اویان نیوز: تهراندا “شمس و مؤولانا” اثر ایشیق اوزو گؤرموشدور. بو کیتابین یازاری مسی آغا محمدیدیر. آذربایجان شرقشوناسی، فیلولوژی اوزره فلسفه دوکتورو مسی آغا محمدی نین آذربایجان تورکجه‌سینده اولان “شمس و مؤولانا” آدلی کیتابی عرب الیفباسیندا یایینلانمیشدیر. کیتاب تهرانداکی “تکدرخت” یایین ائوینده ۵۰۰ تیراژلا نشر اولونوب. بو حاقدا Modern.az سایتی آشاغیداکی بیلگیلری ده وئرمیشدیر.
کیتابا صوفیزمین و بوتؤولوکده شرق بدیعی-فلسفی دوشونجه‌سینین ان پارلاق سیمالاریندان اولان شمس تبریزی و مؤولانا جلال الدین رومی حاقیندا مؤلیفین مقاله‌لری، ائله جه ده اونلارین یارادیجیلیغیندان ائتدیگی ترجومه‌لر داخیل ائدیلیب.
مؤللیف اورتا عصر قایناقلارینا اساسلاناراق، شمس تبریزینین گئرچک شخصیتی و دوشونجه‌لری اوزرینه ایشیق سالمیش، اونون بیوقرافیاسینین بعضی قارانلیق و موباحیثه لی مقاملارینا آیدینلیق گتیرمه‌یه نایل اولوب.
کیتابدا همچنین مؤولانانین ایره‌لی سوردویو فلسفی-ایجتیماعی تعلیمین ییغجام و آنلاشیقلی شرحی وئریلمیش، اونون ادبی ایرثینین بو گون ده آکتوال و موعاصیر اولماسینی شرطلندیرن باشلیجا عامیللردن بحث ائدیلیب.
قئید ائدک کی، کیتاب مسی آغا محمدی نین ۲۰۱۰-جو ایلده باکیدا چاپ اولونموش عئینی آدلی اثری اساسیندا دوکتور حسین شرقی طرفیندن نشره حاضیرلانیب.
مسی آغا محمدی، گونئی آذربایجان ادبیاتینین تانیدیلماسیندا دا رولو بؤیوک اولموشدور. گونئیلی شاعیرلر و نثرچیلرینین اثرلرینین قوزئی آذربایجاندا تانینماسیندا مسی آغا بَیین داییمی فعالیتلری اولموشدور.
