اویان نیوز:
ائل سئون کمالی کؤچدو دونیادان
یاس توتوب آغلادی تبریز، همدان
علی کمالی ۱۳۷۵- نجی ایلین آسلان (مرداد) آیینین اون بیرینده جومه آخشامی تئهراندا قلب سکته‌سی نتیجه‌سینده یاشامین ایتیردی. بؤیوک عالیم ، شاعیر و حقوق اوزمانی (متخصصی) علی کمالی ۱۳۲۳- نجی ایلده ساوا (ساوه) شهرینین بند امیر خرقان کندینده آنادان اولموش، اورادا بویا- باشا چاتاراق ابتدائی و اورتا مکتبی بیتیردیکدن سونرا، تئهرانا گئتمیش، اورادا بیلی یوردون حقوق فاکولته‌سیندن دیپلوم و یوکسک لیسانس آلاراق، بیرینجی درجه لی عدلییه وکیلی کیمی تئهراندا چالیشمیشدیر.
علی کمالی حیاتی بویو حقوق ساحه سینده بیر سیرا اثرلر تالیف ائتمکله یاناشی تورکجه و فارسجا چوخلو شئعرلر یازمیش و اونلارین بیر بؤلومونو باسدیرماغا اوغور قازانمیشدی.
بونلارلا یاناشی بوتون وارلیغی ایله دوغولدوغو دیاردا- همدان- ساوه یئرلرینده ان قدیم دؤورانلاردان یاشامیش تورکلرین اؤز دوغما خالقی و ائلینین دیل ، فولکلوریک ، ادبیات و عنعنه لرینه اورکدن وورغون و باغلی اولان علی کمالی بوتون جیسمی ، فیکری و مادی ایمکانلارینی دوغما خالقینین، یاساقلامیش فولکلورونو، هابئله شاعیر و ادیبلرینین اثرلرینی توپلاماغا صرف ائتمیشدیر.
بئله یورولماز چالیشمالار نتیجه‌سینده بو ائل سئور اینسان ایگیرمی جیلد حدودوندا خالقینین داخیلینده دیللرده دئییلن ناغیللار، داستانلار و باشقا فولکلوریک اثرلردن ، ائله‌جه ده ۲۵ جیلد حدودوندا همین یئرلرین قادین و کیشی ، ادیب ، شاعیر، یازیچی و ساتیریک سؤز اوستادلارینین ، اونودولماق عرفه‌سینده اولان اثرلرینی شهرلر و اوجقار کندل عایله‌لرینین صاندیقلاری ، باغلیلاری ، تاخجا بوجاقلاریندا ساخلانان سندلر و کاغیذ پارچالاری ایچیندن تاپیب توپلامیش ، اونلاری آراشدیراراق، اؤزو و ادیب دوستلارینین یاردیمی ایله اوزه چیخارتمیش، خططاطلار واسیطه‌سیله گؤزل خططیله یازدیریب چاپا حاضیرلامیشدیر.
۱۳۵۸-نجی ایلدن بری تئهراندا وارلیق درگیسی یاییملانماغا باشلایاندان بیر-ایکی ایل سونرا کمالی ده همین درگی‌نین یازیچیلار هئیتی سیراسینا کئچیب، بیرینجی دؤنه اولاراق تئلیم خان آدینی و اثرلرینی مکتوب شکیلده بیلیم عالمینه تانیتدیرماغا باشلادی.
مرحوم علی کمالی موختلیف اؤلکه لرده تشکیل تاپمیش تورکولوژی کونفرانسلاردا فعال ایشتیراک ائده‌رک، تورک عالیملرینی آذربایجان و عمومییتله ایران تورکلرینین ، هله تانینمامیش مرکزی قولو اولان ، زنگین همدان – ساوا (ساوه) ادبیاتی و ادبی شخصیتلریله تانیش ائتمه‌یه چالیشمیش و عئینی زاماندا بو ادبیاتین فتحعلی شاه دؤورو یاشامیش ان بؤیوک ادبی سیماسی شاعیر تئلیم خان حاققیندا عئلمی اثرحاضیرلاماغا باشلامیشدی. بو قونو آذربایجان عئلملر آکادئمییاسی نظامی اینیستوتونون عئلمی شوراسی طرفیندن ۳/۶/۱۹۹۶ تاریخینده تصدیق ائدیلمیشدیر.
تأسسوفلر اولسون کی ، واختسیز اجل علی کمالی‌یه بو عئلمی اثری تاماملایب اوندان مودافیعه ائتمه‌یه ائله‌جه ده توپلادیغی اونلارجا اثرلری باسدیریب یایماغا ایمکان وئرمه‌دی.
علی کمال حیاتلا ویداعلاشدی و بؤیوک میللی ایشلرینی باشا چاتدیرماغی غئیرتلی دوستلاری و ادیبلره تاپشیردی. کمالینین روحو شاد و یولو داواملی اولسون.
میثم آزادی- ۱۳۹۲/۰۵/۱۱(۲۰۱۳/۰۸/۰۲)
قایناقلار:
۱- تئلیم خان (حیاتی و یارادیجیلیغی): دوقتور علی کمالی – دوقتور محمدتقی زهتابی.
۲- یادنامه حکیم تئلیم خان: اسداله امیری.
