دیزی یوخ آیاغی نا سؤیکه ن قاراداغیم

ibrahim nuri

اویان نیوز:

ابراهیم نوری(ایتگین)

اؤتن بیر ایلده یاشامی میزی سارسیدان آجی لاردان بیری قاراداغ دئپرمی اولموشدور. یازیقلار اولسون که دئپرم دن سونرا باش وئرن آجی لار ایچی میزی سؤکوب اوره ییمیزه بیر یارا کیمی هوپموشدور.

طبیعتین قودوردوغلوغونا باخمایاراق بو بؤلگه ده ایمکاناتین اولماماغی و حاکیمییت ین بو قونودا باشی سویوق اولماسی دئپرمدن بؤیوک اولای کیمی  گؤزوموزوه چارپدی.

آلتی قیزیل اوستو قیزیل توستوسوده قیزیل-قیزیل اولان توپراق تاپداق آلتدا قالدی.

بو گون بئله کی ثیروتلی خزینه و معدن لری تالانیب اؤزگه توپراقلارا گئدیر. بیر باخیم دا اؤزگه لره ایش یارادیر بیزه یوخ. حال بو کی بو ائلین بالالاری ایشسیز لیکدن خزینه لری کیمی باشقا یئرلره او جومله دن تهرانا،اصفهانا،کرمانا و … کؤچورلر.

قیزیل توپراقدا بئجریله ن هر شئی مدرن میکانیزمدن اوزاق قالیر. دوکتورلار دوغان  بو توپراق خسته خاناسیز قالیر.”ایران” اولکه سی نی مس معدن لری ایله دویوران بو “ورزقان” خسته خاناسیز اولور و بئله بیر فاجعه ده استاندارد سیز یوللاری اولدوغونا قرارا یارالی لاری یوللاردا قویور.

دئدیکلریمیز بیر حقیقت دیر بو حقیقت ایچینده باشقا بیر سؤزده وار:

اؤنجه حاکیمییت وریندن بوتون خبرلر بایکوت اولوندو.

بیریسی دئییب گولمه کده گونون گئچیردیریردی، بیریسی ده دؤولت ایشلری ایله اوغراشیردی سانکی بوردا هئچ بیر دئپرم باش وئرمه ییب.

نئچه گون اولایین باش وئرمه سیندن سونرا حاکیمییت تازا باش تاپدی کی پان تورک لر!(هویت طلب)توپراغیندا دئپرم باش وئریب دیر.

یالانلار بوردان باشلاندی:

آوارلار آریتداندی، یارالی لارین یاراسی ساغیندی، اؤلولر توپراقلارا قویلاندی، یاواش – یاواش چادیرلار قورولدو و هله ده یالانلار داوام ائدیر ایکی آیا ائولری قورولور.

آنجاق کی آذربایجان میللتی بؤیوک دور و بو میللت بیر گئجه  گوز قیرپمادان سویداشلارینین یاردیمینا گلدی و بو بویدا گوجو حاکیمییت گورمه دی.اولسون قیناماغا یئری یوخ

“بختیار بابام” دئمیشکن: “اوکو گؤرمور او کور دئییل اوکو گؤرمه ک ایسته میر کوردور”

فیلیسطینه، لوبنانا، بحرئینه و باشقا یئرلره بیداری اسلامی گؤندرمک لازیم دیر. دئپرم وورموشلار بیداری اسلامی یه یئتیب لر.

دئدیییمیز کیمی ساغلاملیق آراجی لارین تاریخی سوووشموش بلکه ده یوخدور. سودا بوردا چوخ بولدور آمما تاریخی سوووشموش سولار. پانسیمان آراجی لاری دورسون بیریانا باش آغری حببی ده تاپیلمیر.

کانکس لرده چوخدور بئشینین وار بئشینین یوخ او اولمایانلاردا مال حئیوان کانکسین وئردیلر.

وام لارین دا وئردیلر. آمما نه جور وئردیلر؟؟؟

هله ده حئسابدا  پول قاباغی باغلی دیر.

آنجاق بیر سؤز وئردیلر :”بو حئساب لارین آچاری روحانی نین الینده”

آمما بودا موللادی. موللادا یالان دانیشماز بیر ایکی گونه قاباغین آچار.

دونن آخشام “ورزیقان”-ا گئتمیشدیم. خییاوانلاردا تبریک بنرلری آسیلمیشدیر. منده بیرین اوخودوم.

بئله یازیلمیش دیر:”بو زلزله مسئله سی ایله ایلگی لی لیاقت میدالینا صاحیب اولوبسان”

تبریک ائدیرم سنی.

سن چادیرلاردا مبل اوستونده یاتاندا گاه اوشودون گاه ایسیندین.اوشوینده شومینه نین قارشیسیندا قیزیشدین. ایستیلیینده گازی کولر اوزرینده اوتوروب بوز دولابیندان گیلانار سویو گؤتوروب جانا سئنرایچدین ها ایچدین.

بورنوندان گلسین …

چادیرین قیراغیندا بیر تندیرین واریدی هردن اوردا کندلی لرین اوجوز ساتیلان املیک قوزولارینین راستاسیندان کباب پیشیردین.

حارامین اولسون …

سن بئله بیر یوخسوللوقلاردا یاشادین یازیق ، بئناوا.

عزیز دوستوم دوکتور علیرضا بی بیگی جینابلاری

منه باخ نه اونوتقان اولموشام !؟

یادیمدان چیخدی سن او زامان “ایراوان”دا “سارکوزییان”لا گزیردین. “قاراداغ”دا یوخ.

آمما دئپرم گؤروموش بیر وارلی قوجامان آنانین خاطیره سین دئییم

“جنگلو”دا بیر آنا دئییردی :”بیزه کانکس وئرمه دیلر مجبور اولوب حیوانلارین کانکسینده یئرائله دیک.

یاواش-یاواش سویوق اوز دؤندردی. هرزامان کی یاغیش یاغدی بیزیم کانکسین سقفینده یاغیش داملاسی باغیریردی ،هایکیریردی.

بالالاریم گئجه گوندوز یاتمادیلار های-هارای سسیندن.

یای اولدو بودفعه یاغیشدان هئچ بیر خبر یوخ آمما گونش ایشیق ساچیب بو کانکسین تنکه لرین قیزدیردی. بو دفعه ده ایستی دن اوردا قالماق اولمادی”

بودا یئنی بیر تئکنولوژی دیر.آدی گونش انرژی سی دیر.

بو ایلده وار پاییزدا وار یای دا وار. هامان آشدی هامان کاسا.

آقای بیگی

بیزیم کنده گلسن تندیر چؤره یی یاپمیشام. آپارماسان اوره ییم قیریلار.

اینک لری ده ساغمیشام. سنه قاتیقلی-قایماقلی سوغاتلاریم وار.

آقای بیگی

اونوتما قاراداغ ستارخان، امیر ارشد، غلامحسین احمدی اهری و … دوغوبدور و بونو بؤیوکلریوه ده سؤیله. قاراداغ بئله گونلرده

ستارخان دوغوب.

بیر گون پوتین لرینی گئییب  توفنگی نی آتیب ایروانداکی قالدیغین چادیردا یوخونا گیریب کابوس اولار.

یوروم یازین

Back to Top