دیل سئچین

29 آبان فریدون ابراهیمی‌نین دوغوم گونو

Fridon Ibrahemi

اویان نیوز دان آچیقلاما: ۲۹ آبان (چایان) فریدون ابراهیمی‌ آذربایجان ملی حکومتی‌نین دادستانی‌نین دوغوم گونودور.

اؤنه گلن یازی «آزادلیق یولوندا مبارزه» آدلی کیتابین “فریدون ابراهیمی” بولومونون عینی متنی آدی گلمیش کیتایدان حاضیرلانمیشدیر.

فریدون ابراهیمی

فریدون ابراهیمی ۱۲۹۷- نجی شمسی ایلده آستارا شهرینده روشنفکر بیر عائله ده آنادان اولموشدور. او، ابتدائی تحصیلینی آستارادا آلمیشدیر.فریدونون آتاسی میرزا غنی ۱۳۰۸- نجی ایلده سیاسی اتهاملا حبسه آلینمیش و بیر نئچه ایل زنداندا قالدیقدان سونرا نهاونده تبعید اولونموشدور. فریدون آتاسینین حمایه سی آلتیندا آستارادا ۹- نجی کلاسی قورتاردیقدان سونرا انزلی‌یه گئدیر و ۱۰ – نجی کلاسی اوردا قورتاریر. بوندان سونرا او ،تبریزه گلیر،۱۲-نجی کلاسی دا  فردوسی مکتبینده بیتیریر. عالی تحصیل آلماق مقصدیله فریدون تهرانا گیدیر.

او، تهراندا حقوق فاکولته سینده تحصیل آلدیغی زمان خصوصی تدریس، روزنامه لرده مقاله یازماق واسیطه سیله ئوزونون گونده لیک یاشایشینی تامین ایدیردی. ایکینجی جهان محاربه سی ایللرینده ایراندا آزادلیق حرکاتی جانلانماغا باشلادیغی دورده فریدون حزب توده ایرانین فعال عضولریندن بیری اولور. او ، تهراندا حزب طرفیندن نشر اولونان روزنامه لرین و همچنین دموکراتیک مطبوعاتین بیر نچه سینده اشتراک ایتمیش ، « رهبر» ، « آژیر»، «مردم» و باشقا مهم روزنامه لرده بیر چوخ کسرلی سیاسی مقاله لر یازمیشدیر.

۱۳۲۴-نجی ایلده فریدون ایراهیمی آذربایجانا گلیر. بو زمان آذربایجاندا خلق ارتجاعا قارشی قیزغین مبارزه آپاریردی. فریدون ابراهیمی ده آزادلیق اوغروندا آپاریلان بو مبارزه یه قوشولدی و ئوز آتشین قلمیله اونا گور کملی خدمتلر ایتدی. حزب تتوده ایرانین ایالتی کمیته سینین نظارتی آلتیندا نشر اولونان«خاور نو» («ینی شرق») روزنامه سینده فریدون ابراهیمی نین همین دورده یازدیغی مقاله لر ارتجاعین افشا ایدیلمه سینده مهم رول اوینامیشدیر.

آذربایجان دموکرات  فرقه سی  تشکیل اولدوقدان و حزب توده ایرانین آذربایجان ایالتی  تشکیلاتی فرقه ایله بیرلشدیکدن سونرا فریدون ایراهیمی ده اونون سیرالارینا قوشولدی.

وقتیله فریدون «آذربایجان» و «خاور نو» روزنامه لرینده یازدیغی مقاله لر اللرده گزیردی . اونون «آذربایجان دانیشیر» آدلی سلسله مقاله لری تاریخی کچمیشیمیزی بیر داها خاطرلاداراق، خلقی آزادلیق اوغروندا دویوشلرده روحلاندیریردی. مولف ئوز اثرینده نه کیمی بیر مقصد قارشیسینا قویدوغونی قید ایده رک یازیردی: «منیم مقصدیم بودور… ئوز حقیقی مقامی و موقعیتینی الده ایتمک ایچون بو گون قیام ایدن آذربایجان ملتینی آزاد دنیایا تانیتدیرماق استه ییرم. بشریتین مدنیت تاریخینده آذربایجانین نه کیمی بیر مقاما مالک اولدوغونی گوسترمک ایسته ییرم…» ف. ابراهیمی بو مقاله لرده ئوز خلقینین پارلاق تاریخینی خاطرلاداراق سونسوز بیر افتخار حسیله قید ایدیردی:

« آذربایجان مقدس ابدی اودلار ئولکه سیدیر. بو عزیز تورپاغین  هر بیر قاریشیندا افتخارلی بابا لاریمیزین اونودولماز یادگاری قالیر . اونون کچمیشده کی عظمتلی قلعه لرینین قالیقلاری و مقدس آتشلرین اثرلری بیزیم بویوک آتالاریمیزین پاک روحی و سارسیلماز ایمانینی گوستریر…»

بو زمان مرتجع و ساتقین جیزما – قاراچیلار آذربایجان خلقی نین  تاریخی کچمیشینی تحریف ایدن بیر سیرا اویدورما و بهتانچی مقالرله نشر ایدیردیلر. فریدونون یوخاریدا قید اولونان مقاله لری همین مرتجعلره قارشی دیش سیندیریجی و منطقی جواب اولماقلا برابر خلقیمیزین ملی آزادلیق حرکاتینین حقلی و عدالتی اولدوغوندا گوستریردی. فریدون ابراهیمی مارکسیست بیر پوبلیست کیمی حادثه لری علمی نقطه نظردن تجزیه و تحلیل ایدیردی. او ، آذربایجان دموکرات فرقه سینین مرکزی کمیته سینین اورقانی اولان «آذربایجان» روزنامه سینین تحریریه هیئتیله یاخیندان امکداشلیق ایدیر، روزنامه نین صحیفه لرینده سیاسی جهتدن کسگین، مضمون جهتدن دولغون مقاله لرله آردیجیل صورتده ایله ییردی.

۱۳۲۵- نجی ایلده فریدون ابراهیمی پاریسده تشکیل اولونموش صلح کنفرانسینا آذربایجان مطبوعاتینین نماینده سی صفتیله گوندریلدی. اوردان قاییتدیقدان سونرا ابراهیمی همین کنفرانس باره سینده «آذربایجان» روزنامه سینده بیر سیرا مقاله لر نشر ایتدی. همین سلسله مقاله لر «ایران ما »  روزنامه سی طرفیندن ترجمه اولونوب تهراندادا اوخوجی کتله لرینه چاتدیریلدی . فریدون ابراهیمی دموکراتیک مطبوعاتیمیزین گور کملی خادمی کیمی ئوز قلمی ، بیلیک و باجاریغی ایله خلق حرکاتین-۲۱ آذر نهضتینین غلبه سی اوغروندا چالیشمیشدیر.

۲۱ آذر نهضتینین غلبه سیندن سونرا، آذربایجان دموکرات فرقه سینین و ملی حکومتین درین اعتمادینی قازانمیش اولان فریدون ابراهیمی آذربایجانین باش مدعی العمومی تعیین ایدیلدی.

او ، بو وظیفه نی یرینه یتیره رکن ملی نهضتین نایلیتلرینین، ملی حکومتین قانون و قایدالارینین ، آذربایجان خلقینین آسایشینین کشیگده دایانمیشدی. آذربایجان دموکرات فرقه سینین بیرینجی قورولتاییندان مرکزی کمیته عضولیگینه سچیلمیش ف. ابراهیمینین نهضتده اشتراکی ، خلق ایشینه صداقتی ، یوکسک دولت خدمتی آذربایجان گنجلیگی ایچون ئورگره نیلمه سی لازم اولان بویوک سرمشقدیر.

نهایت، ۱۳۲۵-نجی ایلین آذر آییندا شاهنشاه قوشونلاری خائنجه سینه آذربایجانا سوخولدوقدان سونرا ابراهیمی ده حبسه آلینیر. او ، زنداندا اولدوغی زمان دا ئوز خلقینین منافعی و گله جگینی مردلیکله قورویور، دربار نوکرلرینین بوتون توطئه لرینه و تضییقلرینه باخمایاراق دشمن قارشی سیندا دیزه چوکمور.

فریدون محاکمه ایدیلدیگی زمان آذربایجان خلقینین حقوقونی شهامتله مدافعه ایدیر، نهایت ، بیر نچه آی حبسده ساخلانیلدیقدان سونرا جلادلار فریدون ابراهیمینی جمعه گونی ، ۱۳۲۶ – نجی ایل خرداد آیینن ۱- ده ، تبریز شهرینده دارا چکیرلر.

خلقین قهرمان اوغلی  فریدون ابراهیمی فرقه عضولرینین، زحمتکشلرین ، ایران روشنفکرلری و زحمتکشلرینین سون درجه محبت بسله دیکلری و صمیم قلبدن سئودیکلری بیر مبارز ایدی.

اونون اعدام ایدیلدیگی گون تبریز اهالیسینین ماتم گونونه چویریلمیشدی.

شاعر و یازیچیلارین بیر چوخونون فریدون ابراهیمییه بویوک اثرلر ، شعرلر ، پوئه مالار و حکایه لر حصر ایتمه لری هئچ ده تصادفی دگیلدیر. ملی نهضتیمیزین ، دموکراتیک ادبیاتیمیزین گورکملی خادمی اولان فریدون ابراهیمی آزادلیقلا اسارت آراسیندا گیدن دویوشون گورکملی قهرمانلاریندان و ینی نسلین مبارز صورتلریندن بیری اولموشدور.

ائله بونا گوره ده اونون خاطره سی ابدیلشدیریلیر و ابدی لشدیریله جکدیر.

11 12 13 14 15

یوروم یازین

Back to Top