دیل سئچین

عبدولله صدوقی تبریز زیندانینا اینتیقال وئریلدی

guntay-seduqi

اویان نیوزا اؤزل: آذربایجان مدنی فعالی عبدولله صدوقی(گونتای) بو گون تبریز زیندانینا اینتیقال وئریلدی.

اویان نیوزون خبر قایناقلاریندان آلدیقی خبره گوره، ۲۴ اردیبهشت ۱۳۹۲ آذربایجان مدنی فعالی عبدولله صدوقی عایله سینه تلفون ائده رک تبریزین مرکزی زیندانینین قرنطینه بؤلومونه اینتیقال ائدیلمه سینی خبر وئریبدی. امنیت گوجلری کئچن گون بو مدنی فعالین ائوینه هوجوم ائده رک توتوقلامیشدیلار. امنیت گوجلری بو مدنی فعالی گؤز آلتینا آلدیقدان سونرا، ۲۴ اردیبهشت گونو بیر ایللیک تعزیری زیندانینی چکدیرمک اوچون تبریز مرکز زیندانینا اینتیقال وئریبلر.
دئیلمه لیدیرکی عبدولله صدوقی ۲ شهریور ۱۳۹۰تبریزین قوم تبه محله سینده ۲۸ آزربیجان میللی _مدنی فعالی ایله بیرلیکده توتوقلانمیشدیر. بو اوتوروم آذربایجان میللی_ مدنی فعال لاری طرفیندن تبریزین قوم تبه محله سینده اورمو گولونون یئنی‌ دن قاباقکی دوروما گتیریلمه سی‌ و اورمو گولونون قوروماسینین قاباقینی آلماق اوچون اورگانیزه ائدیلمیشدیر.

خاطیرلاتیلمالیدیرکی تبریز اینقیلاب دادیگاهینین بیرینجی شعبه سی‌، عبدولله صدوقی (گونتای) نی‌ بیر آرایا توپلانیب امنیته قارشی گوناه ایشله مک ایدعاسی ایله یاریسی ۵ ایللیک آسیلی اولاراق ۲ ایل تعزیری حبسه محکوم ائتمیشدی.
بوندان قاباقدا بو مدنی فعال ۱۶ اسفند ۱۳۸۸ امنیت گوجلری طرفیندن توتوقلانیب و ۵۲ گون توتوقلو قالیب ۲۱ گون آجلیق اعتیراضی کئچیریب ۲۰ میلیون وثیقه ایله تبریز زیندانیندان سربست بوراخیلمیشدی. تبریز اینقیلاب محکمه سی‌ عبدولله صدوقی یه بیر آرایا توپلانما و امنیته قارشی گوناه ایشلمه، نیظاما قارشی تبلیغات و اؤزگه لر ایله ارتیباط قورماق ایتیهام ایدعاسی یاپیشتیرمیشدی. تراختور اوچون آذربایجان تورکجه سینده تبلیغ پوستری چاپ ائدیب یایماق، رادیو فردا و رادیو زمانه ایله دانیشیق آپارما دادیستانین ایدعا ائتدیقی ایتیهام لار آراسیندا ایدی !!! عبدولله صدوقی نین ۱۳۸۸ اینجیی ایلینده کی‌ توتوقلانماسی جاوازلی و ایجازه لی اولاراق آذربایجان تورکجه سینده تیراختور اوچون تبلیغ پوستری چاپ و یایماق اولموشدو!!!
دئیمه لیدیرکی عبدولله صدوقی (گونتای) توتوقلو اولدوغو زامان آجلیق اعتیراضی نتیجه سینده جیسمی دورومونون پیس اولدوغو اوچون دونیا عفو تشکیلاتی بیر بیلدیری وئره رک بو مدنی فعالین جیسمی دوروموندان اؤز نیگران چیلیقینی بیلدیرمیشدی و ایران حاکیمیتیندن بو مدنی فعالین سربست بوراخیلماسینی ایسته میشدی.

اویان نیوزو قایناق گؤستره رک بو خبر پایلاشیمیندا بیر معذرت یوخدور.

یوروم یازین

Back to Top