دیل سئچین

دوكتور مبین-ین دوغوم گونونو، گئجیكمه‌دن عزیزله‌یك

محمدحسین مبین

اویان نیوز:

ابراهیم رشیدی

آچیقلاما: دؤکتور محمدحسین مبین ۱۳۹۴‌جی ایلین مهر آیی‌نین ۶سیندا ۸۸ یاشلیغیندا دونیاسینی ده‌ییشدی؛  بو یازی ۱۰آذر۸۷ ده یازیلمیش، 

«هیندوستان، میصیر، آفریقا، چین، و ژاپون دونیانین لاپ چوخ جوذاملی یئرلری ساییلیر. یالنیز هیندوستاندا بئش میلیون جوذاملی واردیر. هر ایل بئش یوز کیشی بو سایا آرتماقدادیر. ایرانین لاپ چوخ جوذاملی بؤلگه‌سی، آذربایجاندیر. جوذام ویروسو میصیردن عثمانلی تورپاغینا، اورادان آذربایجانا یاییلمش.» بو سؤزلر دوکتور محمد حسین مبین، جوذاملی آلیزلارین معنوی آتاسی‌نین دئدیکلری‌دیر.

آذربایجان شهرلرینده ایسه، اهرله خلخال لاپ چوخ آلیزلی شهردیر. آراشدیرمالارا گؤره قاراداغین تورپاغی بو ویروسون یاشامینا اویغون‌دور. ایرانلی جوذاملی‌لارین اوچوندن ایکی‌سی آذربایجانلی‌دیر. اؤرنک اولاراق: اهرده مین ایکی‌یوز کیشی آلیزدیر. بیر حالدا کی، فارس بؤلگه‌سینده یوز سککیز کیشی؛ اصفهان بؤلگه‌سینده یالنیز اون‌دؤرد جوذاملی آلیز واردیر.

توپلوموموزدان قوولان بو اینسانلارین تکجه اومودو محمد حسین مبین اولموش. سکسن بیر ایل اؤنجه، اوخ‌آتانین اون‌اوچونده، تبریزین چرنداب محله‌سینده دونیایا گؤز آچان اوشاغین آدی محمد حسین قویولدو. محمد حسین ۱۳۱۹-دان ۱۳۲۹ قدر عائیله‌سییله بیرلیکده کرماندا یاشادیغینا باخمایاراق هله ده آذربایجان میللی حکومتیندن سؤز گئدنده دئموکراتیک حکومتیمیز دئییر. دئموکراتیک حکومتیمیز گئدندن سونرا دوکتورلوق فاکولته‌سین آذربایجاندا آرادان آپارماق ایسته‌ییردیلر؛ آما اؤیرنجی‌لر هر گئجه کئشیک وئریب بو فاکولته‌نی قورودولار و۱۳۳۴-جو ایلده تبریزده ناصرالدین شاهین گزی یئری اولان بابا باغین جوذاملی آلیزلار خسته‌خاناسینا چئویریب ایندیه قدر آذربایجانین هریانیندان؛ اردبیل، اورومو، زنجان هابئله تبریزدن گتیریلن آلیزلارین ساغالتماسینا چالیشیر. دوکتور مبین، گئجه‌لری فانیس یاندیریب؛ بولاقدان مریض‌لره سو داشیییب؛ اؤز خالقی‌نین توپلوموندان قوولموش بالالارینا یاردیم ائتمیش. او آلیزلاری یالنیز ساغالتماغا یوخ، بلکه بیر داها توپلوما قایتارماغا جان آتیردی. چوخلارین ساغالدیب بیر داها اوخولا، بیلی‌یوردونا گؤندردی. ایسلامی آزاد بیلی‌یوردوندان گیلئی‌له‌نیر: «بیزیم اوشاقلارین اوخو هزینه‌سین تأمین ائتمه‌دیلر. آخی اون اوشاغین هزینه‌سی اونلارا بیر شئی ائتمزدی».

دوکتور محمد حسین مبین دوکتورلوقدان باشقا اینجه دویغولو شاعیردیر. اونون آنا دیلیمیزده چوخلو کیتابی ایشیق اوزو گؤرموش. کیتابلاری‌نین چوخو اوشاق ادبیاتی قونوسوندادیر. اونلاردان «گل باهاریم؛ گل» «قوشلار یوواسی»«لای لای مارالیم؛ لای لای»،«آچیل چتریم؛آچیل» ها بئله «جوذاملی سارا»-نی آد آپارماق اولار.

شهریار حاققیندا چوخلو مقاله‌لر یازمیش؛ اونلاردان: «شیطان در شعر شهریار»، «تبریز گنجینه‌ای مرده در تاریخ»، «نظامی گنجوی»، «به یاد شهریار»، «قانلی چیچک‌لر»، «عاشیقلار» ها بئله «قاپیمیز آچیلیر گونشه ساری» کیمی یازیلاری آد آپارماق اولار:

 جوذاملی سارا کیتابیندان بیر شعر:

 آرخاسیز آدامسیز

گؤبَلک کیمی

داغلارین دؤشونه

دوشدوم بوی آتدیم

                                          رنگلر ایچینده

قارا رنگ ایله

باختیمین رنگی‌نی

قارا بویادیم

 بیر یاغیش داملاسی

یاراتدی منی

یاغیشسیز قالالی

کول اولدوم یاندیم

 بیر لحظه یاشادیم

بیر عؤمور یاندیم

اودلانیب یانماغی

من عؤمور ساندیم

 

 

یوروم یازین

Back to Top