اویان نیوزا اؤزل: ماراغا دا آذربایجانلی ایکی مدنی فعالین محکمه اوتورومو کئچیریلدی.
اویان نیوز موخبیرینین راپورونا گؤره، چرشنبه گونو ۱۳۹۲ خوردادین ۲۹ -ی ماراغانین اینقلاب محکه مه سی داود عظیم زاده و بهمن خالقی نین ایتتیهام ایدعالاری اوچون محکمه قوردو. ماراغا محکه مه سینین باشقانی قاضی داورنیا آذربایجانلی بو مدنی فعاللاری تشکیلات عوضوی و میللی امنیت اخلالی ایدعالاری ایله ایتتیهاملادی. آذربایجانلی مدنی فعاللار بو ایتیهاملاری رد ائتدیلر و وکیللری طرفیندن دیفاع ائدیلدیلر.
دئیلمه لیدیر کی محکه مه ساعات ۱۲ ده باشلادی و ساعات ۱۴ ده قدر دوام ائتدی. محکه مه سونوندا پرونده نین قاضی سی اوتورومون دوامینی باشقا بیر زامانا آتدی.
آذربایجانلی بو مدنی فعاللارین وکالتی نی فاطمه ستاری و جعفر افشارنیا بویونلارینا آلیب لار.
خاطیرلاتیلمالیدیر کی ۱۳۹۱ دی آینین ۲۴ -و داود عظیم زاده و بهمن خالقی ماراغا میللتی ایله یان یانا ایرانین ارمنیستان ایله ارتیباط دا خاریجی سیاستینه قارشی اعتیراضلاردان بیر گون سونرا مامورلار طرفیندن ماراغا و بیناب داکی اؤز ائولرینده توتوقلانمیشدیلار.
“اویان نیوز”و قایناق گؤستره رک بو خبر پایلاشیمیندا بیر معذرت یوخدور.
