دیل سئچین

عاریف کسکین ایران آذربایجانین‌دا سیاسی تشکیلاتلانما پروبلئمین‌دن دانیشیر

اویان نیوز: بو ایدئولوژی بحرانلار نتیجه‌سین‌ده اینسانلارین اوستون دیرلره مئیللری قالمیر. هئچ بیر شئیه اینانا بیلمیر، هر شئیه تله کیمی باخیرلار و کیم‌سه‌نین سمیمیتینه اینانمیرلار. اینسان اؤزون‌دن اوستون بیر دیر گؤرمه‌سه تشکیلاتلانما بحرانی دا گون‌ده‌مه گلر.

آمئریکانین سسی ایله موصاحیبه‌ده تورکییه‌ده یاشایان گونئی‌لی ائکسپئرت ایران‌دا آذربایجان‌لی میللی فعاللارینین تشکیلاتلانمالارین‌دا اوزلشیله‌ن پروبلئملر حاق‌دا دانیشیب. عاریف کسکینین سؤزلرینه گؤره، گونئی آذربایجان میللی حرکاتینا منسوب بیر چوخ تشکیلاتین مؤوجود اولماسینا باخمایاراق، حاضردا میللی قوه‌لری سفربر ائد‌جک گوج مرکزی یوخ‌دور.

تورکییه‌ده ایستراتئژی آراش‌دیرما مرکزلرین‌ده اورتا شرق و ایران اوزره ائکسپئرت کیمی چالیشان جناب کسکین ایران‌دا آذربایجان میللی حرکاتینین تاریخی کؤکلرینین ۱۰۰ ایل اؤنجه‌یه قاییتدیغینی بیل‌دیره‌رک، مشروته و خیابانی حرکاتلاری، آذربایجان میللی حکومتی و موسلمان خالق حرکاتینین آدلارینی سادالاییر و بو کئچمیشی آذربایجان‌دا تشکیلاتلانما و مووففق تشکیلاتلار قورما پوتئنسیالینین مؤوجود اولماسینا ثبوت کیمی قیمتلندیریر

عاریف کسکین دئییر کی، ایران‌دا آذربایجان حرکاتینین داخیلین‌ده‌کی پروبلئملرله یاناشی توتالیتار ایسلام رئسپوبلیکاسی رئژیمینین سیاستلری و معاصر تئندئن‌سییالار – او جمله‌دن پوست-مودئرن و نئو-لیبئرال دالغالارین گئنیشله‌نمه‌سی تشکیلاتلانمغی چتینلش‌دیرمک‌ده بؤیوک رول آیناییبلار.

گونئی‌لی ائکسپئرت تشکیلاتلانما قارشی‌سین‌دا اولان انگللرین کؤکونو ایران ایسلام رئسپوبلیکاسینین توتالیتار قورولوشون‌دا گؤرور. اونون دئدیکلرینه اساساً، ایران رئژی‌می دوغرو و یانلیش ائل‌جه ده هالال و حرام آنلاییشلارینی داوام‌لی اولاراق اؤز ماراقلارینا اویغون اولاراق دییشیر و بو مسئله جمعیت‌ده هم اخلاقی و هم ده دینی معنادا بحرانلارین یارانماسینا سبب اولوب: «بو ایدئولوژی بحرانلار نتیجه‌سین‌ده اینسانلارین اوستون دیرلره مئیللری قالمیر. هئچ بیر شئیه اینانا بیلمیر، هر شئیه تله کیمی باخیرلار و کیم‌سه‌نین سمیمیتینه اینانمیرلار. اینسان اؤزون‌دن اوستون بیر دیر گؤرمه‌سه تشکیلاتلانما بحرانی دا گون‌ده‌مه گلر.»

«پ ک ک طرفین‌دن قورولوب و دستک‌لنه‌ن پژاک تشکیلاتی خاریج، حاضردا ایران‌دا فالیت ائد‌ن بوتون تشکیلاتلار ۱۹۷۹ ایسلام اینقیلابین‌دان اؤنجه یارانیبلار»- دئیه آریف کسکین بیلدیریب. او، اینقیلاب‌دان اؤنجه یارانمیش آذربایجان تشکیلاتلارینین بو گون اورتادا اولمادیقلارینی ایسه بئله شرح ائدیر: «کؤکلری اؤنجه‌لره دایان‌سا دا، بوگونکو دوشونجه ۱۹۷۹-دان سونرا فورمالاشیب. مشروته حرکاتین‌دان گلن ختت ۱۹۴۶-دا، آذربایجان میللی حکومتینین ییخیلماسی ایله بیت‌دی. دئموکرات فیرقه‌سی ایسه ایران توده پارتییاسی ایچین‌ده حل اولاراق آذربایجان تشکیلاتی اولماق‌دان چیخ‌دی.»

 قایناق آمریکا سسی

یوروم یازین

Back to Top