دیل سئچین

فردین مرادپور: قضائی قووه سی منیم حاققیمی وئرمکدن چکینیر

ferdin muradpur

اویان نیوزدان ایضاح: بو نامه نی فردین مرادپور تبریز دوستاقیندا یازیبدیر. بو نامه ده فردین مرادپور ایندیلیک آجیلیق اعتراضیله ایلگیلی اولای لاری اؤز قلم ایله آچیقلاییب.

۱۳۸۸ -نجی ایلین باشاق (شهریور) آیی‌نین ۱۱-نده ، ۹۴ گون واهی ایتتیهام‌لارا توتوقلو قالدیقدان سونرا، ۵۰ میلیونلوق وثیقه قراری‌ ایله کئچری سوره اوچون تبریز دوستاغیندان بوراخیلیب یالان دا اولسا اؤزگورلویه قوووشدوم. او گوندن سونرا چوخلو چتینلکلرله اوز-اوزه گلمه‌لی‌ ایدیم. تکجه قارداشیم مرتضی هله دوستاقدایدی، آتام و آنام ایطیلاعاتین اینفیرادی اودالارینین و ایشکنجه‌لرینین روحی ضربه‌سیندن قورتولا بیلمه‌میشدیلر و من قورشون یاراسینین آغریسی و آجیسی‌ ایله بو چتینلیکلرله یاناشی یاشاییشیما داوام ائتمه‌لی ‌ایدیم. آما بونلارلا بئله میللی حرکتین دورومو او قدر ایده‌آل ایدی کی، منی بو چتینلیک‌لرین روحی ضربه‌سیندن اوزاق ساخلادی. بئله کی بو چتینلیک‌لری اؤنمسه‌مه‌دن بوینوما دوشن میللی گؤره‌ولریمی یئرینه گتیرمه‌یه چالیشیردیم. بو آرادا یئری وار بوتون میللتچی یولداش‌لاریمدان و فیکیرداش‌لاریمدان منه و عایله‌مه باش وورماق‌ و آداماقلا بیزی روحی ضربه‌لردن قورودوقلاری اوچون تشکور ائدم. بئله‌لیکله یاشاییش داوام ائدیردی، آما بو داوام بعضی‌لرینین خوشونا گئتمیردی و او اوزدن اؤرنه‌یین بللی اولمایان نؤمره‌دن منه تلفون آچیب ادبسیز لحن‌ ایله بیر آز اؤنجه‌سی هاردا اولدوغومو نه ائتدیگیمی و نه دانیشدیغیمی یادیما سالیب تورلو-تورلو تهدیدلرله گؤزلرینین اوستومده اولدوغونو دئییردیلر یوخسا من نه زامان محکمه‌ده منه قورشون آچیلماسیندان بحث آچسام و شیکایت ائتسم، شیکایت کاغاذیم پرونده‌دن یوخ اولوردو و اؤزومو ده ایطیلاعاتین مامورلاری توتوقلاییب ایطیلاعاتا آپاریب آغیلا سیغماز قونولاردا پرونده سازلیقلا تهدید ائدیردیلر.

بو دوروم نئچه آی دوام ائتدیکدن سونرا تهدیدلرینین منیم اوچون کئچرسیز اولدوغونو آنلاییب باشا دوشدولرکی، نتیجه ده بو دورما سون وئریدیلر و باشقا تورلو یوللارا ال ووردولار. بئله کی محکمه گونو چایان (آبان ) آیی نین ۱۹-وندا عمومی باخیشلاری بیزلرین علیه ینه چئویرمک اوچون و یایدیقلاری یالنیش خبرلری حاخلاماق اوچون محکمه ده سیلاح آل- وئری اوچون توتوقلانمش، بیزه دخلی اولمایان نئچه موتهمی بیزیمله برابر موحاکیمه ائتدیلر. بیر باشقا جالیب قونودا بودور کی، او گون ۱۳ نفر موحاکیمه اولدو و ۱۳ نفرین حؤکمو بیر دادنامه ده ابلاغ اولدو. بیزیم حؤکمه اعتیراضیمیزدان سونرا حجمی ایکی مین صحیفه دن آرتیق اولان پرونده میز بیر گونون عرضینده تجدیدنظر شعبه سی طرفیندن تایید اولموش قطعی دادنامه سینده ۱۴ نفرین حؤکمو ابلاغ اولدو. بئله کی بیزیمله بیرلیکده موحاکیمه اولمایان و کلاشینکف اوچون ده توتوقلانان بیر نفری بیزیم دادنامه یه آرتیرمیشدیلار.

 … نئچه آی سس سیز- سمیرسیز، تهدیدسیز کئچدی و بو آرادا من ایدمان دوستلاریمین بیریسی ایله ایشه باشلادیم. ۱۳۸۸ بالیقلار(اسفند) آیی نین بیر گونونده آخشام چاغی من و ایکی دوستوم همیشه اولدوغو کیمی دوستومون آراباسی ایله ایش یئریندن چیخیب ائوه دوغرو گلیردیک. بو آرادا آرابا صاحیبی اولان دوستوما تئلفون آچیلدی و او تلفونلا دانیشدیقدان سونرا بیزه دئدی، یول اوستونده اسکی دوستلاریندان بیریسی ایله گؤروشوب سونرا بیزی ائوه یئتیره بیله جک. آز سونرا گؤروشه جه یی یئره یئتیشیب دایاندی و آرابادان یئره ائنیب اسکی دوستلاریلا گؤروشدو. سونرا اسکی دوستلارییلا بیرلیکده آرابایا مینیب بیزه دئدی تلسمه سز اونلاری بیر یئره یئتیریب سونرا سیزی ائوه یئتیریم. بیز ده تلسمه دیییمیز اوچون قبول ائدیب یولا دوشدوک. من کی آرابانین اؤنونده کی صندلده اوتورموشدوم. آرابا یولا دوشدوکدن سونرا، دوستومدان بونلار کیمدیرلر دئیه سوردوم و او یاواشجا دئدی کئچمیشده بونلارین یاخین دوستلاریندان بیریسی ایله پروبلئم چیخمیشدی. ایندی بونلارین ایصراری ایله اونونلا باریشماغا گئدیرم. من دوستومون سؤزونو ائشیتدیگیم آن شوبهه لندیم کی اولماسین بونلارین باشقا قصدی اولسون. شوبهه لندیگیم اوچون دوستوما یاواشجا دئدیم آرابانین بنزینین ماهنا ائدیب تئز گئری دؤنوب اونلاری میندیردیگی یئرده یئره سالسین.

اونلار ایصرارلا دئییردیلر بیز اوردا بنزین تاپاریق. دوستوم اونلارین سؤزونه قولاق آسماییب، منیم سؤزومه عمل ائتدی. نتیجه ده اونلاری میندیردیگی یئرده سالیب سونرا بیزی ائوه یئتیردی.

او اولایدان بیر گون کئچدی، آخشام چاغی اینتیظامی قووه سی بیزی آدام اوغورلاما ایتتیهامینا توتوقلاییب کلانتری یه آپاردی. اوردا بیلدیک کی او دوننکی ایکی نفر بیزدن شیکایت ائدیبلر.

مامورلار بیزی سورغویا چکیب سونرا دادیاری یه آپاردیلار. اوچ گون دادیاری و کلانتری یه گئدیب گلدیکدن سونرا دادیاری بیزی سیجیللی ضمانتی ایله بوراخدی. بیر آیا یاخین سونرا دادیاری یئنه بیزی چاغیردی.

۲۶٫۳٫۱۳۸۹  بوراخیلدیغیمیزدان دؤرد آیا یاخین سونرا کلانتری بیزی چاغیریب غیر قانونی اولاراق توتوقلاییب ایبلاغسیز محکمه یه آپاردی و محکمه غیرقانونی اولاراق بیزی ایداری وقتین سونلاریندا آغیر وثیقه قراری ایله دوستاغا گؤندردی. آما یئنه ده غیرقانونی اولاراق هئچ بیریمیزدن قباله قبول ائتمیردیلر و عمدی اولاراق بوراخماق قصدلری یوخ ایدی. بیز دوستاقدان محکمه یه بدرقه اولدوق. محکمه ده بیز شاکینین علیه ینه اولان مدرکلردن سؤز آچدیغیمیزدا او مدرکلرین پرونده دن یوخ اولدوغونو آنلادیق، آما بونلارلا بئله وکیلیمیز «جاوید هوتن کیان» و اؤزوموزون دانیشیقلاریمیز یئترلی اولدو. محکمه نتیجه نی صاباحا ساخلادی و بیز یئنه دوستاغا قاییتدیق. بیر گون سونرا من حؤکمو بیلمک اوچون وکیله تلفون آچیدیغیمدا او محکمه نین بیزی تبرئه ائدیگینی، آما حؤکمو تایپ ائدیب بیزیم آزادلیغیمیزی یازماقلارینین بیر گون سوره جه یینی دئدی. بیز بیر گون ده دؤزدوک. آخشام چاغی اولدو، آما بیزیم آزادلیغیمیز گلمه دی. من نه اولدوغونو بیلمک اوچون هوتن بیه تلفون آچدیم، وکیل منه دئدی دادسیتان وظیفه سی اولمایاراق و غیر قانونی اولاراق بیزیم تبرئه میزه ائعیتراض ائدیب، بیزه جزا ایسته ییبدیر. بئله لیکله محکمه نئچه گون سونرا حؤکونو دةییشدیره رک بیزه شاللاق و تبعید صادیر ائتدی و بیز ده حؤکمه ائعتیراض ائدیب پرونده نی دیوانا چکدیک.

… نئچه آی سونرا پرونده دیواندان نقض اولوب تبریزه قاییتدی. بو آرادا محکمه بونا وارمیشدی کی، بیزی وثیقه قراری ایله بوراخسین .

آما منی اؤنجه محکوم اولدوغوم ۶ ایل حبسه گؤره وثیقه قراری ایله بوراخیلماغا قویمادیلار. دوستوم ایسه وثیقه ایله بوراخیلدی.

بو اولایدان آیلار سونرا، او گونلر چکدیگیم زیندانین منیم اؤنجه کی محکوملوغومدان حئساب ائدیلمه دیگینی بیلدیم و بلکه اون آی یاریم سونرا ۰۶/۰۲/۱۳۹۰ دان پرونده ایجرایا قویولموش.

بو اولایدان سونرا ایکینجی کز موحاکیمه اولدوق. بیز یئنه حؤکمه ایعتیراض ائدیب دیوانا چکدیک و یئنه ده نئچه آی سونرا پرونده دیواندان نقض اولوب تبریزه قاییتدی. نئچه آی سونرا بیز اوچونجو کز موحاکیمه اولدوق و یئنه ده پرونده یه اولونان نفوذلارین نتیجه سینده شاللاق و تبعیده محکوم اولدوق. بیز یئنه حؤکمه ائعتیراض ائدیب دیوانا چکدیک، آما بو کز دیواندا اولونان تاپشیریقلارین نتیجه سینده بیر باشقا واهی ایتتیهاملا شاللاق و تبعیده محکوم اولدوق.

بو ایش ندن، نه تورلو کیملرین نوفوذو ایله باشما گلدی بیلمیرم، آنجاق شاللاق و تبعیده محکوم اولماغیمدان باشقا منیم اون آی ۱۵ گون سوچسوز گوناهسیز دوستاقدا اولماغیما ندن اولدو. قانونی رویه اولاراق بو اون آی ۱۵ گون منیم ۶ ایللیک محکومییتمدن آزالمالیدیر، آما ندنسه نئچه آیدان سونرا هله قضائیه قووه سی منیم بو حاققیمی وئرمکدن چکینیر…

“اویان نیوز”و قایناق گؤستره رک بو خبر پایلاشیمیندا بیر معذرت یوخدور.

 

یوروم یازین

Back to Top