دیل سئچین

ميکاييل تورينين محکمه ايجلاسي کئچيريلدي

salar-turi-300x225

اویان نیوز: گونئی آذربایجانلی میللی فعال میکاییل تورینین محکمه ایجلاسی کئچیریلدی.

اویان نیوز-ون آلدیغی خبره گؤره ۱۶ یانوار ۲۰۱۴ تاریخینده میللی فعال سالار تورینین محکمه‌سی تبریز اینقیلاب محکمه‌سینین ایکینجی شؤعبه سینده حاکیم ایمانینین باشچیلیغی ایله کئچیریلمیشدیر.

حاکیم ایمانی، بو میللی فعالا ایران ایسلام جومهوریتینه قارشی تبلیغ ائتمک ایتتیهامینی ایره‌لی سورموشدور.

میکاییل(سالار) توری،۱۶ سئنیابر ۲۰۱۳ تاریخینده تبریز محکمه‌سینده پروکورورلوغا گئتدیکدن سونار یانار قفه‌سینین محکمه‌سی ایشی ایله علاقه لی مولکی گئییملی شخصلرین طرفیندن یاخالانیب ایطیلاعات ایداره‌سینه آپاریلمیشدی.

میکاییل توری، تخمینن بیر آی مودتینده ایطیلاعاتین کامئراسیندا ساخلانیلدیقدان سونرا ۱۵ اوکتیابر ۲۰۱۳ تاریخینده تبریزین مرکزی حبس خاناسینا گؤندریلدی.

بو آذربایجانلی فعال، ۳۴ گون مودتینده ساخلانیلدیقدان سونرا ۵۰ میلیون تومنلیک وثیقه قارشیلیغیندا تبریز حبس خاناسیندان آزادلیغیا بوراخیلدی.

کئچن آی میکاییل(سالار) توری، تبریز ساکینی اولان ۴ باشقا آذربایجان فعاللا، تبریز شهرینین محکمه پروکورورلوغوندا یانار قفه‌سینین محکمه ایشی ایله باغلی ایتتیهام ایره‌لی سورولدو.

۱۹-نجو پروکورورلوق شؤعبه سینین رییسی، حاکیم صمدی، میکاییل توری و باشقا میللی فعاللارین ایتتیهامینی توپلاشما و نیظاما قارشی بیرلشمه ایتتیهامینی ایره‌لی سورموشدو.

داها اؤنجه ده میکاییل(سالار) توری، میللی فعالیتلری اوچون یاخالانیب حبسه محکوم ائدیلمیشدی.

۲۴ فئورال ۲۰۱۳ تاریخینده تراختور فوتبول ییغماسینین ایلک آسیا اویونوندا، مولکی گئییملیلر و پولیس تبریزین گلشهر بؤلگه سینده یانار قفه‌سینه هوجوم ائدیب ۵۰ میللی فعال و قفه موشتریسینی یاخالامیشدلار.

۳۰ فئورال ۲۰۱۳ تاریخینده سالار توری، محمد امیری، محمد خطیبی، علی سیرناک و عادیل خندانلا بیرگه ایلک محکمه ایجلاسینا گتیریلدیکدن سونرا یئنیدن حبس مودتلری اوزادیلاراق تبریز حبس خاناسینا گئری قایتاریلدیلار.

۱۲ مارت ۲۰۱۳ تاریخینده دیگر حبس ائدیلن فعاللارلا بیرلیکده ۱۰۰ میلیون تومنلیک وثیقه قارشیلیغیندا آزاد ائدیلدی.

میکاییل هم ده دونیا آنا دیلی گونو عرفه سینده ۲۰ فئورال ۲۰۱۲ تاریخینده وحید حبیب چشمه ایله بیرگه ائوینده حبس ائدیلمیشدی. تخمینن اوچ آی مووققت حبسده ساخلانیلدیقدان سونرا ۹ مارت ۲۰۱۳ تاریخینده تبریز محکمه‌سی سوچسوز تانییاراق سربست بوراخیلماسینا ایذن وئردی.

تبریز عومومی و اینقیلاب محکمه‌سی موعاوینین، شرقی آذربایجان آپئللیاسییا(تجدید نظر) محکمه‌سینین سککیزنجی شؤعبه سینه ائتدیگی اعتیراضدان سونرا سالار توری و وحید حبیب چشمه‌نین سوچسوزلوق حؤکمو ۴ آی آسیلی حبس حؤکمو ایله دییشدیریلدی.

 

 

یوروم یازین

Back to Top