دیل سئچین

5 آذربایجانلی مدنی فعال اوچون 45 ایل زیندان

yeni

اویان نیوز: آذربایجان میللی- مدنی فعاللاری آیت مهرعلی بیگلو(یوروش)، شهرام رادمهر، لطیف حسنی، بهبود قلیزاده و محمود فضلی هر بیری ۹ ایل تعزیری زیندانا محکوم اولدولار.

اویان نیوزون یئنی گاموح سایتیندان آلدیقی خبره گؤره، یک شنبه گونو ۱۵ اوردیبهشت ۱۳۹۲ تبریز اینقیلاب محکمه سینین اوچونجو شعبه رئیسی قاضی باقرپور، هر بیر توتوقلولارین قانونسوز تشکیلات یاراتما ایدعاسی ایله ۸ ایل تعزیری زیندان و نیظاما قارشی تبلیغات آپارما ایدعاسی ایله ۱ ایل تعزیری زیندان، توپلام ۹ ایل تعزیری زیندانین کسیلمه سینی سؤزلو حوکم اولاراق فعاللارین عایله لرینه بلیرتدی؛ داها سونرا بو حوکم کتبی اولاراق توتوقلولارین وکیللریندن بیری اولان فاطمه ستاری-ه ایبلاغ اولوندو. بو حؤکیم بورایا قدر آذربایجان میللی- مدنی فعاللارینا وئریلن ان آغیر جزا اولوبدو.
قاضی باقرزاده نین، گؤرولموش ایش قارشیسندا قالدیقینی سؤیله مه سی ایشین تعجوبلو نوقطالاریندان دیر. باقرزاده دئدی؛ امنیت گوجلری، تبریز محکه مه سی و پرونده نین سورقوجوسو هاشیم زاده بو میللی-مدنی فعالارا ان آغیر جزا وئریلمه سینی ایصرارلا ایسته میشدیلر.
دئیلمه لیدیر محمود فضلی، شهرام رادمهر، آیت مهرعلی بیگلو(یوروش)، لطیف حسنی و بهبود قلیزاده۱۳۹۱ اینجی ایلین سون گونلرینده امنیت مامورلاری طرفیندن توتوقلانیب و ایندی گیزلی تشکیلات یاراتما و نیظاما قارشی تبلیغات آپارما ایتیهام ایدعالاری ایله تبریزین مرکز زیندانیندا ساخلانیرلار.
بوندان قاباق آیت مهرعلی بیگلو (یوروش) و لطیف حسنی تبریز اینقیلاب محکه مه سی طرفیندن ۳۶ آی تعزیری زیندان، محمود فضلی و شهرام رادمهر ۶ آی تعزیری زیندان و بهبود قلی زاده ۵ ایللیک آسیلی اولاراق ۶ آی زیندانا محکوم اولموشدولار.
همده آذربایجان مدنی فعالی یوروش مهرعلی بیگلو تبریز عومومی محکه مه سینین ۱۱۴ اینجی شعبه سی طرفیندن۱ ایل تعزیری زیندانا محکوم اولموشدو.

 

یوروم یازین

Back to Top