اویان نیوز: حوقوق مودافیعه‌چیلری و آذربایجان وئب صحیفه‌لرینین معلوماتینا گؤره، فئورالین ۲۰-ده دونیا آنا دیلی گونو موناسیبتی ایله اهر شهرینده تشکیل اولونموش توپلانتیدا حبس ائدیلمیش آذربایجانلی فعاللارین بیری ،تانینمیش شاعیر و تورک دیلی معللیمی ایبراهیم ساوالان (رشیدی)تبریز زیندانینا گؤندریلیب.
معلوماتدا دئییلیر کی، ایبراهیم ساوالان‌دان سونرا، نظارت آلتینا آلینانلارین هامیسی اؤتن گونلرده موقتی اولاراق سربست بوراخیلیبلار.
“اویان نیوز” سایتی‌نین یازدیغینا گؤره، خییاولی تورک فعال داها اؤنجهتبریز اینقیلاب محکمه‌سی طرفیندن محکوم اولدوغو بیر ایل حبس موددتینی تاماملاماق اوچون اهر زیندانیندان تبریزین مرکزی حبسخاناسینا کؤچورولوب.
اورمیه دانیشگاهی‌نین مأذونو و گونئی‌ده اؤیرنجی حرکاتینین تانینمیش سیمالاریندان اولان ایبراهیم ساوالان ۲۰۰۳-جو ایلدن بری دفعه لرله نظارت آلتینا آلینیب و اورمیه، تبریز، اهر، اردبیل و مئشگین‌شهر (خییاو) کیمی شهرلرین زیندانلاری، هابئله تئهرانین ائوین حبسخاناسیندا ساخلانیب.
اینسان حاقلاری قروپلارینین یایدیغی معلوماتا گؤره، فئورالین ۲۰-ده ایرانین تهلوکه‌سیزلیک مأمورلاری شرقی آذربایجان ولایتی‌نین اهر شهرینده دونیا آنا دیلی گونو موناسیبتی ایله کئچیریلن مراسیمه توپلاشان ۱۰۰ نفره یاخین گونئی‌لی فعالی نظارت آلتینا آلیب. شرقی آذربایجان ولایتی‌نین عدلیه ایداره‌سی ایسه همین مراسیمده ۵۹ نفرین حبس ائدیلدیگینی تصدیق ائدیب.
“اهر شهرینین عومومی و اینقیلاب محکمه‌سینه استینادن، شرقی آذربایجان، غربی آذربایجان و اردبیل ولایتلریندن اولان ۵۹ میلتچی اهر شهرینده بیر ائوده توپلانیب آنا دیلی گونونو قئید ائتدیکلری زامان پلیس طرفیندن نظارت آلتینا آلینیب. پلیس وتهلوکه‌سیزلیک قوروملارینین حساباتی، ائلجه ده توتولانلارین کئچمیشینی نظره آلاراق اونلارا ایران ایسلام رئسپوبلیکاسی‌نین تهلوکه‌سیزلیگینی پوزماق هدفی ایله فعالیت گؤسترن تشکیلاتلار قورماق و یا عضو اولماق ایتتیهامی ایله محکمه ایشی آچیلیب،” دئیه شرقی آذربایجان عدلیه ایداره‌سی‌نین وئب صحیفه سینده قئید ائدیلیب.
آمئریکانین سسی- علیرضا قولونجو
