی ده آتشه توتور. آغدامین گولله منزیلینده یئرلشن یاشاییش منطقه لریندن بیری ده چیراقلی کندیدیر. کوچه‌لرده تک-تک اینسان گؤزه دییر. ساکینلرین سؤزلرینه گؤره سون بیر هفته‌ده کند موختلیف ساعاتلاردا آتشه معروض قالیر.
چیراقلی کند ساکینی، آللاهوئردی جعفراوو: “سون واختلار آتشکس هئچ دایانمیر. ائله گئجه-گوندوز آتیرلار. ائله اولور ۱۰ دقیقه،۱۵ دقیقه آتیرلار، آز آتاندا ۴۵ دقیقه آتیرلار. دایانمادان گونون نه واختی اولسا او واخت آتیشما وار”.
هله‌لیک جبهه ده ساکیتلیکدیر. تماس خطینده‌کی اؤلو سوکوتو ایسه چاققاللارین سسی پوزور. بیر نئچه دقیقه دن سونرا ایسه ائرمنیستان اوردوسونون عسگرلری ده اونلارا قوشولور. ۱۵ دقیقه بویونجا کند آوتومات و پولئمیوت سیلاهلا گوللباران ائدیلیر. کند بلدیه‌سینین صدری هابیل عابباس اووون سؤزلرینه گؤره سون ۱ هفته‌ده ساکینلر اکین ساحه لرینه بئله چیخا بیلمیر. احمدآغالی بلدیه‌سینین صدری، هابیل عابباس اوو: “اساسن آخشاملار اولور اساسن ایری چاپلی سیلاهلاردان آتیرلار. حتّی او دره‌جه یه چاتیب کی، کنده گلنده ماشینلارین ایشیغینی سؤندورمک مجبوریتینده قالیریق”.
سون بیر هفته عرضینده ائرمنیستان اوردوسو جبهه نین قاراباغ ایستیقامتینده دفعه لرله هوجوم عملیاتلاری کئچیریب و هر دفعه لاییقلی جاوابینی آلاراق گئری چکیلمک مجبوریتینده قالیب. الده ائتدیگیمیز معلوماتا گؤره حتّی خوجاوند و فوضولی ایستیقامتلرینده قارشی طرفین ۱۰-ا قدر حربی قوللوقچوسو دا محو ائدیلیب. حاضیردا ایسه جبهه ده گرگینلیک داوام ائدیر.

قایناق: آنس پرس

یوروم یازین

Back to Top