دیل سئچین

ديليم منيم - عارف صفا

اویان نیوز:

عصرلردیر زنجیرله‌نن

اوزه‌رینه اود اله‌نن

بیر ابدی کؤزه دؤنن

دیلیم منیم، دیلیم منیم

اؤز اصلینی دانماییرسان

یاندیریرلار، یانماییرسان

دوندورورلار دونماییرسان

دیلیم منیم، دیلیم منیم

سنی داردا ساخلاییرلار

چارمیخلارا میخلاییرلار

نیشان آلیب اوخلاییرلار

دیلیم منیم، دیلیم منیم

ایگید کیمی یاشاییرسان

ائلین دردین داشى‌ییرسان

عصیرلردیر چارپیشیرسان

دیلیم منیم، دیلیم منیم

آنالارین حزین سسی

آتالارین گور نعره‌سی

بئشیگیمین ایلک نغمه‌سی

دیلیم منیم، دیلیم منیم

منیم سونسوز کائناتیم

یانسان یانار قول – قانادیم

قارا باغلار باغ – باغاتیم

دیلیم منیم، دیلیم منیم

یادلار کمند آتار سنه

آتین چاپیب چاتار سنه

کیم دؤیوشده باتار سنه؟

دیلیم منیم دیلیم منیم

نغمه‌سی‌سن بولاغیمین

ایشیغی‌سان چیراغیمین

بزگی‌سن نوراغیمین

دیلیم منیم، دیلیم منیم

داماریمدا آخان قانیم

باغچام، باغیم، گلستانیم

سن‌سیز کئچسه بیرجه آنیم

غضبله‌نر ساوالانیم

دیلیم منیم دیلیم منیم

دوغما آنام، ائلیم منیم

ساز اوستونده تئلیم منیم

آخار چاییم، سئلیم منیم

سینسان سینار بئلیم منیم

دیلیم منیم، دیلیم منیم

 عارف صفا ۱۳۵۷

آچیق اینفو

یوروم یازین

Back to Top