دیل سئچین

یولدادیر گوللو باهار آچمادادیر نازلی سحر - اسماعیل جمیلی

اویان نیوز :

گلهجک یار بیزه بیر گون ائل آرا صحبتی وار

گله جک آمما بیر آز ناز ائله مک عادتی وار

سایما سایسیز یارامی واردیر اومود درمانیمیز
سئوگی سئودا یولونون بوللو غمی محنتی وار

قیناما یانسا اگر باغری قئزیل لاله میزین
خان آراز بویدا ائلین نیسگیلی وار حسرتی وار

دیلی باغلی قولو باغلی تالانان یوردوموزون
یارالی ارک کیمی اؤزلوگونه غیرتی وار

هر کؤنول بیر قالادیر هر سینه سینماز سنگر
سئوگی مولکونده ائلین اؤز آدینا دولتی وار

ساوالان تاجینی تاریخدن آلیب سلطان اولوب
ترک دیلین بایراق ائدن اوردوسو وار ملتّی وار

دئمه داشمیر نیه وولکانلی سهندین اوره گی
مصلحت آدلی بوگون دؤزمه یینین علّتی وار

تولکو یادلار قودوروب اولسادا حاکیم نئچه گون
یئنی دوران یارادان خالقیمیزین قدرتی وار

بیرده اویماز فئلینه یوسما شکر دیللی یادین
ائلیمین اؤز دیلینه تورپاغینا حرمتی وار

یولدادیر گوللو باهار آچمادادیر نازلی سحر
قورتولوش گونلرینین سازلی سؤزو صحبتی وار

اسماعیل جمیلی


یوروم یازین

Back to Top