دیل سئچین

«سعید موغانلی» «صمد بهرنگی» ادبی موکافاتینی قازاندی

seid muganli

اویان نیوز: مارت آیی‌نین ایکیسینده بیرلیگین ناتوان کلوبوندا آذربایجان یازیچیلار بیرلیگی و دیاسپورلا ایش بیرلیگی اوزره دؤلت کومیته‌سینین بیرگه لایحه‌سی اولان «صمد بهرنگی» آدینا ادبی موسابیقه‌نین غالیبلری معینلشدیریلیب.

آذربایجان یازیچیلار بیرلیگی‌نین یایدیغی خبره اساسن، بو موسابیقه‌نین بیرینجی غالیبی ایران آذربایجانیندان موسابیقه‌یه قاتیلان شاعر «سعید موغانلی» اعلان ائدیلیبدیر. سعید موغانلی بو موسابیقه‌یه اؤزونون سئچیلمیش اثری اولان «قوجاغین امنیت، گؤزون تروریست» عنوانلی شعر مجموعه‌سیله اشتراک ائتمیشدیر.

بیر چوخ آذربایجان یازیچی و شاعیرلرینین اشتراکیله تشکیل ائدیلن موکافاتلاندیرما مراسیمی گونو، ایلک اؤنجه آذربایجان یازیچیلار بیرلیگی‌نین صدری آنار رضایئوین گؤستریشی ایله، موسابیقه‌یه رهبرلیک ائدن بیرلیگین گونئی آذربایجان بؤلومونون صدری «سایمان آروز» جنابلاری موکافاتین گئدیشاتی باره‌ده چیخیش ائدیب؛ سونرا تانینمیش آذربایجان شاعری “سهراب طاهر” موسابیقه‌نین بیرینجی غالیبی موکافاتینی ایران آذربایجانیندان اشتراک ائدن شاعر «سعید موغانلی»یا تقدیم ائتمیشدیر. مراسیمده، سهراب طاهر دن باشقا، سایمان آروز، رشاد مجید، ایلقار فهمی، گونل آنارقیزی، سلیم باب الله، مصطفی هاشیم پولاد و سونوندا موکافات قازانانلار دا چیخیش ائتمیشدیلر.

آذربایجان، ایران، تورکیه، روسیه و گورجوستان اؤلکه‌لریندن بو موسابیقه‌ده اشتراک ائدن شاعر، یازیچی، ناشر، تدقیقاتچی و … ایچره‌سیندن، آشاغیداکیلار موکافاتلاندیریلمیشدیر:

seid muganli

    سعید موغانلی (ایران – آذربایجان)

    اونال کار (تورکیه)

    ائلشاد بارات (آذربایجان جمهوریتی)

    رئیحان شیخلی (روسیه)

    صابر نبی اوغلو (آذربایجان جمهوریتی)

    اسمیرا فوواد (آذربایجان جمهوریتی)

    مهمان قاراخانلی (گورجوستان جمهوریتی)

    پروانه ممدلی (آذربایجان جمهوریتی)

    مردان امیروو (آذربایجان جمهوریتی)

    سخاوت ساحیل (آذربایجان جمهوریتی)

موسابیقه، هر ایل بیر اؤلکه‌ده، ۱۰ نفرین تجلیلی ایله اؤز ایشینه داوام ائتمه‌لیدیر. بو موسابیقه‌لرده ایکی نفر شعر / ایکی نفر حئکایه / ایکی نفر کیتاب / دؤرد نفر تحقیق، آراشدیرما، تنقید و ادبی فعالیتده (کیتاب نشری و درگی) ساحه‌سینده امک صرف ائدن‌لردن تقدیر اولوناجاقدیر. بو ایلکی موسابیقه‌یه گلن اثرلره سهراب طاهر (باشقان)، فیکرت قوجا – نریمان حسن زاده – چنگیز عبدالله – غ. پاشایئوا – ایلقار فهمی و … داورلیک ائتمیشدیر.

قایناق: ایشیق

یوروم یازین

Back to Top