اویان نیوز:
فمینیزم هر کس اوچوندور: فمینیست صینیف موباریزه‌سی
بئل هوکس
آذربایجان تورکجه‌سینه اویغونلاشدیران: تورکان اورمولو
۷-نجی بؤلوم:
فمینینست صینیف موباریزه‌سی
صینیف فرقی و بونون قادین‌لاری بؤلمه فوْرماسی، فمینیست حرکتین ایچینده‌کی قادین‌لارین عیرق مسئله‌سیندن داها اؤنجه اینجه‌له‌دیک‌لری بیر مسئله ایدی. یئنی قورولموش قادین قورتولوش حرکتی‌نین ایچینده، داها چوخ آغدریلی قادین‌لاردان اولان چئوره‌لرده‌کی قادینلار آراسیندا اَن اؤنملی فرق صینیف فرقی ایدی. ایشچی صینیفینه منسوب اولان آغدریلی قادینلار حرکت ایچینده ده صینیف هیرارشی‌‌لرینین اولدوغونون بللی ائدیردی‌لر. حرکتین ایچینده‌کی رئفورمچو و رادیکال گؤروش‌لر آراسینداکی فرق‌لر بیر ایختیلافا ندن اولدو. رئفورمیست گؤروش‌لر تمل اولا‌راق، مؤوجود صینیف قورولوشدا قادین‌لارا ائشیت حاقلارین طلبینی ساوونوردو. داها رادیکال ویا دئوریمچی مودئل‌لر ایسه، وار اولان قورولوشدا کؤکدن دَییشیکلیک‌لرین ائدیلمه‌سینی ایسته‌ییر، بئله‌جه قارشیلیقلی‌لیق و ائشیت‌لیک مودئل‌لری‌نین اسکی نومونه‌لرین یئرینی آلاجاغینی اؤن گؤروردو. آنجاق، فمینیست حرکت گلیشدیکجه و یاخشی ائییتیم گؤرموش ایمتیازلی آغدریلی قادین قروپ‌لاری ائرکک‌لرله ائشیت صینیف گوجونه قوووشماغا باشلادیقجا، فمینیست صینیف موباریزه‌سی اسکیسی قدر اؤنملی گؤرولمه‌مه‌یه باشلادی.
ایمتیازلی صینیف‌لره منسوب اولان قادینلار، حرکتین باشلانقیجیندان بری، اؤز مسئله‌لرینی اوداقلانا‌جاق(متمرکز اولاجاق) “اصیل” مسئله‌لر حالینا گتیره بیلیردیلر؛ چونکی ایجتیماعنین ایلگی‌سینی چکن قروپ اونلار ایدی. کوتله مئدیاسینین دا دقتینی چکدیلر. قادین کوتله‌لری‌نین یا دا چالیشان قادین‌لارین مسئله‌لری هئچ بیر زامان کوتله مئدیاسی طرفیندن گوندمه گتیریلمه‌میشدی. Betty Friedan The Feminine Mystique (قادینلیغین سیری) آدلی کیتابیندا، “آدی اولمایان سوْرونو”، قادین‌لارین، ائو قادینی اولا‌راق ائوین ایچینده حبس ائدیلمه‌لریندن و باسقی گؤرمه‌لریندن دولایی دویدوق‌لاری راحاتسیزلیق اولا‌راق تانیملادی. بو مسئله، قادین‌لارین یاشادیغی بیر بؤحران اولا‌راق سونولسا دا، گئرچکده، آغدریلی قادین‌لاردان اوْلوشان، یاخشی ائییتیم آلمیش، کیچیک بیر قروپون سورونو ایدی. بو قروپ ائوه حبس ائدیلمه‌نین یاراتدیغی تهلوکه‌لردن راحاتسیز اولسا دا اؤلکه‌ده‌کی قادین‌لارین چوخ بؤیوک بیر بؤلومو چالیشیردی. بوتون ائو ایشینی گؤرن، بیر یاندان دا اوزون ساعات‌لار بویونجا چالیشدیق‌لاری ایشلرده چوْخ آز اَمَک حاقی آلان چالیشان بو قادین‌لارین بیر چوخو، بلکه ایمکان‌لاری اولسایدی ائوده اوتورماق حاقینی “اؤزگورلوک” سایاردی.
هر عیرقدن ایمتیازلی قادینا ائوین ائشیگینده چالیشماسینا مانع اولان، توپلومسال جینسیت آیری‌سئچکی‌لییی یا دا جینسیتچی باسقی دئییل، بو قادین‌لارین قبول ائده بیلهجکلری ایشلرین، بوتون ایشچی صینیفیندن اولان قادین‌لارا آز اَمَک حاقی ایله احتیاج اولان، اوزمانلیق یا دا ائییتیم(آموزش) لازیم اولمایان ایشلرین اولدوغو گئرچک ایدی. یاخشی ائییتیم آلمیش ائلیتا(نخبه) قادین قروپ‌لاری، چوخ ساییدا آلت-اوْرتا صینیف ایشچی صینیفیندن قادینین گؤردویو ایشلری ائتمکدنسه ائوده اوْتورماغی اوستون بیلدیلر. بو قادین‌لارین چوْخ آزی، آز حاللاردا دا اوْلسا گله‌نه‌یه قارشی گلدی. اَرلری‌نین و عائله‌لری‌نین موخالیفتینه باخمایا‌راق، ائشیکده، ائییتیم باجاریقلاری‌نین داها آشاغی ایشلرده چالیشدی‌لار. بو مقاومت، ائوین ائشییینده چالیشماغی توپلومسال جینسیت آیری‌سئچکی‌لییی مسئله‌سی حالینا گتیردی؛ آتااَرکییه(مردسالاری) موخالیفتی و اؤز صینیفلریندن ائرکک‌لرله ائشیت حاق‌لار آراییشینی صینیف موباریزه‌سی یئرینه فمینیزمی سئچن بیر سیاسی پلاتفورم حالینا گتیردی.
صینیف ایمتیازینا صاحیب اولان رئفورمیست آغدریلی قادینلار، ایلک باشدان بونو چوخ یاخشی بیلیردیلر: آرادیقلاری ایقتدار و اؤزگورلوک، منسوبو اولدوقلاری صینیفدن ائرکک‌لرین صاحیب اولدوغو دوشونولن اقتدار و اؤزگورلوک ایدی. ائو ایچینده‌کی آتااَرکیل(مردسالارانه) ائرکک حاکم‌لیک دیرنیش‌لری، اونلارین ائرکک حاکیملیییندن یوْرولموش، فرقلی صینیف‌لردن باشقا قادینلار ایله بیرلشمه‌لرینه ندن اولدو. آنجاق، ائوین ائشییینده چالیشان، آمما ائکونومیک آنلامدا اؤزلری اؤزلرینه یئتمک‌لرینه ندن اولاجاق امک حاقی آلا‌جاقلارینی دوشونمک کیمی بیر لوکس دوشونجه‌یه صاحیب ایدیلر. آمما، ایشچی صینیفی‌نین قادین‌لاری، آلدیق‌لاری اَمک حاقلاری‌نین اوْنلاری اؤزگورلشدیرمه‌یه‌جه‌یینی اوْنسوز دا بیلیردیلر.
باشقا طرفدن ایمتیازلی قادین‌لارین، ایش گوجونده دَییشیک‌لیک وئره‌رک قادین‌لارین داها چوخ اَمک حاقی آلماسی و ایش یئرینده توپلومسال جینسیت تمللی آیری‌سئچکیلی و اذیتله داها آز اوزلشمه‌لری یؤنونده‌کی رئفورمیست فعالیت‌لری، بوتون قادین‌لارین حیات‌لارینا اولوملو(موثبت) ائتکی بوراخدی. بو قازانج‌لار اؤنملی‌دیر. یئنه ده ایمتیازلی اولان‌لار صینیفسل آنلامدا قازانج الده ائدرکن، بیر چوخ قادین ائرکک‌لرله ائشیت اَمک حاقی آلا بیلمه‌دی. بو دا صینیف منفعت‌لری‌نین، قادین‌لارین ائشیت اَمک حاقی آلما‌لاری اوچون ایش گوجونون دَییشیمینه یؤنه‌لیک فمینیست فعالیتی بیر قیراغا آتدیغینین گؤسترگه‌سیدیر.
لئزبیین فمینیست دوشونرلر(متفکیرلر)، فمینیست حرکتده ایلک دفعه صینیف مسئله‌لرینی گوندمه گتیرن، گؤروش‌لرینی آنلاشیلا بیلن بیر دیل ایله ایفاده ائدن آکتیویست‌لردن ایدی. اونلارا دستک اولسون دئیه اَرلرینه بئل باغلاماغی خیال بئله ائتمه‌ییردیلر و بیر چوخ زامان، بوتون قادین‌لارین ایش گوجونده قارشیلاشا‌جاق‌لاری سوْرون‌لارین(مسئله‌لرین)، هتروسئکسوال(قارشی جینسه ماراقلی اولان) قادین‌لاردان داها چوخ فرقینده ایدیلر. Charlotte Bunch و Nancy Myronun-ون یایینلادیق‌لاری Class and Feminism (صینیف و فمینیزم) کیمی ۱۹۷۰-جی ایللرده، فرقلی کئچمیش‌لره صاحیب اولان قادینلار ایله بو مسئله ایله ایلگیلی ائتدیک‌لری دارتیشما‌لاری قونو ائدن یازی‌لاری تاپیلیردی. هر یازی، هر یازی صینیفین آنجاق بیر پول مسئله‌سی اولمادیغی گئرچه‌یینی وورغولاییردی. “The Last Straw” (بارداغی داشدیران سوْن داملا) باشلیقلی یازی‌سیندا، (هله آدلیم بیر یازار اولمایان Rita Mae Brown) آچیقجا بونو یازمیشدی:
صینیف، مارکسین “اورتیم(تولید) آراج‌لاری ایله ایلیشکی‌لی” تانیمیندان داها آرتیق بیر شئی‌دیر. صینیف؛ داورانیش‌لارینیز، تمل وارساییم‌لارینیز(فرضیه‌لرینیز)، نئجه داوراناجاغینیزین اؤیردیلمه بیچیمی، اؤزونوز و باشقا‌لاریندان نه گؤزله‌دییینیز، گله‌جک آنلاییشینیز، سوْرون‌لاری نئجه آنلادیغینیز و چؤزدویونوز، نئجه دوشوندویونوز، حیس ائتدییینیز و داوراندیغینیزلا ایلگیلیدیر.
فرقلی صینیف‌لری ایچرن فمینیست قروپ‌لارا گیرن قادینلار، آتااَرکییه قارشی ساواشدا بوتون قادین‌لاری بیرلشدیرن پولیتیک تمللی باجیلیق گؤروشونون، صینیف مسئله‌سی ایله اوزلشیلمه‌دن گئرچکلشمه‌یه‌جه‌یینی گؤرن ایلک قادینلار ایدی.
صینیفین، فمینیست گوندمه اوتورولماسی، صینیف و عیرقین کسیشمه نؤقطه‌لری‌نین گؤرونر ائدجه‌یی آلان‌لار(ساحه‌لر) آچدی. قارادریلی قادینلار، آمئریکا توپلوموندا قورومساللاشمیش(نهادینه اوْلموش) اولان عیرق، جینسیت و صینیف تمللی توپلومسال سیستئمده، آچیق بیچیمده ائکونومیک هیرارشی‌نین اَن آلت قیسمینده یئر آلیردی‌لار. باشلانقیجدا، ایشچی صینیفی کئچمیشینه صاحیب، یاخشی ائییتیم گؤرموش آغدریلی قادینلار، فمینیست حرکت ایچینده، هر صینیفدن قارادریلی قادین‌لارا گؤره داها چوخ گؤرونوردولر. حرکت ایچینده آزلیقدا ایدیلر، اما اونلارین سسی، تجروبه‌نین سسی ایدی. عیرق، صینیف و توپلومسال جینسیت حاکملییینه قارشی دیرنمه‌نین بدلینی، فرقلی عیرق‌لردن گلن، ایمتیازلی صینیف منسوبو یولداش‌لاریندان داها یاخشی بیلیردیلر. بیر اینسانین ائکونومیک دورومونو دوزلتمک اوچون موباریزه ائتمه‌یی‌نین نئجه بیر شئی اولدوغونو یاشایا‌راق اؤیرنمیشدی‌لر. اؤزلری ایله ایمتیازلی صینیف‌لره منسوب یولداش‌لاری آراسیندا، اویغون داورانیش اوزرینه، هانسی قونولارین تمل فمینیست مسئله‌لر اولاجاغی اوزریندن گئدن آنلاشمازلیق‌لاری وار ایدی. بو سایه‌ده، قادین حرکتی ایچینده‌کی، داها اؤنجه هئچ سولچو اؤزگورلوک موباریزه‌سینه قاتیلمامیش، ایمتیازلی صینیف کئچمیشینه صاحیب قادینلار، صینیف موباریزه‌سی‌نین سوْموت(عئینی) پولیتیکاسینی اؤیرندی‌لر؛ داها آز ایمتیازلی قادین‌لارین اعتراضلاری ایله قارشی قارشییا اولان قادینلار و سورج(گئدیشات) ایچینده، حاق ساوونما باجاریق‌لاری و ضدیت، قوروجو و یاخشیلاشدیریجی بیر شکیلده ایلگیلنمه بیچیم‌لرینی گلیشدیردی‌لر، آمما، یارادیجی موداخیله‌لره باخمایا‌راق بیر چوْخ ایمتیازلی آغدریلی قادین دا فمینیزم اؤزلرینه عاید ایمیش، فمینیزمدن اؤزلری سوْروملو ایمیش کیمی داورانماغا داوام ائتدی. یئرینه اوْتورموش آتااَرکیل، دیقته دَیر اؤزللیکده اوْلان مسئله‌لرین یالنیز ایمتیازلی صینیف منسوبو قادین‌لارین مسئله‌سی اولدوغو دوشونجه‌سینی گوجلندیردی. فمینیست رئفورم، قادین‌لارین مؤوجود قورولوش ایچینده توپلومسال ائشیت‌لیک قازانماسینی آماجلاییردی. ایمتیازلی قادی‌لار اؤز صینیف‌لرینه منسوب اولان ائرکک‌لر ایله ائشیت‌لیک ایسته‌دیلر. اؤز صینیف‌لری ایچینده‌کی مؤوجود جینسیتچی‌لییه باخمایا‌راق، ایشچی صینیفی ائرکک‌لری‌نین آلین‌یازی‌سینا صاحیب اولماغی ایسته‌مزدی‌لر. قادین‌لارین اؤز صینیفلریندن ائرکک‌لرله توپلومسال ائشیت‌لیک قازانماسینا یؤنلمیش فمینیست فعالیت‌لر، آغدریلی اوستونلوکچو، کاپیتالیست، آتااَرکیل قوْرخولارلا، یعنی آغدریلی اولمایان‌لارین ائکونومیک گوجه و آیریجالیغا ائشیت درجه‌ده اَلده ائتمه‌نین حاکم اوْلان‌لارین اقتدارلارینی آزالداجاغی قورخوسو ایله بیرلشدی. سوْنوجدا، آغدریلی اقتدار طرفداری رئفورمیست فمینیزمه دؤنوشن شئیی دستکله‌مک، بیر یاندان یئرلشمیش آغدریلی اوستونلوکچو آتااَرکی‌نین گوجونو آرتیرارکن بیر یاندان دا رادیکال فمینیست پولیتیکانی ضعیفلتدی.
فمینیست حرکتین سیستئمه آرتیریلماسینا قارشی موخالیفت‌لرینی دیله گتیرن‌لر تکجه دئوریمچی فمینیست دوشونرلر ایدی. ائلشدیریمیز(تنقیدیمیز) و موخالیفتیمیز، آلتئرناتیو مئدیادا اؤز عکسینی تاپدی. رادیکال آغدریلی آکتیویست ماری بارفوت(Mary Barfoot)، یازی‌لارینی توپلادیغیThe Coming of Black Genocide(قارادریلی سوْی‌قیریمین گلیشی) آدلی اثرینده، جسارتله بونلاری دیله گتیردی:
۱۹۷۰-جی ایللرده قادین حرکتی‌نین باجیلیق آنلامینا گلدییینه اینانان، کاریئر صاحیبی بعضی قادینلار طرفیندن خیانته معروض قالدیق‌لارینی دوشونن، اینجیمیش و حیرس‌لی آغدریلی قادینلار واردیر. اونلارا گؤره، اونلارارین خیانته معروض قویولدوق‌لارینا سبب اولان‌لار، آتااَرکییه گئری دؤنن قادین‌لاردیرلار، آمما قادین حرکتی هئچ بیر زامان اوْنسوز دا دیک بابانین[۱] یانیندان آیریلمادی کی… ساواش یوخدو. اؤزگورلشمه ده یوخ ایدی. سوْی‌قیریمیندان اَله گتیریلن منفعتدن پای آلدیق و بو دوروما چوخ سئوینیریک. بیز آتااَرکی‌نین باجیلاریییق، اولوسال و صینیفسل سؤمورونون، دونیا میقیاسیندا آتااَرکی‌نین اَن گلیشمیش شکلی اولان آوروپا ایمپئریالیزمی‌نین گئرچک طرفدارلاریییق. اَیر دیکین باجیلیق و اونون صاحیب اولماغی باشاردیقلارینی الده ائتمک ایسته‌ییریکسه، سوْنوندا اوْنون صاحیب اولدوقلارینی بوْرجلو اوْلدوغو سیستئمی ده دستکله‌میش اوْلوروق.
اصلینده بیر چوْخ فمینیست قادین اوچون، آغدریلی اوستونلویونو ساوونان دوشونجه‌دن واز کئچمک صینیف ائلیتیزمیندن واز کئچمک‌دن داها راحت ایدی و هله ده ائله‌دیر.
ایمتیازلی قادینلار، اؤز صینیف‌لرینده‌کی ائرکک‌لر ایله بیرلیکده داها آرتیق ائکونومیک گوجه قوووشونجا، صینیفله ایلگیلی فمینیست دارتیشما‌لار ائتکی‌سی قدر ائدیلمه‌مه‌یه باشلاندی. بونون یئرینه قادینلار، زنگین قادین‌لارین ائکونومیک قازانج‌لارینی بوتون قادینلار اوچون اولوملو(موثبت) بیر علامت اولا‌راق گؤرمه‌یه آلقیش‌لار. گئرچکده بو قازانج‌لار، یوخسول و ایشچی صینیفی قادین‌لارینین اؤزلرینی آزا‌راق دَییشدیردی. ایمتیازلی ائرکک‌لر ائو ایشلرینی ائشیت شکیلده پایلاشماغا باشلامادیغی اوچون، هر عیرقدن ایمتیازلی قادینین اؤزگورلویو، ایشچی صینیفی‌نین و یوخسول قادین‌لارین اوزون بیر سوره داها بوْیون ایمه‌سینی گرکدیردی. ۱۹۹۰-جی ایللرده مؤوجود توپلومسال قورولوشلا گؤرولن ایش‌بیرلییی “قادین اؤزگورلشمه‌سی”نین اورتایا چیخاردیغی سوْنوج ایدی. سوْنوندا صینیف اقتدارینین فمینیزمدن داها اؤنملی اولدوغو آنلاشیلدی و بو ایش‌بیرلیگی، فمینیست حرکتده دنگه‌سیزلییه(تعادولسوزلوک) یول آچدی.
قادینلار، اؤزلرینی ائرکک‌لردن داورانماغا یؤنلتمه‌دن، داها بؤیوک بیر صینیفسل موقعیت و اقتدار اَله گتیرینجه فمینیست پولیتیکایا ضرر وئردی. بیر چوخ قادین خیانته معروض قالدیغینی حیس ائتدی. فمینیست ائتیک(اخلاق) ندنی ایله بیردن بیره ایش گوجونه مجبور ائدیلن اورتا صینیف و آلت-اورتا صینیف قادینلار، اؤزلرینی اؤزگورلشمیش حیس ائتمه‌دی‌لر. چونکی ائوین دیشیندا چالیشمانین ائو ایشلرینی ائرکک پارتنئرلری ایله بؤلوشمه آنلامینا گلمه‌دییی گئرچه‌یی ایله اوز- اوزه قالمیشدی‌لار. نؤقصانا اساسلانمایان، خطا‌لی طرفه گئتمه‌دن گئرچکلشدیریلن بوشانما، ائرکک اوچون داها فایدا‌لی ایدی. قارادریلی ویا آغدریلی اولمایان بیر چوخ قادین، ایمتیازلی صینیف‌لره منسوب اولان آغدریلی قادین‌لارین، رئفورمیست فمینیست قازانج‌لارین‌دان مثال اولا‌راق توپلومسال جینسیت مسئله‌سی‌نین پوْزیتیو آیریسئچکی[۲]لیک پروْقرامینا باغلاماسیندان باشقا قادین‌لارا گؤره ائکونومیک اولا‌راق داها چوخ یارارلاندیق‌لارینی دوشوندولر. بو دوروم، فمینیزمین گئرچکده آغدریلی اقتدارینی گوجلندیرمه‌یه یارادیغینا دایر ماراقلارینی تصدیق ائتمیش اولدو. فمینیزمین اینجه‌له‌دییی مسئله‌لرین اَن دریندن خیانته معروض قالدیغی نؤقطه، حؤکومتین اَرسیز آنا‌لارا قارشی هوجومونون کوتله‌سل بیر فمینیست اعتراضی ایله قارشیلیق تاپماسی و سوسیال یاردیم سیستئمی‌نین سوْنا چاتدیریلماسی ایله گئرچکلشدی. بیر چوْخو اؤزونو فمینیست اولا‌راق آدلاندیران ایمتیازلی قادینلار “یوخسوللوغون قادینلاشدیریلماسی”نا اوز چئویردی.
“اقتدار فمینیزمی”نین سسی، کوتله مئدیاسیندا، صینیفسل گوجو اَله کئچیرن، آمما صینیفسل آیریجالیغا(ایمتیازا) صاحیب اولمایان قادین‌لارا دایانیشماغا(همبستگی) دا بوراخمایان فمینیست قادین‌لارین شخصی سس‌لریندن داها چوخ ائشیدیلیردی، آمما بیزیم صداقتله فمینیست پولیتیکادا باغلی اولدوغوموز هدف، ائکونومیک اولا‌راق اؤزونه یئترلی حالا گلمک و دیگر قادین‌لارین دا ائکونومیک آنلامدا یاخشیلاشدیریلماسینا یاردیمچی اولماقدی؛ بو هدف بو گون ده کئچرلی‌لییینی قوْروماقدا‌دیر. تجروبه‌لریمیز، قادین‌لارین قازانج اَلده ائده بیله‌جه‌یی وارساییمی‌نین یانلیش اوْلدوغونو گؤستردی. بو اؤلکه‌ده، صینیفسل گوجو و توپلومسال دَییشیمه دایر دئوریمچی بیر باخیشی اولان فمینیست‌لر، صینیفسل دورومو نه اوْلور اوْلسون بوتون قادین‌لارین یاشام‌لارینی یاخشی‌لاشدیرا‌جاق رئفورم‌لارا دستک اوْلماق آماجی ایله قایناق‌لارینی بؤلوشور و اوْرتاق گوجلرینی ایشله‌دیرلر.
فمینیست اؤزگورلشمه‌یه دایر تک گئرچک اومود، صینیف ائلیتیزمینی قارشی‌سینا آلان بیر توْپلومسال دَییشیم فیکرینده‌دیر. باتیلی(غربی) قادین‌لارین صینیفسل گوج قازانماسی‌نین و توپلومسال جینسیت ائشیتسیزلیگی‌نین بؤیومه‌سی‌نین آرخاسینداکی ندن، کوره‌سل(جهانی) آغدریلی اوستونلوکچو آتااَرکی‌نین اوچونجو دونیا اؤلکه‌لریندن قادین کوتله‌لرینی کؤله‌لشدیرمه‌سی(کؤله: قول) ویا اؤزونه تابع ائتمه‌سی‌دیر. آمئریکادا سورعتله بؤیوین حبس‌خانا صنایعی، موحافیظه‌کار کؤچ پولیتیکا‌لاری و ایشه گؤتورمه تمللی سوسیال یاردیم سیستئمی، یاسال کؤله‌لیک شرطلرینی یاراتماقدا و عینی زاماندا بو شرطلرین اوستونو اؤرتمکده‌دیر. سوسیال یاردیمین سوْنا چاتماسی، یئنی یوْخسول قادین و اوشاق‌لار یارادا‌جاق، اوْنلارین مؤوجود حاکم قورولوش‌لاری طرفیندن ایستیثمار ائدیلمه‌لرینه و سؤمورولمه‌لرینه یول آچا‌جاق‌دیر.
آمئریکادا صینیف گئرچک‌لیک‌لری دَییشیر؛ زنگین ایله یوْخسول آراسینداکی اوچوروم گئنیشله‌ییر و یوْخسوللوق قادینلاشیر. بو اوزدن، کئچمیشین گوجو و رئفورم‌لارین ندن اوْلدوغو پوْزیتیو قازانج‌لار اوزرینده یوکسلمکله بیرلیکده بعضی یانلیش‌لار ایچرن مؤوجود فمینیست تئورینی آنلاملی بیر شکیلده سوْرغولایان و بیزه یئنی ایستراتژیلر تقدیم ائتسین، کوتله اساسلی رادیکال بیر فمینیست حرکته احتیاجیمیز واردیر. گله‌جه‌یی گؤرن بیر حرکت، چالیشما‌لارینی، طبیعی کی، ایشچی صینیفی و یوْخسول قادین‌لارین سوْموت(کونکرئت) شرطلری اوزرینه تمللندیرمه‌لی‌دیر. بو، ائلشدیرل بیر بیلینج گلیشدیرمک اوزره ائییتیمه اؤنجول(پیشرو) اوْلا‌جاق بیر حرکت اوْلوشدورماق، صینیفسل گوجو اولان فمینیست قادین‌لارین آز گلیرلی قادین‌لارا، صاحیبی اوْلا بیلهجکلری ائولر قورا بیلمه‌لری آنلامینا گلیر. فمینیست ایلکه‌لرله(اساس‌لارلا) ائو کووپئراتیو‌لری(ایش‌بیرلیی، تعاون) یاراتماق، فمینیست موباریزه‌نین اصلینده بوتون قادین‌لارین حیات‌لاری ایله ایلگیلی اولدوغونو گؤستره بیلر.
صینیفسل گوجه صاحیب اولان قادینلار، فمینیست پلاتفورمو اوپورتونیستجه(فورصت‌طلب‌لیکله) ایشله‌درکن، بیر یاندان دا فمینیست پوْلیتیکا‌لاری یوْخ ائدیر و سوْنوندا اؤزلرینی یئنیدن تابع ائده‌جک بیر آتااَرکیل سیستئمین سورمه‌سینه یول آچیرلار. ساده‌جه فمینیزمه دئییل، اؤزلرینه ده خیانت ائدیرلر. فمینیست قادینلار و ائرکک‌لر، صینیف دارتیشماسینا گئری دؤنرکن، دایانیشما اوچون گرک‌لی شرطلری یئنیدن یارادا‌جاق‌لار. آردیندان، قایناق‌لارین پایلاشیلدیغی و صینیفینه باخما‌دان هر کسه شخصی گلیشیم ایمکانینی یارا‌دان بیر دونیانی داها یاخشی تصووور ائده بیله‌جه‌ییک.
[۱] دیک(Dick) بابا، ریچارد نیکسون(Richard Nixon) اوچون ایشله‌دیلیر. ریچارد نیکسون ریاکارلیغی ندنی ایله حیله‌کار دیک اوْلا‌راق دا آدلاندیریلیر.
[۲] اینگیلیجه‌سی- Affirmative Action: آمئریکادا ایشه آلینماقدا ائشیت فورصت‌لر یاراتماق آماجی ایله تطبیق اولونان بو پروْقراملار، ایش و آکادئمی دونیا‌لاریندا توْپلومسال اوْلا‌راق دئزآوانتاژلی کسیم‌لره اؤنجه‌لیک تانیییر. اؤرنک اوْلا‌راق بیر قادین و بیر ائرکک، آکادئمیده آچیلان بیر کورسو اوچون عینی درجه‌یه لاییق گؤرولسه ده، دئزآوانتاژلی قروپ ایله حاکم (آغدریلی ائرکک) قروپ آراسینداکی فرقی قاپاتماق آماجی ایله قادینا اوستونلوک وئریلیر.
