دیل سئچین

ماراغا بیلیمیوردوندا "وطن" آدلی شئعر آخشامی کئچیریلدی

Arm nahaee

اویان نیوزا اؤزل : ماراغا بیلیم‌یوردونون فجر آمفی تئاتریندا کئچیریلن شعر آخشامیندا، اؤیرنجی‌لر، اؤیرتمن‌لر، ماراغا اوحدی درنگی‌نین عضو‌لری و بیر نئچه بیناب شهریندن قوناق گلمیش شاعیرلر ایشتیراک ائتدیلر.

اویان نیوز-ون راپورونا گؤره، اردیبهشت آیینین ایکینجی گونو ماراغا بیلیم‌یوردونون آذربایجان تانیتیم اوجاغی طرفیندن  کئچیریلن شئعر آخشامیندا  “وطن” مؤوضوعلو تورکجه شعرلر اوخونولدو .

اوجاق ایشه باشلادیغیندان بری، پروقراملار بیلیم‌یوردون بیر چوخ  اؤیرنجی‌لری طرفیندن یاخشی قارشیلانیب چوغ ساییلی اینسانلارین ایشتراکب ایله پروقراملار کئچیریلیر. بو ایل ده کئچن ایللر کیمی بیر چوخ اؤیرنجی‌لرین پروقراملار یاخشی قارشیلانمیشدیر. بئله کی، بیلیم یوردونون آمفی تئاتریندا اوتورماق اوچون یئرین اولمادیغینا گؤره، بیر چوخ اینسان آیاق‌اوسته پروقرامی ایزله‌ییردیلر.

ماراغا بیلیم‌یوردونون کولتورل ایشلری مسئولو “موسوی”نین چیخیشیندان سونرا اوجاغین مودورو “بهزاد ملک‌زاده” بیر نئچه قونونو و اوجاغین فعالیت چرچیوه‌لرینی آچیقلایارکن دئدی: بیز بیر نئچه اؤیرنجی‌ییک، دیلیمیزین سئوگیسی و  دولو داغارجیغینا دایاناراق کولتورل چالیشمالاریمیزلا آذربایجانیمیزا و اونون سورونلارینین چؤزولمه‌سینه سعی گؤسته‌ره‌رک بو درنکده بیر یئره توپلانمیشیق. آذربایجانیمیزین دیلی اولان تورکجه‌میزین قورونماسی اساس بیلیریک! نییه کی تورک دیلیمیز اولمادیغیندا بیزیم کیملیگیمیز سووال آلتینا گئدیر .
سونرا اؤیرنجی‌لر و بیر نئچه اوحدی درنگیندن گلن قوناقلار شئعرلرینی ایفا ائتدیلر. شعرلر اؤیرنجی یوکسک آلقیشلامالارییلا قارشیلاندی.
ماراغا اوحدی درنگی‌نین شاعیرلرینین تمثیلچی‌سی “رضا جودت”، اوجاغا گلن شئعرلرین سئچیلمه‌ قوراللارینی آچیقلاییب و دئدی :شعرلرین دیلی ، سبکی و ژانرلارینین فرقلرینه باخمایاراق اوخونموش شئعرلرین بیر نئچه‌سینه دَیر وئریب، بیر سیرا باخیشلار و ایستک‌لرله بو شئعیرلر سیرالانمیش‌لار. یوخسا هئچ شئعری باشقاسیندان اوستون گؤره بیلمه‌ریک.

بئله‌لیکله داوود کارگر “آراز” آدلی شئعری ایله بیرینجی، امیر طاهری “گئجه‌لر” آدلی شئعرییله ایکینجی و حسین مردی  “سنی آختاریرام ” آدلی شئعری ایله داورلر طرفیندن اوچونجو یئره لاییق گؤرولدو.

بو آرادا خانیم نعمتی‌نین “ماهواره” آدلی طنز شئعرلری اؤیرنجی‌لرین بؤیوک آلقیشینا سبب اولدو. بو شئعر کئچیریلن شئعر آخشامی‌نین آتموسفئرینه موثبت انرژی آرتیردی. پروقرامین سونوندا شاعیرلردن ده تقدیر اولوندو.

یوروم یازین

Back to Top