دیل سئچین

مهدی (ائلمان) نوری تبریز ایطیلاعاتیندا

elman nuri

اویان نیوزا اؤزل: مهدی (ائلمان) نوری بیر هفته خبرسیزلیغیندن سونرا تبریز ایطیلاعاتیندا اولوغوندان خبر وئردی

اویان نیوز موخبیرینین راپورونا گؤره، ۱۳۹۲ خورداد آینین ۴ اینجی گونو مهدی (ائلمان) نوری بیر هفته خبرسیزلیغیندن سونرا تئلفون ائده رک توتوقلانماسیندان و تبریز ایطیلاعاتیندا اولوغوندان خبر وئردی. سون هافتالار امنیت مامورلاری بیر نئچه سفر بو مدنی فعالی توتوقلاماق اوچون آتاسینین ائوینه گلیب آمما اونو ائوده اولمادیغی اوچون توتوقلایا بیلمه میشدیلر. امنیت مامورلاری بو آذربایجان مدنی فعالینین آتاسینین ائوینه گلدیکلرینده هر شئی آرایاراق اونون شخصی اشیالارینی آپاریبیلار. بو مدنی فعالین عایله سی بیر هافتا بویونجا ائولاد لاریندان خبرسیز ایدی لر. دئیلمه لیدیر کی بو مدنی فعال تئلفون ائتدیینده اعصاب قورص لارینی ایسته ییب دیر.

همده بو گون ۱۳۹۲ خوردادین ۵ اینجی گونو بو مدنی فعالین عایله سی بازپرس هاشیم زاده نین دفترینه گئده رک مهدی (ائلمان) نوری نین برائت برگه سینی وئره رک اونون توتوقلانما سببینی سوروشوتوقلاریندا، هاشیم زاده “تئهران دان توتوقلانماسی ایسته نیلیبدیر” جاوابینی وئریب دیر.

بوندان قاباقدا مهدی (ائلمان) نوری ۱۳۹۰ شهریور آینین ۲ اینجی گونو ۲۸ کیشی ایله بیرلیکده اورمو گؤلونو قورتارما سمیناریندا توتوقلانیب و تبریز اینقیلاب محکمه سینین بیرینجی شعبه سی طرفیندن میللی امنیته قارشی گیزلی آنلاشما ایدعاسی ایله ۲۴ آی حبسه ماحکوم اولموشدو. بو حؤکوم ویلایتین (اوستانین) تیکرار باخما دادگاهیندا تایید اولونجا بو مدنی فعالین اعتیراضی ایله اؤلکه نین عالی عدالت محکمه سینین ۳۲ اینجی شعبه سینده ایبطال، تیکرار باخیلماسی اوچون دوغو آذربایجان ویلایتینین ۴ اینجی شعبه سینه گؤندریلیب دیر. سونوندا دوغو آذربایجان ویلایتینین تیکرار باخما دادگاهینین ۴ اینجی شعبه سی طرفیندن محمود فضلی و مهدی (ائلمان) نوری برائت اولموشدولار.

اویان نیوزو قایناق گؤستره رک بو خبر پایلاشیمیندا بیر معذرت یوخدور.

یوروم یازین

Back to Top